Hebedoma Pasa
E nehenehe ta outou e faaineine no te Pasa na roto i te haapiiraa mai no ni‘a i te mea tei tupu i roto i te hebedoma hou te Faasatauroraa e te Ti‘a-faahou-raa o Iesu Mesia. Ma te haamata e va’u mahana hou te Pasa, a tai‘o i te mau mea tei tupu e te mau irava tei tabulahia no te mahana tata’itahi.
Mahana Maa
E ono mahana toe e tupu ai te hoê mahana faafaaearaa tei parauhia Pasa. E rave rahi mau taata tei haere atu i Ierusalema ia nehenehe ia ratou ia pûpû i te mau tusia i roto i te hiero i taua mahana ra. Ua haere avae atu o Iesu i Betania, te hoê oire iti fatata atu ia Ierusalema. E parahi oia i reira e pae aru‘i i piha‘iho i to’na mau hoa o Lazaro, Maria e Mareta. Ua faatahinu Maria i To’na na avae i te mono‘i.
A hi‘o Ioane 12:1-3.
Sabati
Ua haere avae Iesu mai Betania i Ierusalema. Ua tomo atu oia i roto i te oire na ni‘a i te hoê ateni, mai ta te hoê irava i roto i te Faufaa Apî i parau e e na reira Oia. Ua ite te taata Ia’na ei arii no ratou, ma te tuoraa, « Hosana », e te tuuraa i te mau rauere i mua i te ateni ia ore te repo puehu e tae atu i ni‘a i te Faaora. Ua haere atu Iesu i te hiero e ua ho‘i i muri iho i Betania.
A hi‘o Zekaria 9:9 ; Mataio 21:1-11 ; Mareko 11:1-11.
Monire
Ua ite Iesu i te taata i te hooraa mai e te hooraa’tu i te mau mea i roto i te hiero. No To’na hinaaro e ia riro te hiero ei « fare no te pure », i tiahi ai Oia ia ratou i rapae au. I muri iho ua faaora Oia i te mau taata hapepa e te matapô. Ua riri te mau tahu‘a pohehae Ia’na.
A hi‘o Mataio 21:12-17 ; Mareko 11:15-19.
Mahana Piti
Ua haapii Iesu i te mau taata i roto i te hiero e i ni‘a i te hoê aivi piri mai tei piihia te Aivi no te mau Olive.
Ua opua huna te mau tahu‘a i te taparahi pohe ia Iesu. Ua faati‘a te hoê o Ta’na mau pĭpĭ, o Iuda Isakariota ia tuu atu ia Iesu i roto i te rima o te mau tahu‘a no te faito e 30 moni ario.
A hi‘o Mataio 25:31-46 ; 26:14-16.
Mahana Toru
Aita te mau papa‘iraa mo‘a i faaite eaha ta Iesu i rave i taua mahana ra. Ua faaea paha Oia i taua mahana ra i piha‘iho i Ta’na mau pĭpĭ. E nehenehe ta outou e tai‘o i te parabole o na paretenia hoê ahuru, te hoê aamu ta Iesu i haapii atu i Ta’na ra mau pĭpĭ no te tauturu ia ratou ia faaineine no To’na Tae-Piti-raa mai.
A hi‘o Mataio 25:1-13.
Mahana Maha
Ua faaineine te mau pĭpĭ a Iesu no te Tamaaraa no te Pasa. I te taime tamaaraa, ua parau atu Iesu i te mau pĭpĭ e e hoo te hoê o ratou Ia’na. I muri iho, no te tauturu ia ratou ia haamana‘o Ia’na, ua horo‘a Oia ia ratou i te oro‘a no te taime matamua. Ua haere atu Iesu i roto i te Ô no Getesemane no te mauiui no ta tatou mau hara e no te pure i te Atua. Ua haere mai te mau taata e ta ratou mau ‘o‘e e ua tape‘a Ia’na. Ua horo ê atu te mau pĭpĭ no te ri‘ari‘a.
A hi‘o Mataio 26:17-29, 36-56.
Mahana Pae
Ua afa‘ihia Iesu i mua i te tahu‘a rahi, o Kaiapha Ua huna Petero te pĭpĭ na Iesu e ua matau oia Ia’na. Ua uiuihia Iesu e te tavana rahi, o Pilato, e Heroda. Ua faautu‘ahia Oia ia pohe i ni‘a i te satauro. Ua faasataurohia Iesu. Ua tuu atu te hoê taata ona tei piihia o Iosepha ia Iesu i roto i to’na iho menema. Ua haere atu te metua vahine o Iesu, o Maria, e Maria i Magadala i te menema.
A hi‘o Mataio 26:57-72 ; 27:1-2, 27-37 ; Luka 23:44-46, 50-56.
Mahana Ma’a
Ua vai tarava noa te tino o Iesu i roto i te menema. Ua tuuhia te hoê ofa‘i rahi i mua i te uputa. Ua ani te mau tahu‘a iino ia Pilato e ia tuuhia te mau tia’i i rapae au i te menema no te haapapu e aita e taata e tomo atu i roto.
A hi‘o Mataio 27:57-66.
Sabati Pasa
Ua ti‘a-faahou Iesu ! Ua ti‘a mai Oia mai te menema mai. Ua pou maira te hoê melahi na te ra’i mai e ua tura’i atu ra i te ofa‘i.
Ua parau Iesu i Ta’na mau pĭpĭ ia haapii e ia bapetizo e ua fafau Oia e i piha‘iho Oia ia ratou.
(A hi‘o Mataio 28).
Hoho‘a na Matthew Reier; i ni‘a, mai te pae aui: Te Haere ra Iesu i Betania i te Ahiahi, na James Tissot; To te Mesia Tomoraa’tu i Ierusalema ma te Hanahana, na Harry Anderson © IRI; Te Faaoraraa i te Taata Matapô, na Harry Anderson, na roto i te maitai o Pacific Press Publishing, Inc., eiaha e tapitihia; Te Reo no te Ra’i mai, na James Tissot; hoho‘a no roto mai i E Pae o Ratou e mea Paari, na Walter Rane, na roto i te maitai o te Church History Museum; Te Mesia i Getesemane, na Harry Anderson © IRI; hoho‘a no roto mai i te Te Faasatauroraa, na Harry Anderson © IRI; Te Hunaraa o te Mesia, na Carl Heinrich Bloch, faaohipahia na roto i te faati‘araa a the National Historic Museum i Frederiksborg in Hillerød, Danemaka, eiaha e tapitihia; i raro: Ua Ti‘a faahou Oia, na Del Parson