I le Aoao o le Ekalesia
O Laau Su’isu’i ua Totō ai le Faalagolago o le Tagata ia te Ia Lava
O le foaiina atu e le Ekalesia o laau su’isu’i e 50 i le Matagaluega o le Uelefea mo Tagata Lautele o Fiti i le 2010, ma se foai o loo loma mo le isi 50, ua faapea ona faateleina ai le ola faalagolago o le tagata ia te ia lava, faapea avanoa faigaluega mo tamaitai o loo nonofo i nuu maotua o Fiti.
O foai a tagata o le Ekalesia i le tupe mo galuega alofa ua mafai ai e le Ekalesia ona taulimaina nei manaoga i le lalolagi atoa i galuega faatino e pei o le foai o laau su’isu’i. E galulue vavalalata sui o le Ekalesia ma taitai o nuu ma le malo ia malamalama i tulaga o le lotoifale ma aloa’ia manaoga o tagata o le lotoifale.
“Matou te faia lenei mea ma galuega faatino e pei o lenei aua o i matou o soo o Iesu Keriso,” o le saunoaga lea a Elder Taniela B. Wakolo, Fitugafulu Eria, i se faatalanoaga ma le nusipepa o le Fiji Times. “O lo matou faatuatua e taitai atu ai i matou e … fai mea lelei i le lalolagi.”
Ua Maua e se Tagata Iapani o le Ekalesia se Taui
I le aso 9 o Novema, 2010, i le fa masina ao le’i tupu le mafuie faatafuna i Iapani, na maua ai e Yoji Sugiyama, o se tasi o le Siteki a Fujisawa Iapani, se vaega faaleogalua o le Faatulagaga o le ‘Oa Paia [Order of the Sacred Treasure] mo lana tautua tauleleia i lona atunuu.
I le avea ai o se tasi o le Matagaluega o le Va-i-Fafo mo le tele o tausaga, sa matuai punouai ai Uso Sugiyama i le faiga o feutagaiga o maliliega a o avea o se amepasa mo Iapani.
Ua silafia e Uso Sugiyama e tuuina mai e le Alii ia i tatou uma ni avanoa e fai ai ni mea lelei i o tatou lava siosiomaga. Fai mai a ia, “O nisi taimi e tuuina mai ai e le Alii ia faigata ina ia mafai ai ona tatou maua mea tatou te manaomia. A aunoa ma na mea e tatau ai ma le avanoa e maua ai ni fofō lelei, o le a le alualu i luma tagata ma lē aumaia ai se fiafia i lenei lalolagi.”
Tuuina Atu e Galuega Alofa a le Au Paia o Aso e Gata Ai ni Vai Mama
Toeitiiti piliona tagata o le lalolagi e le mafai ona maua ni vai mama, lea e masani ona iu ai ina maua faama’i e pei o le kolela, manavatatā, ma le taifoi. Ae talu mai le 2002, ua fesoasoani atu ai le Ekalesia i tagata e fitu miliona i le silia ma le 5,000 o alalafaga ia maua ni punavai o vai mama. O le vitio O Le Suavai o le Fiafia Lea, o loo maua i le Igilisi i le news.lds.org, o loo faaalia ai se tala i le auina atu e Galuega Alofa a le AAG o le vai mama i se afioaga i Sierra Leone.