Elder J. Devn Cornish

E kila o Elder John Devn Cornish ni sa ka bibi sara ena Lotu na lewenilotu kei na veikacivi yadua.

“Sa ka bibi me da nanuma ni da vakasamataka na veikacivi eso ena Lotu ni sega ni bibi na vanua eda dabe kina ena waqavuka—ia e bibi ga ni da sa tiko ena loma ni waqavuka,” e kaya o koya. “Sa bibi sara ena tawamudu ni da tiki ni cakacaka. Na itutu eda tu kina e sega sara ni bibi.”

Ena nona kacivi me laki veiqaravi ena Tabana ni Kaulotu na Guatemala–El Salvador me yacova mai na nona qai kacivi ena dua na gauna sa oti ki na iKarua ni Kuoramu ni Vitusagavulu, sa dau oga voli ga o Elder Cornish me qarava vakavinaka na nona ilesilesi ena Lotu, ka oka kina na peresitedi ni Cauravou, peresitedi ni kuoramu ni italatala qase, sekeriteri liu ni tabanalevu, iliuliu ni ilawalawa ni bete levu, lewe ni matabose e cake, bisopi, peresitedi ni iteki, peresitedi ni Tabana ni Kaulotu na Dominican Republic Santiago, ka Vitusagavulu ni iWasewase.

A sucu ena Epereli ni 1951 mai Salt Lake City, Utah e Amerika, vei rau o George kei Naomi Cornish, a tubu cake o Elder Cornish mai Utah, Georgia, kei Virginia, e Amerika, ni bera ni lesu tale ki Utah me laki vuli ena koliji.

Ni tiko voli mai Provo, a sota kina kei Elaine Simmons ena dua na itaviqaravi ni cauravou kei na goneyalewa itabaqase. Erau a vakamau ena Valetabu e Manti Utah ena Okosita ni 1973.

Ni rau susugi ira tiko na ono na luvedrau kei watina, a veiqaravi o Elder Cornish ena tabana ni veiqaravi vakavuniwai ena United States Air Force, a rawata na koroi na bachelor kei na koroi ni veiqaravi vakavuniwai ena Univeisiti na Johns Hopkins, ka sasagataka na nona ivola ni veiqaravi vakavuniwai ena Koronivuli ni Vuli Vuniwai e Havard—Valenibula ni Gone e Boston.

Na vuli kei na cakacaka e Idaho, Texas, California, kei Georgia, e Amerika, sa veitosoyaki kina vakalevu na matavuvale ena veiyabaki, ia ena vanua cava ga eratou tiko kina, erau kaya o Elder kei Sisita Cornish, ni rau taleitaka na veiqaravi ena Lotu.

“Sa tubu cake tiko ga na cakacaka e vuravura raraba, ka sa dua na veivakalougatataki cecere me rawa ni da veiqaravi vei ira na luvena na Turaga ena vanua cava ga era tu kina,” e kaya o Elder Cornish.

Na veikacivi oqo ki na Vitusagavulu, “me vaka ga na veikacivi kecega ena Lotu, sa na dua tale na madigi me da tiki kina ni Nona cakacaka na Turaga,” e kaya o Elder Cornish. “Keirau vakavinavinaka ena vuku ni galala oya.”