E Vakaturi ena Nodra Vosa na iApositolo, ni na Marautaki Vakavinaka Duadua na ika 400 ni Yabaki ni iVolatabu ke Vulici Vakalevu Sara

E sega ni ka vakacala ka na kena tu vei keda nikua na iVolatabu,” e kaya o Elder M. Russell Ballard ena Kuoramu ni iApositolo Le Tinikarua.¹ E vakamacalataka ni tu na iVolatabu ena vuku ni nodra talairawarawa eso na tamata buladodonu era a muria na veivakauqeti me ra vola na veika bibi era sotava kei na ivakavuvuli, ka vakatalega kina na nodra vakabauta kei na nodra yaloqaqa eso tale, okati kina o ira na dauvakadewa vosa, o ira era a qai solibula vakalevu me “taqomaki ka maroroi” kina na iVolatabu.

Na ika 2 ni Me, 2011, na ika 400 ni yabaki ni kena taba na iVakadewa ni King James ni iVolatabu. E vuravura raraba, era sa vakananuma tiko na tamata na kena tabaki na iVolatabu ena mataveivosaki, na soqo ni marau, na vakatasuasua, ena veisisivi vosa, kei na vuqa tale. Eratou vakatura na lewe ni Kuoramu ni iApositolo Le Tinikarua eso na ka me vakatakilakilataki kina na soqo oqo: ena kena vakatorocaketaki na noda taleitaka na iVolatabu ena noda vulica na nona bula kei na nona veiqaravi vakalotu na iVakabula kei na nodra vosa na parofita makawa kei ira na iapositolo.

“Sa dodonu me da vakavinavinaka me baleta na iVolatabu,” e kaya o Elder Ballard. “Au taleitaka na iVolatabu, na kena ivakavuvuli, na kena lesoni, kei na kena yalo. … au taleitaka na kena vakasama kei na kena vakacegu ka yaco mai ena noda wilika na iVolatabu.”²

E duavata kina o Elder Jeffrey R. Holland ena Kuoramu ni iApositolo Le Tinikarua. “Eda lomana ka vakarokorokotaka na iVolatabu,” e kaya o koya. “E dau cavuti e liu ena noda ivolanikalou, na noda ‘ivolayavu.’”³ E vakananuma vei keda o koya ni yaco na Veivakalesui mai baleta ni a vulica na iVolatabu o Josefa Simici ka vakabauta na yalayala e na Jemesa 1:5 ni na sauma na Kalou na masu.

Ni nanuma lesu na veika a yaco me caramaka na sala ni Veivakalesui mai, e cavuta kina o Elder Robert D. Hales ena Kuoramu ni iApositolo Le Tinikarua na nona vakavinavinaka vei ira kece era a rawata na kena vakadewataki kei na kena taba na iVolatabu. Ena vuku ni nodra cakacaka, sa rawa kina na iVakadewa ni King James ni iVolatabu ki na tamata kecega me ra wilika—ia ena kena a rawa tu vei Josefa Simici, sa vakalesui tale mai kina ki vuravura na Lotu dina. “Sa rauta me iVolatabu Vakavalagi Vakadonui kina ni Lotu i Jisu Karisito ni Yalododonu Edaidai na King James Version?” E taroga o Elder Hales.⁴

“Me da kakua sara ni guilecavi ira na tamata sega ni wili rawa era a vakamatei ena vuku ni nodra vakabauta ka ra a kila na kaukauwa ni [iVolatabu] ka ra solia na nodra bula me rawa kina vei keda me da kunea ena kena veimalanivosa na marau tawamudu kei na vakacegu ni nona matanitu na Tamada Vakalomalagi,” e kaya o Elder Ballard.⁵

A wasea o Peresitedi Boyd K. Packer, na Peresitedi ni Kuoramu ni iApositolo Le Tinikarua, e dua na italanoa me baleta na nona raica e dua na iVolatabu ni matavuvale dua na senijiuri na kena dede ka kunea e dua na malanivosa ena tabana ni ulutaga ka vaqo, “Na iVakamacala uasivi duadua ni iVolatabu sai koya me volai vakavinaka sara e yalona o koya e wilika.”⁶ A muria ena ivolanikalou oqo: “Oi kemudou ga na neitou ivola sa volai ena loma i keitou, era sa kila ka wilika ko ira na tamata kecega” (2 Korinica 3:2).

Ena noda kila ka taleitaka na iVolatabu kei na kena itukutuku vakaivolanikalou e veitokani vata, sa rawa ni da vakaraitaka kina na noda marautaka kei na noda taleitaka na veivakalougatataki ni kena sa Vakalesui mai na kosipeli.

“Vakasamataka mada na cecere ni noda vakalougatataki me tu vei keda na iVolatabu kei na 900 na draunipepa ni ivolanikalou me kena ikuri,” e kaya o Elder D. Todd Christofferson. “Me da kanamagiti tikoga ena vosa i Karisito ka na tukuna vei keda na veika kecega me da cakava.”⁷