Thawj Pawg Thawj Tswj Hwm tsab Xov, Rau Hli Ntuj 2011
Tej Koob Hmoov ntawm Ib Feem Kaum
Lub ntsiab ntawm qhov uas Vajtswv muab tej lus txib rau peb yog xav foom koob hmoov rau peb. Nws xav muab txoj sia nyob mus ib txhis, uas yog Nws lub txiaj ntsim zoo tshaj plaws, pub rau peb (saib D&C 14:7). Kom thiaj li yuav txais tau lub tsiaj ntsim uas yog nrog Nws nyob mus ib txhib ua ke nrog rau peb tsev neeg hauv lub nceeg vaj xilethi-aus, peb yuav tsum ua lub neej raws li tej kev cai ntawm lub nceeg vaj ntawd (saib D&C 88:22).
Nws twb tau muab tej lus txib rau peb hauv lub neej no lawm kom thiaj li pab tau peb ua li ntawd. Txoj kev cai them ib feem kaum yog ib txoj kev txib uas yuav pab npaj tau peb. Txoj kev cai hais tias peb yuav tsum muab ib feem kaum ntawm peb tej nyiaj txiag uas peb khwv tau pub rau tus Tswv no. Qhov no yooj yim heev uas ib tug me nyuam yeej to taub tau. Kuv yeej tau pom cov me nyuam yaus muab ib lub hnab ntawv uas muaj ib feem kaum ntawm cov nyiaj npib uas lawv tau los cev rau ib tug npiv sov.
Ib qho koob hmoov ntawm kev them ib feem kaum tag nrho yog qhov uas muaj siab ntseeg los ua lub neej nyob raws li ib txoj kev cai loj me ntsis. Kom thiaj li nyob tau rau hauv lub nceeg vaj xilethi-aus, peb yuav tsum ua neej raws li txoj kev cai fij siab. Qhov no txhais tau tias peb yuav tsum xav hais tias ntawm peb tus kheej thiab tag nrho tej yam uas peb muaj yeej yog Vajtswv li tib si.
Qhov tsawg kawg yeej muaj li peb txoj kev uas yog thaum peb them ib feem kaum tag nrho hauv lub neej no ces yuav pab npaj peb los xav saib peb yuav tsum xav li cas es thiaj li txais tau lub txiaj ntsim ntawm txoj sia nyob mus ib txhis.
Qhov thib ib, thaum peb them ib feem kaum rau lub Koom Txoos, peb Leej Txiv Saum Ntuj Ceeb Tsheej yuav nchuav tej koob hmoov los rau peb. Leej twg uas tau rau siab them ib feem kaum tag nrho yeej paub hais tias qhov no muaj tseeb tiag. Tej koob hmoov qee zaum yog koob hmoov ntawm sab ntsuj plig thiab qee zaum yog ntawm sab cev nqaij daim tawv. Tej koob hmoov no yuav muab rau peb raws li tus Tswv lub sij hawm thiab raws li Nws txoj kev paub hais tias qhov twg yog qhov uas yuav zoo tshaj rau peb.
Thaum txais tej koob hmoov no, ces peb txoj kev ntseeg uas hais tias Vajtswv yog txhua yam zoo hauv lub neej no yuav loj tuaj. Ces yuav yooj yim heev rau peb pom tau hais tias txoj kev fij siab qhia qhov tseeb tias tag nrho tej uas Vajtswv tsim yeej yog Nws li. Qhov nov ua rau peb yuav zoo siab tias Nws tsuas hais kom peb muab ib feem kaum ntawm tej yam uas nws twb muab rau peb lawm xwb. Ces peb thiaj li npaj los ua lub neej raws li txoj kev cai fij siab thaum uas yuav kom peb ua.
Qhov thib ob, peb txhua tus uas yeej rau siab them ib feem kaum tsis tu ncua li yuav ua siab loj los thov Vajtswv kom muab tej yam uas peb los sis peb tsev neeg xav tau. Nws yeej tau cog lus tseg lawm hais tias Nws yuav muab koob hmoov ntau heev uas peb yuav txais tsis tas li yog tias peb muaj siab ntseeg ua raws li peb tej kev khi lus uas hais tias peb yuav them ib feem kaum (saib Malakis 3:10). Ib qho koob hmoov zoo heev ntawm ib feem kaum yog txoj kev ua siab loj txais tos tej uas yuav muaj los yam tom ntej. Txawm hais tias yuav muaj li cas los rau peb, los yeej yuav kawg rau qhov zoo. Thaum peb ua raws li peb tej lus cog tseg, ces Nws yuav ua raws li Nws tej lus cog tseg. Qhov uas nyob nyab xeeb yog ib qho koob hmoov zoo heev ntawm kev them ib feem kaum tag nrho. Cov uas tau ua raws li zaj lus txib ntawm if feem kaum yeej uas tau tim khawv hais tias kev nyob nyab xeeb yeej muaj tseeb tiag thiab tseem ceeb heev.
Qhov thib peb, cov uas them ib feem kaum yeej pom tau lawv txoj kev hlub rau Vajtswv thiab Vajtswv cov me nyuam loj tuaj. Qhov uas txoj kev hlub loj tuaj no yog kev to taub hais tias Leej Txiv siv tej nyiaj ib feem kaum uas peb them los pab cov neeg hauv lub ntiaj teb no thiab nyob mus ib txhis.
Los ntawm Nws cov tub qhe uas muaj cai, Nws ua tib zoo siv cov nyiaj ib feem kaum. Tus them ib feem kaum pab tus Tswv txhim tsa cov tuam tsev, uas muab tej tsev neeg sib khi ua ke nyob mus ib txhis. Tus them ib feem kaum pab Nws xa txoj moo zoo mus rau cov neeg nyob txhua qhov txhia chaw. Tus them ib feem kaum pab Nws pub cov neeg tshaib plab thiab cov uas raug kev txom nyem raws li Nws cov tub qhe pom tias yuav pab li cas. Cov tub qhe ntawd ib tug twg yuav qhia tau nej saib muaj kev hlub ntau dua vim yog siv cov nyiaj ib feem kaum pab foom koob hmoov rau lwm tus neeg. Thiab tus uas rau rau siab them ib feem kaum yuav qhia tau li no thiab.
Lub sij hawm sib hais haum txog txoj kev them ib feem kaum tseem nyob ob peb lub hli tom ntej. Kuv thov Vajtswv kom nej thiab nej tsev neeg yuav pib tam sim no kom khwv tswv yim thiab npaj ua ib lub neej uas tsim nyog txais tej koob hmoov uas Vajtswv nchuav los rau tag nrho lawv cov uas hais tau rau Nws hais tias lawv them ib feem kaum tag nrho.
© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais First Presidency Message, June 2011. Hmong. 09766 295
Qhia los ntawm tsab Xov No
-
Qee zaum qhov kev qhia ib txoj ntsiab cai twg zoo tshaj yog kom ua rau sawv daws tau pom (saib Teaching, No Greater Call [1999], 164). Xav saib puas tsim nyog hais kom tsev neeg ib tug neeg ua kom sawv daws tau pom ib feem kaum yog npaum li cas. Nws ua kom sawv daws tau pom thaum nws muab ib yam tshem tawm ntawm kaum yam. Kom thiaj xaus lus, xav saib puas tsim nyog caw tsev neeg ib tug neeg los qhia saib yus ua li cas sau ntawv rau ib daim ntawv them nyiaj ib feem kaum.
-
“Cov neeg uas nej qhia yuav tau kev pab los ntawm qhov uas sawv daws sib koom kawm” (Teaching, No Greater Call, 63). Caw tsev neeg los qhia saib lawv xav hais tias Thawj Tswj Hwm Eyring txhais li cas thaum nws hais tias “xav saib peb yuav tsum xav li cas es thiaj li txais tau lub txiaj ntsim ntawm txoj sia nyob mus ib txhis.” Xav saib puas tsim nyog sib tham txog peb txoj kev uas txoj kev them ib feem kaum npaj peb xav tej yam uas peb yuav tsum xav hauv nruab siab kom thiaj txais tau Vajtswv tej koob hmoov.