O Mea Uma e Mafai ona Ou Tuuina Atu

Sa ou popole pe o le a faapefea ona ou totogiina mea na ou manao e fai i le taimi o le taumafanafana: vasega, mafutaga faaleaoaoga, tolauapiga i le taumafanafana, ma isi lava mea. Sa ou faapea o le a ou tagi. Ona ou manatuaina lea o mea uma lava na aoaoina ai au e uiga i le faalagolago ma le faatuatua i le Alii. Sa ou filifili e tuu atu lea tulaga i aao o le Alii ma faalagolago afai o Lona finagalo lea, o le a Ia saunia se auala.

I se taimi e lei mamao mulimuli ane, na maua ai e lo’u tina se siaki e le’i talaina mai se galuega sa ou faia i le amataga o lena tausaga, ma o le aso lava na sosoo ai sa ou maua ai se faailoga tinoitupe laitiiti mai le meli i le tu lua i se tauvaga. O se molimau maoae lea ia te au o loo soifua le Atua, ma e alofa ma popole o Ia ia te au.

Sa faatumulia au i le agaga faafetai ma le alofa mo lo’u Tama Faalelagi ma le Faaola. Sa matuai ou lagonaina le fiafia! Sa ou naunau lava e faaali atu lo’u agaga faafetai, e vivii atu i le Atua i le mea sili ou te mafaia, ma faasoa atu lena lagona. Sa faia e nisi lenei tulaga i le fatuina o se pese, tusia o se solo, po o le valiina o se ata, ae na ou lagona lou le agavaa e faia soo se mea o na mea. Sa ou iloaina e pau lava le mea e mafai ona ou tuuina atu e avea ma se viiga talafeagai o lou ola lea—ina ia fai “ma faaaoao i e ua faatuatua” (1 Timoteo 4:12), ia tuu atu lou ola ia Keriso. Pau lava lena o le mea o loo Ia finagalo ai, ma e pau foi lena o le mea e mafai ona ou tuuina atu.