« Aore Oia i ô nei, ua ti‘a ïa i ni‘a ».

I teie mahana o te mau vahi parari ana‘e no Kaperenaumi te ti‘a mai nei, taua oire i te pae tatahi o te roto, te pû no te ohipa a te Faaora i Galilea. I ô nei ua poro Oia i roto i te sunago, ua haapii i te hiti tatahi, e ua faaora i roto i te mau utuafare.

I te omuaraa no Ta’na ohipa, ua rave o Iesu i te hoê papa‘iraa no roto mai ia Isaia : « Tei nia ia’u te Varua o te Fatu ra o Iehova, ua faatahinu mai Iehova ia’u ; ua tono mai oia ia’u ei faaite i te parau oaoa i te aau mărû ra ; ei faaora hoi i te feia aau oto ; ei faaite i te ora i te tîtî : e ia matara roa te feia tapeahia ra » (Isaia 61:1 ; a hi‘o atoa Luka 4:18) – te hoê faahitiraa parau maramarama no te hoê opuaraa hanahana no te faaora i te mau tamaroa e te mau tamahine a te Atua.

Ua riro râ te pororaa a Iesu i Galilea ei omuaraa noa. Ua faataa a‘ena te Tamaiti a te Taata i te hoê farereiraa ri‘ari‘a i ni‘a i te hoê aivi tei piihia o Golagota.

Tapeahia i roto i te Ô no Getesemane i muri a‘e i te Oro‘a Hopea, faaru‘ehia mai e Ta’na mau pĭpĭ, tutuhahia, tamatahia, e faahaehaahia, ua rurutaina o Iesu i raro a‘e i Ta’na Satauro rahi haere atu i Kalavaria. Ua haere Oia mai te re e tae atu i te haavareraa, te haamauiuiraa e te pohe i ni‘a i te satauro.

I roto i te mau parau no te himene « Te Oire Mo‘a » :

No tatou ua horo‘a mai to tatou Metua i te Ao ra i Ta’na Tamaiti. No Tatou i horo‘a ai to tatou Taeae Matahiapo i To’na ra ora.

Ua nehenehe i te Fatu i te otohe i te taime hopea. Aita râ oia i na reira. Ua auraro Oia i te mau mea atoa ia nehenehe Ia’na ia faaora i te mau mea atoa : te nunaa taata, te fenua, e te mau mea ora atoa e parahi ra i roto.

Aore roa e parau i roto i te ao Keresetiano tei hau atu i te faufaa rahi no’u maori râ taua mau parau tei parauhia e te melahi ia Maria Magadala o te heva ra e te tahi atu Maria a tapiri atu ai raua i te menema no te atuatu i te tino o to raua ra Fatu : « Eaha outou i imi ai i tei ora i te vairaa o te pohe ? « Aore oia i ô nei, ua ti‘a ïa i ni‘a » (Luka 24:2-6).

Na roto i teie nei faahitiraa parau, ua faaorahia iho nei ïa te feia tei ora na e tei pohe, te feia e ora nei i teie nei e o te pohe i te hoê mahana, e te feia aita â i fanauhia mai e aita â i pohe.

Ei hopea no te upooti‘araa o te Mesia i ni‘a i te menema, e ti‘afaahou ïa tatou paatoa. Teie te faaoraraa o te varua. Ua papa‘i o Paulo :

« Te mau mea hoi o te ra’i e te mau mea o te fenua, e anaana ê ra to te mau mea o te ra’i, e huru ê ra to te mau mea o te fenua nei.

« E anaana ê to te mahana, e anaana ê to te marama, e anaana ê to te mau fetia : e huru ê hoi to te tahi fetia i to te tahi i te anaana.

« Oia atoa te ti’a-faahou-raa o tei pohe ra » (1 Korinetia 15:40-42).

O te hanahana tiretiera ta tatou e imi nei. I mua i te aro o te Atua ta tatou e hinaaro nei i te parahi. O te hoê utuafare mure ore ta tatou e hinaaro nei ia riro ei melo.

No’na tei faaora ia tatou tata’itahi i te pohe hopea ore, te faaite papu nei au e e orometua Oia no te parau mau, ua hau atu râ Oia i te hoê orometua. E hi‘oraa Oia no te hoê oraraa maitai – e ua hau atu râ Oia i te hoê hi‘oraa maitai. O Oia te taote rahi – e ua hau atu râ Oia i te hoê taote. O Oia te Faaora mau o te ao, te Tamaiti a te Atua, te Arii no te Hau, te Mo‘a no Iseraela, te Fatu tei ti‘a-faahou, tei parau, « O vau nei te matamehai e te hopea ra ; o vau nei hoi oia o te ora nei, o vau nei oia o tei taparahihia ; o vau nei hoi to outou arai i te Metua ra » (PH&PF 110:4).

« Auê ïa te oaoa ta teie nei parau e horo‘a mai : ‘Ua ite au e te ora nei to’u Faaora !’ »²

Te faaite papû atu nei au i te reira.