Elder Ian S. Ardern

Te mau taime atoa e ta‘i mai te niuniu aore râ e patotohia i te opani, te mau parau matamua na roto mai i te vaha o Elder Ian Sidney Ardern o teie ïa « Nahea ta’u e nehenehe e tauturu ? »

Fanauhia ia Harry e Gwladys McVicar Wiltshire i Te Aroha, Niu Terani, i te ava‘e Febuare 1954, ua haamana‘o o Elder Ardern e e mea pinepine te mau ohipa na‘ina‘i no te taviniraa i te faatupu i te taa-ê-raa rahi roa‘e i roto i te oraraa o te taata horo‘a e te taata farii. Ua parau Elder Ardern, « E ere te taviniraa i te mea au roa i te mau taime atoa, e haamaitairaa râ te reira i to oe oraraa i te mau taime atoa ».

Ua farerei Elder e te tuahine Ardern te tahi i te tahi a haere ai raua i te Fare Haapiiraa Tuarua a te Ekalesia i Niu Terani e ua faaipoipo raua i roto i te Hiero no Hamilton Niu Terani i te 17 no Tenuare 1976. Ua paari ta raua na tamarii e maha i roto i te hoê utuafare i reira te here no te tahi e te tahi e te hinaaro i te ite e i te ora i te mau ture no te evanelia i riro ai ei mau tautooraa matamua roa. Ua parau Elder Ardern, « E haamaitairaa ia hi‘o i teie â mau tautooraa matamua roa i roto i te mau utuafare a ta maua mau tamarii tei faaipoipohia ».

Ua riro te peeraa i te mau haapiiraa a te mau peropheta i roto i te utuafare ei tautooraa matamua roa na te utuafare Ardern. Ua riro te tai‘oraa i te mau papa‘iraa mo‘a i te mau mahana atoa ei peu tamau no te mea e ara te mau tamarii apî e e ravehia te reira ia nehenehe ia ratou ia tae i to ratou taime ia tuu i te tapa‘o uteute i ni‘a i te talena no te faaite e ua ravehia te tai‘oraa i taua mahana ra. Ua parau te tuahine Ardern, « Na roto i te mau mea iti e te ohie e nehenehe ai te mau peu maitai i te faatupuhia mai.

Hou to’na piiraa i roto i te Pŭpŭ Matamua no te Hitu Ahuru, ua tavini Elder Ardern ei misionare i Farani e Beretita, ei peresideni no te Feia Apî Tane no te Tĭtĭ, melo no te Apooraa Teitei, tauturu no te episekopo, episekopo, tauturu no te peresideni tĭtĭ, peresideni no te Misioni no Fiji Suva e Hitu Ahuru Area.

Ua farii Elder Ardern i ta’na na parau tu‘ite e piti i te pae o te haapiiraa i te Fare Haapiiraa Teitei no Waikato i Niu Terani. Ua rave oia i te ohipa i roto i te Faanahoraa Haapiiraa a te Ekalesia i roto i te mau ti‘araa e rave rahi, mai te orometua haapii, faatere, taata haapa‘o i te haapiiraa evanelia i Niu Terani, faatere no te Fare Haapiiraa Tuarua na te Ekalesia i Niu Terani, e Faatere no te Area no Patitifa.