O Mai i le Malumalu ma Maua o Outou Faamanuiaga

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Uso e, ua matua faamanuiaina i tatou. O le Faaola e tu i le ulu o lenei Ekalesia. O loo taitaiina i tatou e perofeta soifua. Ua tatou maua tusitusiga paia. Ma e tele malumalu paia i le lalolagi atoa e mafai ona tatou maua ai sauniga e manaomia e fesoasoani i lo tatou toe foi atu i lo tatou Tama Faalelagi.

Tatou te o muamua i le malumalu mo i tatou lava. “O le faamoemoega autu o le malumalu,” na faamalamalama mai e Elder Robert D. Hales o le Korama a Aposetolo e Toasefululua, “o le tuuina mai lea o sauniga e manaomia mo lo tatou faaeaga i le malo selesitila. O sauniga o le malumalu e taitaiina atu ai i tatou i lo tatou Faaola ma tatou maua ai faamanuiaga lea e oo mai ia i tatou e ala i le Togiola a Iesu Keriso. O malumalu o iunivesite aupito sili ia o le aoaoga ua iloa e tagata, ua tuuina mai ai ia i tatou le malamalama ma le poto e uiga i le Foafoaga o le lalolagi. O aoaoga o faaeega paia e aumaia ai le taitaiga i le ala e tatau ona taitaiina ai o tatou olaga iinei i le olaga i le tino. … O le sauniga e i ai se faagasologa o aoaoga i le ala e tatau ona tatou ola ai ma feagaiga tatou te osia ina ia ola amiotonu ai e ala i le mulimuli i lo tatou Faaola.”¹

Peitai, e le gata ai iina la tatou auaunaga i le malumalu. Na aoao mai Peresitene Boyd K. Packer, Peresitene o le Korama a Aposetolo e Toasefululua: “O iina tou te faamanatu ai feagaiga ua outou osia, a o avea outou ma sui o se tasi ua maliu. O le a outou faamautuina ai i o outou mafaufau ia faamanuiaga silisili faaleagaga e faatatau i le maota o le Alii. … O le totonugalemu o feagaiga ma sauniga o loo i ai faamanuiaga e mafai ona outou maua i totonu o le malumalu paia.”²

O mai i le malumalu ma toe o mai. O le osia ma le tausia o feagaiga o le malumalu o le a taitaiina atu ai i tatou i le faamanuiaga pito i sili o faamanuiaga uma lava o le—ola e faavavau.

Barbara Thompson, fesoasoani lua i le au peresitene aoao o le Aualofa.

Mai Tusitusiga Paia

Isaia 2:3; 1 Korinito 11:11; Faaaliga 7:13–15; Mataupu Faavae ma Feagaiga 109

Mai lo Tatou Talafaasolopito

Sa masani lava ona saunoa atu le Perofeta o Iosefa i tamaitai o le Aualofa i a latou sauniga. A o fausiaina le Malumalu o Navu, na aoaoina e le Perofeta ia tamaitai i aoaoga faavae, ma saunia i latou ina ia maua le malamalama atili e uiga i sauniga o le malumalu. I le 1842 na ia faapea atu ai ia Mercy Fielding Thompson o le faaeega paia “o le a aumaia ai oe mai le pouliuli i le malamalama matagofie.”³

E tusa ma le 6,000 tagata o le Au Paia o Aso e Gata Ai na mauaina ia sauniga o le malumalu a o lei amataina le malaga tele mai Navu. Na saunoa Peresitene Polika Iaga (1801–77), “O lena le naunautaiga e pei ona molimauina e le Au Paia ina ia maua sauniga [o le malumalu], ma o lo matou naunautaiga foi lena ia i matou, ina ia faataunuuina ia sauniga mo i latou, o lea sa ou tuuina atu ai au atoa i le galuega a le Alii i le Malumalu i le po ma le ao, e le sili atu i le fa itula e moe ai, i lona averesi, i le aso, ma alu i le fale tai tasi i le vaiaso.”⁴ O le malosi ma le mana o feagaiga o le malumalu na faaauupegaina ai le Au Paia a o latou tuua lo latou nuu ma le malumalu mo se malaga e le mailoa.

Ata na tusia e Athley Glori