Nyiaj Txiag Txaus

Kuv tau ntsib cov tub txib thaum kuv muaj hnub nyoog 17 xyoo. Thaum ntawd kuv tus tij laug thiab kuv nyob ua ke. Xyoo ua ntej ntawd, wb niam tau tas sim neej, thiab wb lub neej kuj nyuaj kawg. Thaum ob tug tub txib qhia kuv, kuv pom tau hais tias lub Koom Txoos yog lub koom txoos uas kuv ib txwm nrhiav kom tau koom. Tiam sis qhov uas kuv cov phooj ywg pheej yaum kom kuv mus ua lwm yam tab kaum kuv es kuv thiaj tsis mus rau lub koom txoos thaum hnub Sunday.

Muaj ib zaug kuv tau mus koom lub Koom Txoos ib yam ntxim saib ntxim ua thaum tsis yog hnub vas xaum vas thiv. Thaum kuv pom tag nrho cov tub hluas ntxhais hluas luag nyav thiab ua si ua ke, qhov ntawd ua rau kuv xyiv fab heev. Cov tub txib, nrog rau cov hluas siv lub cib fim ntau los qhia txoj moo zoo rau kuv, thiab ua rau kuv zoo siab heev ces kuv thiaj li los ua kev cai raus dej.

Tab sis txawm tom qab kuv tau los koom lub Koom Txoos lawm, los kuv tseem muaj kev cov nyom thiab. Kuv yog tib tug mej zeej ntawm lub Koom Txoos uas nyob rau hauv lub zos no ces lub tsev sib ntsib nyob deb heev ntawm kuv. Kuv cov phooj ywg uas tsis yog mej zeej tsis nyiam kuv lawm. Thaum kuv nyob kuv ib leeg xwb, kuv thov Vajtswv thiab hnov tau tus Tswv txoj kev hlub.

Txhua hli, kuv tau txais me ntsis nyiaj ntawm cov nyiaj uas kuv niam muab cia rau kuv xwb. Yeej nyuab heev los txhawb nqa kuv tus kheej vim cov nyiaj tsawg heev. Tab sis kuv yeej xav ua tus neeg mloog lus. Kuv them ib feem kaum thiab them nqi tsheb mus kawm vaj lug kub thiab mus koom kev sib ntsib rau hnub Sunday. Kuv tsis to taub, hais tias ua cas thaum hlis tag lawm, kuv ho muaj nyiaj txaus los them txhua yam thiab.

Kuv yeej paub hais tias kuv tau koob hmoov vim kuv them ib feem kaum. Qhov uas kuv ua raws li lo lus txib no pab kuv zaj lus tim khawv muaj zog tuaj, mus ua tau ib tub txib, thiab paub txog tej koob hmoov kom kuv thiaj li pab tau cov mej zeej tshiab thaum lawv muaj kev cov nyom.