Ua faatupu te Afata Tamau no te Haapiiraa i te mau Fafauraa a te Peropheta
Hoê ahuru matahiti i ma‘iri a‘enei, ua faaite mai te Peresideni Gordon B. Hinckley (1910-208) i te hoê fifi, te rave‘a ore o te mau misionare tahito e rave rahi e te tahi atu feia apî parau-tia i roto i te fenua vĕvĕ ia ape i te vĕvĕ e ua horo‘a mai i te rave‘a: Te Afata Tamau no te Haapiiraa (ATH). Ei afata o te ohu noa e o te haamauhia no te faaohipa i te mau horo‘araa a te mau melo e te mau hoa o te Ekalesia, e horo‘a tarahu ïa te ATH i te moni i te feia apî ma te titauraa e e faaineine ratou no te rave i te ohipa i roto i to ratou mau vahi nohoraa e e faaho‘i ratou i te moni aitarahuhia ia nehenehe i te tahi atu feia apî ia fana‘o atoa. Ua parau oia e e turu‘i ïa te Ekalesia i ni‘a i te feia ohipa tamoni ore e te mau faufaa e vai nei a te Ekalesia no te manuia.
Ua Tupu te mau Semeio
I to te Peresideni Hinckley haereraa’tu i mua i te terono i te 31 no Mati 2001 e a hohora ai oia i te orama no te Afata Tamau no te Haapiiraa i mua i te autahu‘araa a te Ekalesia, e mea papû i te mau taata e rave rahi e ua farii te peropheta a te Fatu i te arata‘iraa.
E au ra eita teie opuaraa e manuia a rû ai te feia faatere tei ma‘iti-apî-hia no te ATH i te haamata i te horo‘a i te moni tarahu i te tau ‘auhune no te matahiti 2001 mai ta te Peresideni Hinckley i faaue. Taa ê noa i te tatararaa faaûruhia a te peropheta, aita e faanahoraa ohipa, aita e opuaraa faataa-maitai-hia. Ua haamauhia te faanahoraa ma te faaohiparaa i te a‘oraa a te Peresideni Hinckley ei ture aratai. E rave rahi hanere aniraa no te moni aitarahu tei tae atu i te Pû Faatere o te Ekalesia i te taime a piihia’i te feia faatere e a haamauhia’i te niu o te faanahoraa.
Ua tupu a‘ena râ te mau Semeio. I roto i te matahiti matamua, e rave rahi milioni tara marite tei horo‘ahia no te faanahoraa. No to ratou ite e to ratou aravihi taa ê no te ohipa faatere i te ATH e rave rahi mau taata tei tihepu-vitiviti-hia no te faatere i teie afata ma te aufau-ore-hia. Te faanahoraa titauhia no te turu i te ATH o te mau faanahoraa haapiiraa evanelia ïa a te Feia Api Paari e te mau Pû Imiraa Ohipa a te Ekalesia. Ua nahonaho vitiviti te mau mea atoa tei hinaarohia no te horo‘a i te faanahoraa ta te Peresideni Hinckley i parau i te ava‘e Eperera 2002 e hoê « niu paari ».1
Ua parau o Rex Allen, o te rave nei i te ti‘araa faatere aufau-ore-hia no te haapiipiiraa e te aparauraa, « E mea maoro a‘enei, ua toro Mose i ta’na raau i ni‘a i te Moana Uteute e ua vahi te mau pape. Ua faaite mai te Peresideni Hinckley i te hoê â faaroo a tape‘a ai oia i to’na pereue faatere i ni‘a i te moana pouri no te vĕvĕ e a haamata ai oia i te ATH ».
Ua haapapû pinepine mai te Peresideni Hinckley e « E Semeio teie ».
I muri a‘e e 10 matahiti, te haamata ra te mau Semeio rahi roa‘e.
Ua tupu te mau Fafauraa.
I roto i ta’na faaiteraa i te parau no te ATH e i roto i te mau a‘oraa i muri mai, ua fafau te Peresideni Hinckley e rave rahi mau haamaitairaa o te tae mai na roto i te ATH. Te tupu ra te mau fafauraa tata‘itahi i te rahi a rahi ai te feia i te manuia i roto i te ATH e i te aufau i ta ratou aitarahuraa.
Te Rave‘a e te Ohipa
Ua parau te Peresideni Hinckley, « E noaa i [te feia no te ATH] te haapiiraa maitai o te tatara ia ratou i rapae au i te apoo no te vĕvĕ ».2
I te ava‘e Febuare 2011, fatata 90 i ni‘a i te hanere o te feia tei imi i te ohipa i muri a‘e i to ratou faaotiraa i te haapiiraa tei noaa te ohipa. Te tahi 78 i ni‘a i te hanere o te feia e ohipa nei i teie nei tei parau e ta ratou ohipa i teie taime e hoê ïa haamaitairaa ia faaauhia i to ratou huru matamua hou a farii ai ratou i te haapiipiiraa. Te moni ohipa i muri a‘e i te haapiipiiraa a te feia no te ATH e toru e tae atu ïa i te maha taime hau i te moni ohipa tahito hou te haapiiraa, o te hoê ïa haereraa i mua rahi roa no te pae faufaa.
Te Utuafare e te Vahi Nohoraa
Ua parau te Peresideni Hinckley, « E faaipoipo ratou e e haere ratou i mua e te mau ite e te aravihi o te faati‘a ia ratou ia noaa rahi te moni e ia rave i to ratou mau ti‘araa i roto i te sotaiete i reira e nehenehe ai ia ratou ia tauturu rahi atu ».3 Hau atu i te hoê i ni‘a i te toru o te feia no te ATH tei faaipoipohia i teie nei.
Ua parau o Elder John K. Carmack, te faatere rahi no te ATH : « Te hoê o te mau hotu faahiahia roa no te ATH e tae noa mai i teie nei o to matou ïa iteraa e te rahi nei te ti‘aturiraa i roto i te feia apî. Na teie ti‘aturiraa e horo‘a ia ratou te itoito ia faaipoipo e ia haere i mua i roto i to ratou mau oraraa ».
A na reira ai ratou, te hi‘o nei ïa to ratou mau utuafare i te mau mahana maitai a‘e no ananahi.
Te Ekalesia e te Faatereraa
Ua parau te Peresideni Hinckley, « Ei melo haapa‘o no te Ekalesia, e aufau ïa ratou i ta ratou tufaa ahuru e ta ratou mau ô, e e puai a‘e te Ekalesia no to ratou parahiraa i te mau vahi i reira ratou e ora ai ».4
I te tahi mau vahi ua faaterehia te ATH e rave rahi mau matahiti i teie nei, 10 e tae atu i te 15 i ni‘a i te hanere o te feia faatere o te Ekalesia i teie nei e mau feia ïa tei fana‘o i te ATH.
Ua parau o Rex Allen e « Ua faaitoito te feia i roto i te ATH i te tahi atu feia apî ia faaohipa i te mau aitarahuraa no te ATH e ia tatara i te taamu no te vĕvĕraa ». « I muri a‘e e 10 matahiti te ite nei tatou i te ti‘aturi i te rahi a faaite ai te feia tei haamaitaihia i te mau haamaitairaa ia vetahi ê ».
Te mau Maitai i ni‘a i te Oraraa o te mau Taata e Rave rahi.
Ua fafau te Peresideni Hinckley, « E riro ïa [te ATH] ei haamaitairaa no te feia atoa ta te ATH e haaputapû, te feia apî tane e vahine, to ratou mau utuafare, te Ekalesia o te haamaitaihia e te feia faatere puai ».5
Hau atu i te 47.000 taata tei tomo i roto i te ATH mai te mau ava‘e Setepa-Novema 2001. Aita i tai‘ohia te mau utuafare tapiri tei paturuhia e tei faaûruhia e te mau melo no te utuafare tei tomo i roto i te ATH, te mau paroita e amaa o tei fana‘o i te mau melo tei rahi i te aravihi no te tavini e no te horo‘a, e te mau ohipa tei hinaaro i te feia rave ohipa aravihi no te tupu i te rahi.
Ua parau te Taea‘e Allen, « A feruri na i te puai a hi‘o ai outou i te feia atoa tei haamaitaihia ». « E tae noa’tu i te feia tei horo‘a na te ATH, te feia horo‘a, to ratou mau utuafare, to ratou mau paroita e amaa, ua haamaitai-taatoa-hia ratou na roto i ta ratou mau horo‘araa ».
Ua parau o Elder Carmack, « Te vai nei i roto i te rima o te rahiraa o te Feia Mo‘a te aravihi i te horo‘a tamau i te tahi mea no teie afata e no te tahi atu mau opuaraa maitai ». « Ua tauturu te aniraa a te Peresideni Hinckley i te feia o te horo‘a i te moni i te ATH e te feia atoa e [faaohipa i te reira] i te haamaitai ia ratou iho e ia piri atu i to tatou Faaora ».
Tupuraa Tamau
Ua tupu te orama a te Peresideni Hinckley no ni‘a i te Afata Tamau no te Haapiiraa a tamau noa’i te mana no teie faanahoraa faaûruhia i te parare na te ao taatoa nei, e e tamau noa te reira i te tupu i te rahi a tamau noa’i te mau horo‘araa e te faaho‘iraa i te mau aitarahuraa, o te faati‘a i te hoê u‘i apî o te mau taata no te haamaitai ia ratou iho e i to ratou mau huru oraraa.
No te ite atu â no ni‘a i te Afata Tamau no te Haapiiraa a haere atu i te pef.lds.org.
Ua tauturu te Afata Tamau no te Haapiiraa tei haamata e 10 matahiti i teie nei hau atu i te 47.000 taata.
Hoho‘a na Brian Wilcox