Visiting Tijing Mesej, Maj 2011
Anda long Prishud mo folem Paten blong Prishud
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Fet • Famle • Help
Ol dia sista blong mi, yumi bin kasem blesing! I no from yumi ol memba blong Jos nomo, be tu from yumi ol memba blong Rilif Sosaeti—“oganaesesen blong Lod blong ol woman.”1 Rilif Sosaeti hem i pruf long lav blong God blong ol gel blong Hem.
Hat blong yu i no glad taem yu tingting bak long ol naesfala stat blong sosaeti ia? Long 17 Maj, 1842, Profet Josef Smit i bin oganaesem ol sista “anda long prishud folem paten blong prishud.”2
Blong kam oganaes “anda long prishud” i givim ol sista atoriti mo daereksen. Ilaesa R. Sno, seken Rilif Sosaeti jeneral presiden, i bin tijim se Rilif Sosaeti “i no save laef sapos i no gat Prishud, from trutok ia se oganaesesen ia i kasem evri atoriti mo paoa blong hem long prishud ia nao.”3 Elda Dalin H. Oks blong Kworom blong olgeta Twelef Aposol i bin eksplenem se, “Atoriti we ol ofisa mo tija blong Rilif Sosaeti oli save yusum … hem i atoriti we bae i kam long olgeta tru oganaesesen blong olgeta we i fasem olgeta wetem Jos blong Jisas Kraes blong ol Lata-dei Sent mo tru long wanwan set apat anda ol han blong ol prishud lida we oli bin singaotem olgeta.”4
Blong oganaesem olgeta “folem paten blong prishud” i givim ol sista ol tabu responsabiliti. Juli B. Bek, Rilif Sosaeti jeneral presiden, i bin eksplenem: “mifala i wok long fasin blong prishud—we i minim se mifala i lukaot, kasem, mo wok wetem revelesen; mekem ol desisen long ol kaonsel; mo putum wari blong mifalawan long kea blong ol narafala wan, wan afta narawan. Blong mifala hem i stamba tingting blong prishud blong rere mifalawan from ol blesing blong laef we i no save finis taem mifala i mekem mo kipim ol kavenan. Mekem se, olsem ol brata blong mifala we oli holem prishud, blong mifala hem i wok blong fasin blong sevem man, givim seves, mo kam wan tabu pipol.”5
Babra Tomson, seken kaonsela long Rilif Sosaeti jeneral presidensi.
Aot long Ol Skripja
I Kamaot long Histri blong Yumi
Long taem we oli stap bildim Tempol blong Navu, wan grup blong ol sista oli wantem blong oganaes blong sapotem hadwok blong bilding ia. Ilaesa R. Sno i bin raetem daon ol loa blong lukaotem niufala grup ia. Taem hem i soemaot ol loa ia long Profet Josef, hem i bin ansabak se: “Talem long ol sista se ofring blong olgeta ia Lod i akseptem, mo hem i gat samting we i moa gud blong olgeta. … Bae mi oganaesem ol woman anda long prishud mo folem paten blong prishud.”6 Sot taem afta, Profet i bin talem long niufala oganaes Rilif Sosaeti: “Naoia mi givim ki long yu long nem blong God, mo Sosaeti ia, bae i glad, mo save mo waes bae i kam daon stat long naoia.”7 Ol sista oli wantem blong kam antap long wan niufala level blong tabu fasin mo blong rere from ol prishud odinens we bae oli mekem insaed long tempol.
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10.Translesen blong Visiting Teaching Message, March 2011. Bislama. 09763 852
Wanem Mi Save Mekem?
-
Olsem wanem mi save helpem ol sista we mi visitim blong oli glad long ol blesing blong tabu wok blong Rilif Sosaeti?
-
Wanem nao bae mi mekem long manis ia blong kam antap long paoa blong mi blong kasem revelesen blong miwan?