Ol Blesing blong Taeting

Stamba tingting blong God blong givim ol komanmen long yumi i blong blesem yumi. Hem i wantem givim yumi laef we i no save finis, presen ia we i moa bigwan bitim ol nara presen blong Hem (luk long D&C 14:7). Blong kasem presen ia blong go stap wetem Hem blong oltaem olsem ol famle long selestiel kingdom, yumi mas save olsem wanem blong laef folem ol loa blong kingdom ia (luk long D&C 88:22).

Hem i bin givim yumi ol komanmen long wol ia blong helpem yumi kam antap long standet ia. Loa blong taeting i wan long ol komanmen ia blong mekem yumi rere. Loa ia,i blong yumi givim wan aot long ten blong evri mane we yumi winim. Hem i isi inaf blong wan pikinini i andastanem hemia. Mi bin luk ol pikinini taem oli givim wan taeting envelop long wan bisop, we i gat insaed wan aot long ten selen we oli winim.

Wan long olgeta blesing we i kam taem wan i pem wan ful taeting, i blong developem fet blong laef folem wan loa we i moa hae. Blong laef long selestial kingdom, yumi mas laef folem loa blong konsekresen. Longwe, yumi mas filim save se evri samting we i mekem yumi, mo evri samting we yumi gat, i blong God.

Taem yumi pem taeting, i gat tri wei long laef ia blong i mekem yumi rere blong filim wanem we yumi nidim blong filim blong kasem presen we i laef we i no save finis.

Faswan, taem yumi pem taeting blong yumi i go long Jos, Papa blong yumi long Heven i givim yumi ol blesing. Eniwan we i pem wan ful taeting oltaem, i save se hemia i tru. Samtaem, ol blesing oli kam long saed blong spirit mo samtaem, tru ol samting we yu nidim long laef. Lod i givim long taem we Hem i luk i stret mo folem wanem Hem i save we i moa gud blong yumi.

Taem ol blesing ia i kam, fet blong yumi i kam antap se God i stamba blong evri samting we i gud long laef blong yumi. I mekem i moa isi blong luk se konsekresen (fasin blong givim evri samting) i luksave trutok ia se evri samting we God i krietem i blong Hem. I mekem yumi filim glad mo tangkyu we Hem i askem nomo 10 aot long 100 long wanem we hem i bin givim long yumi finis. Mekem se yumi rere gud blong laef folem loa blong konsekresen taem we bae oli askem yumi blong folem.

Nambatu, yumi evriwan we i bin pem wan ful taeting oltaem, yumi filim bigfala tras ia blong askem God from wanem we yumi mo famle blong yumi i nidim. Hem i bin promesem ol blesing, iven plante we i bitim mak taem yumi stap fetful long kavenan blong yumi blong pem ol taeting blong yumi (luk long Malakae 3:10). Mekem se wan long olgeta bigfala blesing blong taeting i fasin blong gat tras long wanem bae i hapen long fiuja. Nomata wanem situesen bae yumi stap long hem, ol samting bae i kam gud moa. Taem yumi kipim ol promes blong yumi, bae Hem i kipim promes blong Hem. Wan filing blong pis i wan long ol bigfala blesing blong pem wan ful taeting. Olgeta we oli bin kipim komanmen blong taeting, oli save testifae se blesing blong pis i tru mo i spesel.

Nambatri, olgeta we oli pem taeting oli filim lav we oli gat long God mo long evri pikinini blong Hem i kam antap. Lav ia we i kam antap ia, i kam tru from oli andastanem olsem wanem Papa i yusum ol taeting we yumi givim blong blesem ol pipol long wol ia mo blong taem we i no save finis.

Tru ol wokman blong Hem we oli gat atoriti, Hem i yusum ol taeting wetem plante kea. Man we i pem taeting i helpem Lod blong bildim ol tempol, we ol famle i save sil blong oltaem. Man we i pem taeting i helpem Hem blong sendem gospel i go long ol pipol long evri ples. Man we i pem taeting i helpem Hem blong mekem se i nomo gat hanggri mo i nomo gat olgeta we oli safa, mo Hem mi mekem hemia long wei blong Hem mo tru ol wokman blong Hem. Eniwan long ol wokman ia i save talem long yu olsem wanem lav i kam antap from oli bin yusum taeting blong blesem ol pipol. Mo tu, man we i pem taeting wetem fet i save talem hemia.

Taeting setelmen bae i kam afta long plante manis. Mi prea se yu mo famle blong yu bae i stat naoia blong mekem plan mo rere blong kwalifae from ol blesing we God i kapsaedem long olgeta evriwan we i save talemaot long Hem se oli ol man we i pem taeting fulwan.