2011
Mekem Ol Famle Oli Kam Strong Moa Tru long Fasin blong Stap Dipen long Olgetawan long Wol Ia
Jun 2011

Visiting Tijing Mesej, Jun 2011

Mekem Ol Famle Oli Kam Strong Moa Tru long Fasin blong Stap Dipen long Olgetawan long Wol Ia

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Fet • Famle • Help

Blong stap developem fasin blong stap dipen long yuwan—wei we yumi save mekem blong kea long yumiwan mo ol famle blong yumi—hem i responsabiliti blong evri sista. Yumi kam blong dipen long yumiwan taem yumi lanem blong lavem wok, taem yumi lukaotem insperesen blong faenem ol wei we oli moa gud blong sapotem yumiwan, mo taem yumi wok wetem ol memba blong famle blong oli kasem ol stamba nid we oli gat.

Taem yumi dipen long yumiwan, yumi yusum ol blesing mo ol risos blong yumi blong rere from mo blong stap longwe long ol problem. Be, fasin blong stap dipen long yuwan, i kam antap taem yumi prea from strong paoa long tingting blong fesem, wetem fet, ol jalenj ia we i tru bae oli kam. Fasin blong stap dipen long yuwan i mekem tu se yumi save kipim kavenan blong yumi blong stap kea long ol narawan.

Long Rilif Sosaeti, oli bin tijim yumi long ol prinsipol mo ol skil long saed blong fasin blong dipen long yumiwan. Ol sista oli save lanem abaot fasin blong lukaotem mane (mekem bajet), fasin blong kamaot long kaon, ol kwalifikesen blong kasem wan wok, ol skripja mo gospel, tijim ol narawan blong rid mo lan, long saed blong teknoloji, fasin blong stap helti long bodi, stap fit, fasin blong no foldaon o blong kamaot long adiksen, helt long saed blong filing mo sosol laef, stopem sik, mekem garen, mekem kaekae mo storem, rere long eni imejensi, mo plante nara samting we bae i helpem yumi blong save dipen long yumiwan.1

Juli B. Bek, Rilif Sosaeti jeneral presiden, i eksplenem se “blong kasem samting blong yumiwan mo blong ol narawan i wan pruf se yumi ol disaepol blong Lod Jisas Kraes. … Taem [mama blong man blong mi] i bin ded wantaem nomo las yia, hem i bin livim i stap pruf blong laef blong hem long olsem wanem hem i dipen long hemwan. Hem i bin gat wan tempol rekomen mo i bin yusum gud ol skripja mo ol gospel stadi lesenbuk. Wetem lav, mifala i bin seremaot ol sospen, mo ol dis we hem i bin yusum blong mekem plante kaekae long hem. Hem i bin livim ol blangket we hem i bin mekem wetem ol olfala klos long hem. Hem i biliv long ol olfala toktok ia se ‘Yusum evriwan, werem kasem i nogud, mekem i wok, o mekem nomo olsem.’ Mifala i bin luk saplae blong kaekae we hem i planem, lukaotem, mo sevem. Speseli wan smol akaon buk blong hem we hem i stap holem we hem i fetful blong rekodem ol mane we hem i bin spendem blong plante yia. From hem i plan gud blong fiuja, hem i bin livim sam mane we hem i bin sevem blong ol imejensi, mo hem i no bin gat kaon! Wanem we i moa impoten, hem i bin tijim mo givim insperesen long plante narafalawan long ol skil we hem i bin gat long taem we hem i laef long wan fetful laef.”2

Aot long Ol Skripja

Jon 13:34–35; Jemes 1:27; Mosaea 4:26; Luk long Doctrine and Covenants 29:34–35; 38:30; 44:6

I Kamaot long Histri blong Yumi

Ol sista blong Rilif Sosaeti, oltaem, oli tekem pat long wok blong sevem ol sol long saed blong bodi mo long saed blong spirit. Evri wik, taem ol woman blong Rilif Sosaeti blong Nauvu oli bin mit, ol sista oli bin givim ripot abaot ol pipol we oli bin gat nid. Ol donesen blong mane, ol samting blong haos, ol talen, mo taem oli bin yusum blong helpem olgeta we oli stap long nid. Stamba wok ia blong helpem olgeta we oli safa i bin gohed blong stap olsem wok blong Rilif Sosaeti tru ol jeneresen.

Taem ol Sent oli kasem Sol Lek Vale, Presiden Brigham Yang (1801–77) i bin givim kaonsel long ol sista blong givhan long olgeta we oli stap long nid mo blong lanem ol skil we bae i mekem se oli save lukaot gud long olgetawan. Hem i bin talem, “Lanem blong sapotem yufalawan; pikimap mo storem ol sid mo flaoa, mo sevem rere from dei ia we bae i gat nid.”3 Anda long daereksen blong prishud, Rilif Sosaeti i gohed blong tijim fasin blong stap dipen long yuwan, blong protektem famle, mo blong leftemap tingting long saed blong stret mo gud fasin blong yuwan mo gat ol fasin blong jariti, we i stret lav blong Kraes.

© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, June 2011. Bislama. 09766 852

Ol Not

  1. Luk long Handbook 2: Administering the Church (2010), 9.4.2.

  2. Julie B. Beck, “The Welfare Responsibilities of the Relief Society President,” Basic Principles of Welfare and Self-Reliance (2009), 6.

  3. Teachings of Presidents of the Church: Brigham Young (1997), 231.

  1. Olsem wanem mi save helpem ol sista blong mi mo famle blong olgeta blong oli kam moa gud long fasin blong stap dipen long olgetawan long wol ia?

  2. Olsem wanem mi save mekem fasin blong stap dipen long miwan long wol ia i kam moa gud?