Inaf Mane

Mi bin mitim ol misinari taem mi bin gat 17 yia. Long taem ia, mi mo bigfala brata blong mi i stap tugeta. Mama blong mitufala i bin ded wan yia bifo, mo laef i bin had. Taem ol misinari oli bin tijim mi, mi save luk se Jos ia i bin hemia nao we mi bin stap lukaotem. Be from ol fren blong mi oli tanem tingting blong mi, i mekem se mi no stap go long jos long ol Sandei.

Wan taem mi bin go long wan Jos aktiviti long wik. Taem mi stap luk evri yangfala we oli stap laf mo pleiplei, hem i givim mi wan bigfala glad. Ol misinari, wetem ol yut, oli bin tekem janis ia blong tijim mi wan gospel lesen, mo mi bin filim gud tumas mo i mekem mi disaed blong kasem baptaes.

Be nomata mi bin joenem Jos, mi bin fesem ol jalenj. Mi wan nomo mi memba blong Jos long pat blong taon ia mo stap longwe long mitinghaos. Ol non memba fren blong mi oli nomo wantem mekem wan samting wetem mi. Taem mi filim se mi stap miwan, mi bin prea mo filim lav blong Lod.

Evri manis, mi bin kasem wan smol pat blong mane we i kam long wan mane we mama blong mi i bin livim i stap. I bin had tumas blong sapotem miwan wetem smol mane ia. Be mi disaed blong stap obei. Mi bin pem taeting mo tu mi mas pem transpotesen blong go long seminari mo ol Sandei miting. Mi no bin andastanem olsem wanem, be long en blong manis, mi bin faenem se i bin gat inaf mane blong mekem evri samting ia.

Mi bin save se mi bin kasem blesing from we mi bin pem taeting. Blong stap obei long komanmen ia, i bin helpem mi blong kasem wan strong testemoni, go long wan misin, mo luksave ol blesing mekem se mi save mekem ol niu memba we oli stap fesem ol jalenj blong oli kam strong moa.