O Aai e Lua ma se Alofa Mutimutivale

E pei foi o Navu, Ilinoi, o le aai o Natchez, Misisipi, ISA, e tu matilatila i luga o se papa lautele e iloa atu ai le Vaitafe o Misisipi. O tagata anamua o le Au Paia o Aso e Gata Ai e o mai mai Egelani e tele lava ina ui atu i Natchez e agai atu i le mata o le vai mai New Orleans i Navu. O le mea moni, i le 1844 sa susunuina ai e tagata faatupu faalavelave se vaa na taula i Natchez lea sa malaga ai se vaega o tagata o le Au Paia o Aso e Gata Ai.

Ina ua ou taunuu i Natchez e talia se galuega i le Tautua a le U.S. National Park sa ou mafaufau ai i faaletonu ma atuatuvalega. Sa ou tuua mea uma na ou fiafia ma ou masani ai i Iuta, ma ina ua ou nofo i lenei aai fou ou te le masani ai, sa ou lagona le le mautonu ma le tuua toatasi.

I lo’u aso muamua lava o aoaoga faamasani, sa amata e le taitai e vaaia le paka la’u aoaoga i le aveina atu o au i le fale tele o le vaitaimi o le Taua i le Lotoifale ma faataitai mai le ituaiga maimoaga taamilo o le a le toe umi ae ou faatinoina. Na oo atu i le taimi ua maea ai ona ma matamata i le fogafale muamua, ua le mafai ona ou manatuaina ia faatamatalaga uma. E amata mai i meaafale teuteu ua toe faafou mai Farani e oo atu i ipu omea mai Egelani, o le fale taugata ua faatusaina i ai le manuia o le itu i Saute—na matuai lofituina ai a’u. O le iloaina ma te le’i oo i le fogafale lua o le fale, na oo mai ai ia te a’u i se lagona o le le fiafia ma le toe fia foi i le aiga.

Ao ma a’ea’e atu i le faasitepu matagofie, sa tosina atu la’u vaai i se atavali suauu o se taulaga. Ou te le’i vaai muamua i ai, ae na i ai se vaaiga masani e uiga i ai. Na tatai atu ou mata i le ata o se fale tele i luga o le papa lautele o le aai, ma sa ou matauina ai le pioga tele lea na faia faataamilo e le vaitafe i le aai. Mata o le mea tonu lea sa o’u mafaufau i ai?

Sa ou fesili po o le atavali o se ata lea o Navu. Sa te’i lo’u supavaisa i la’u fesili, ma tali mai o lea lava. Sa vave ona ou iloaina, o le atavali sa faatau mai e se tasi na umia mulimuli le fale, ona sa faapea na valiina i le ogatotonu o le seneturi lona 19 ma o le vaaiga i le vaitafe na talafeagai lelei lava ma le vaaiga i Natchez.

E masalo na lagona e le Au Paia o e na ui atu i Natchez i le ogatotonu o sauaga se lagona maoae o le toomaga ma le agaga faafetai ina ua latou taunuu i Navu. Na faapena foi, ona ou lagonaina le mafanafana ina ua ou vaai i le ata o Navu i le fale tele i Natchez. O lo’u vaaia o le ata na fesoasoani lea ia te ia ou te iloa ai sa silafia e le Tama Faalelagi o’u tulaga ma o le a faamanuiaina au i le malosi e foia ai lo’u misia o lo’u aiga, fefe, ma le le mautonu. Sa ou iloa o le atavali o Navu o se alofa mutimutivale lea o le Alii.