Elder W. Christopher Waddell

E dua na ivakavuvuli veidusimaki sega ni volai ena nona matavuvale o Elder Wayne Christopher Waddell e veigauna na, “Vakararavi vua na Turaga.”

“Ni o vakararavi vua na Turaga, o na sega ni leqataka na veisau lelevu,” e kaya o Elder Waddell me baleta na veiveisau sega ni namaki e dau yaco ena bula. “Eda kila ni tu ga e yalona na noda vinaka, ka da na vakalougatataki kina.”

A sucu o Elder Waddell ena June ni 1959 mai Manhattan Beach, California e Amerika, ka luvedrau tagane o Wayne kei Joann Waddell. A rawata na nona koroi na bachelor ni Isitori ena San Diego State University, ka a qito volleyball talega kina. Sa cakacaka ena veitutu e vuqa ena dua na kabani ni vakacuru ilavo ena bisinisi e vuravura raraba.

A vakamautaki Carol Stansel o Elder Waddell ena ika 7 ni June, 1984, ena Valetabu e Los Angeles, California. E va na luvedrau. Sa dau vakaliuci ena matavuvale na Waddell na duavata. Eratou vagoleya na duavata oqori ki na nodratou segata me ratou muria na kosipeli ni iVakabula ena nodratou vuvale. Sa dau bibi talega na itaviqaravi—ena nodratou dau tiko vata vakamatavuvale ena veibaravi ena yasa ni nodratou vale ka ratou dau tiko vata vakamatavuvale ena veigauna ni qito eso.

Ni bera ni kacivi ki na iMatai ni Kuoramu ni Vitusagavulu, a veiqaravi o Elder Waddell vakadaukaulotu tudei mai Sipeni, bisopi, lewe ni matabose e cake, daunivakasala nei peresitedi ni kaulotu, peresitedi ni iteki, peresitedi ni Tabana ni Kaulotu na Barcelona Spain, ka Vitusagavulu ni iWasewase.

E tukuna o Elder Waddell ni ra sa veisemai na veika e sotavi ia era sa laki vakaikuritaka yadua na “kato ni ivakadinadina” ka dau vakararavi kina o koya me sotava kina na dredre ni bula.

Ni vosa ena vakavakarau me baleta na nona veikacivi vou, e tukuna o Elder Waddell baleta na valetabu.

“Na cava a vakarautaki keda me baleta na ka oqo? Ni da lako ki na valetabu ena imatai ni gauna ka veiyalayalati, eda yalataka me da tu vakarau me da cakava na veika a kerea vei keda na Turaga, kevaka sara mada ga eda na sega ni logavinaka kina,” e kaya ko koya. Na veika ga e gadrevi, mo “lako ki na valetabu, laki kaulotu, cakava na veiyalayalati, qai raica toka na Ligana kei na ivakarau e dusimaka kina ko Koya na cakacaka. Eda sega ni cakava e dua na ka duidui; eda maroroya na veiyalayalati eda sa cakava, me vakataki ira kecega.”