Stanap long Ol Tabu Ples

Ol brata mo sista blong mi we mi lavem. Yumi harem ol spesel mesej long moning ia, mo mi presem wanwan we i tekpat. Yumi speseli glad blong gat Elda Robet D. Hels wetem yumi bakegen mo i harem gud bakegen. Mifala i lavem yu, Bob.

Taem mi stap tingting hevi long wanem blong talem long yufala long moning ia, mi filim blong serem sam tingting mo filing we mi ting se i impoten mo i stret taem. Mi prea se Spirit bae i lidim mi long toktok blong mi.

Mi bin laef long wol ia blong 84 yia nao. Blong yufala i luk smol, mi bon long sem yia ia we Jals Linbeg i flae long fas wanman nonstop flaet stat long Niu Yok i go long Paris, long wan plen we i gat wan set blong wing nomo wetem wan enjin mo wan jea. Plante samting i jenis long ol las 84 yia. Man i bin go kasem mun mo kambak. I tru, tingting blong saens blong yestedei, i kamtru tedei. Mo samting ia we i kamtru, hem i tru long teknoloji blong taem blong yumi, we i jenis kwiktaem mo yumi no save ron kwiktaem semmak wetem—o yumi no save mekem nating. Long olgeta long yumi we i tingbaot taem ia blong tanem namba long fon, mo ol han taepraeta, teknoloji blong tedei, i moa gud evriwan.

Wanem i jenis kwik tu, hem i kampas blong fasin blong sosaeti. Ol fasin, we bifo oli luk se i no stret mo i fasin nogud, tedei, oli sarem ae long hem, be tu, plante moa oli stap akseptem.

I no longtaem i pas, mi ridim long Wall Street Journal (Wol strit Niuspepa), wan atikol we i kam long Jonatan Saks, Jif Rabae blong Inglan. Wetem sam moa samting, hem i raetem—mo mi kwot: “Klosap long evri sosaeti long Wes, long yia 1960, i bin gat wan jenis blong fasin; oli livim wan ful standet blong tradisen blong holem taet olgeta. Wanem yu nidim, we Bitel grup i singim, i lav. Jiu-Kristin standet blong fasin i bin lus. Long ples blong hem, i gat: [Do] whatever works for you (Mekem wanem we i stret long yu). Ol Ten Komanmen, oli raetem bakegen i kam Ol Ten Niufala Tingting.”

Rabae Saks i gohed blong komplen:

“Yumi bin spendem ol stamba blong fasin long nogud wei semmak olsem yumi bin spendem mane blong yumi. …

“I gat ol bigfala ples long wol we relijin i wan samting blong bifo mo i no gat voes i tok agensem kalja blong pem samting, blong spendem mane, blong werem flas klos, mo blong soemaot yu from se yu nidim. Mesej blong tedei, i we, gud fasin hem i blong bifo, tingting hem i blong ol pipol we oli no save stanap strong, mo komanmen we i moa impoten i ‘Oli no mas faenem yu.’”¹

Ol brata mo sista blong mi. Hemia—sore tumas—i tokbaot plante, wol we i stap raon long yumi. Olsem wanem? Bae yumi saksakem han blong givap mo askem yumiwan olsem wanem nao bae yumi laef long wan kaen wol olsem? No. From we yumi gat, insaed long laef blong yumi, gospel ia blong Jisas Kraes; mo yumi save se gud fasin i no blong bifo, se tingting blong yumi i stap blong i lidim yumi, mo yumi responsibol long ol aksen blong yumi.

Nomata wol i jenis, ol loa blong God oli stap oltaem. Oli no jenis; bae oli no jenis. Ol Ten Komanmen oli stap olsem—ol komanmen. Oli no ol tingting. Yumi nidim evriwan tedei olsem long taem we God i bin givim olgeta long ol pikinini blong Isrel. Be, sapos yumi lisin, bae yumi harem saon blong voes blong God we i stap toktok long yumi long ples ia mo naoia:

“Bambae yufala i no mas mekem wosip long narafala god.

“Bae yufala i no mas mekem pikja blong wan samting … blong wosip long hem. …

“Bambae yufala i no yusum nem blong mi long fasin we i no ona long mi, from we mi mi Hae God, mi God blong yufala. …

“Bambae yufala i mas tinghevi long Sabat dei, blong holem i tabu. …

“Bambae yufala i mas ona long papa mo mama blong yufala. …

“Bambae yufala i no mas kilim man i ded.

“[Bambae yufala we i mared i no mas go slip wetem narafala man o woman.]

“Bambae yufala i no mas stil.

“Bambae yufala i no mas giaman blong mekem poen agens long narafala man. …

“Bambae yufala i no mas letem tingting blong yufala i stap long ol samting blong narafala man blong tekem i blong yufala.”²

Standet blong fasin blong yumi i stap oltaem; i no blong tantanem. I no stap nomo long Ol Ten Komanmen, be tu, long Toktok Antap long Hil, we Sevya i givim long yumi taem Hem i bin kam long wol. I stap tu long ful tijing blong Hem. Hem i stap long ol toktok blong revelesen blong tedei.

Papa blong yumi long Heven i semmak yestedei, tedei mo blong oltaem. Profet Momon i talem long yumi se God i no jenis, stat long taem we i no save finis i go kasem evri taem we i no save finis.³ Long wol ia we klosap evri samting i stap jenis, fasin blong Hem blong stap semmak oltaem i wan samting we yumi save dipen long hem, mo fas long hem blong holemtaet mo stap sef, nogud oli swipim yumi i go long sam kaen wota.

Ating yu luk se samtaem, olgeta long wol ia oli gat moa gud taem bitim yu. Sam long yufala i filim se i gat limit from ol standet blong fasin we Jos i stap folem. Ol brata mo sista blong mi, mi talem long yufala, se i no gat wan samting nating we i save givim moa glad long laef blong yufala o moa pis long sol blong yufala bitim Spirit we i kam long yumi taem yumi folem Sevya mo kipim ol komanmen. Spirit ia i no save stap long ol kaen aktiviti we plante long wol ia oli stap tekpat long hem. Aposol Pol i talem trutok ia: “Be man we Tabu Spirit ya i no stap long hem, hemi no save kasem ol paoa ya we Tabu Spirit i stap givim. Hemi no gat rod blong save ol samting ya, i stap luk olgeta olsem we oli krangke samting nomo, from we Tabu Spirit nomo i save mekem man i save ol paoa ya we hemi stap givim.”⁴ Toktok ia, man we Tabu Spirit i no stap long hem, i save tokbaot eniwan long yumi sapos yumi letem i hapen olsem.

Yumi mas lukaotgud long wan wol we i muvaot plante long wanem we i long saed blong spirit. Hem i nid blong yumi sakemaot eni samting we i no go stret wetem ol standet blong yumi, mo yumi no mas wantem blong givap long samting we yumi wantem moa: laef we i no save finis insaed long Kingdom blong God. Ol strong win bae oli bang long doa blong yumi wanwan taem, from we oli wan pat we yumi no save ronwe long hem long laef ia. Be, bae yumi gat moa paoa blong fesem olgeta, blong lanem samting aot long olgeta, mo blong winim olgeta sapos yumi gat gospel olsem fandesen mo lav blong Sevya long hat blong yumi. Profet Aesea i talem, “Mo frut blong ol stret fasin ya, man i stap olwe long pis, mo oli stap kwaet, oli stap gud, mo oli stap trastem Hae God.”⁵

Olsem wan wei blong stap insaed long wol be i no blong wol ia, hem i nid blong yumi toktok wetem Papa blong yumi long Heven tru long prea. Hem i wantem yumi blong mekem; Bae Hem i ansa long prea blong yumi. Sevya i bin askem yumi olsem i stap long 3 Nifae 18, blong “mas lukaot gud mo prea oltaem from fraet se yufala i stat blong foldaon long temtesen; from Setan i wantem blong holem taet yufala. …

“Taswe nao, yufala i mas prea oltaem long Papa long nem blong mi;

“Mo eni samting we bae yufala i askem long Papa long nem blong mi we i raet, mo bilivim se bae yufala i kasem, luk bae i givim long yufala.”⁶

Mi bin kasem testemoni blong mi abaot paoa blong prea taem mi gat samples 12 yia. Mi bin wokhad blong kasem sam mane mo mi bin hadwok blong sevem faef dola. Hemia long taem blong Bigfala Hadtaem blong Mane, taem faef dola i wan bigfala mane—speseli long wan boe blong 12 yia. Mi bin givim evri koen blong mi we i totol blong faef dola, i go long papa blong mi, mo hem i givim mi wan pepa mane blong 5 dola. Mi save se i gat wan spesel samting we mi plan blong pem wetem faef dola ia, nomata se plante yia afta mi nomo tingbaot se wanem. Mi jes tingbaot se mane ia i impoten long mi.

Long taem ia, mifala i no gat wan masin blong was, mekem se mama bae i sendem klos evri wik long ples blong was, blong oli wasem. Afta tu dei, wanem mifala i singaotem “wetwet was” bae i kambak long mifala, mo Mama bae i hangem ol klos long laenklos long bak blong haos blong oli drae.

Mi bin fulmap faef dola pepa mane blong mi long paket blong jin traoses, mo olsem we yufala i ting, oli sendem jin traoses blong mi wetem mane i go long ples blong was. Taem mi luksave wanem i hapen, mi sik wetem wari. Mi save se oli stap jekem ol paket long ples blong was bifo oli wasem. Sapos oli no faenem mo tekemaot, bae i sua nomo se mane bae i kamaot mo wan wokman bae i karem from hem i no save se i blong hu blong givimbak sapos hem i gat tingting olsem. Ol janis blong mi karembak faef dola i smol nomo—mo hemia mama i konfemem taem mi talem long hem se mi livim mane long paket blong mi.

Mi bin wantem mane ia; mi nidim mane ia; mi bin wokhad tumas blong winim mane ia. Mi luksave se i gat wan samting nomo mi save mekem. Long bigfala wari blong mi, mi tanem mi long Papa we i stap long Heven mo askem hem blong kipim mane blong mi i sef long paket ia kasem wetwet was blong mifala i kambak.

Tu longfala dei afta, taem mi save se i taem blong trak i karem klos i kambak, mi sidaon long windo, mi wet. Taem trak i tanem long kona i kam, hat blong mi i pam kwik. Taem wetwet klos i kam insaed long haos, mi holem jin traoses mo ron i go long bedrum blong mi. Mi pusum han long paket mo han i seksek. Taem mi faenem se i no gat wan samting, mi ting se evri samting i lus. Mo afta, fingga blong mi i tajem wetwet faef dola pepa mane ia. Taem mi pulumaot long paket, gladhat i kavremap mi. Mi talem wan prea blong tangkyu long Papa blong mi we i stap long Heven, from we mi bin save se Hem i bin ansarem prea blong mi.

Stat long taem ia, mi bin gat plante prea we i gat ansa. I no gat wan dei we i pas we mi no toktok wetem Papa blong mi we i stap long Heven tru long prea. Hem i wan rilesensip we mi stap holemtaet—sapos no bae mi lus sapos mi no mekem. Sapos yu no gat naoia wan rilesensip olsem wetem Papa we i stap long heven, mi askem strong long yu blong wok from gol ia. Taem yu stap mekem olsem, bae yu gat raet blong kasem insperesen mo daereksen long laef blong yu—ol samting yumi nidim sapos yumi laef long saed blong spirit long taem blong taem blong yumi long wol ia. Insperesen mo daereksen ia oli ol presen we Hem i givim fri sapos yumi lukaotem olgeta. Oli ol rij samting!

Oltaem tingting i stap daon mo i talem tangkyu taem Papa blong yumi long Heven i toktok wetem mi tru long insperesen. Mi bin lanem blong luksave hemia, blong trastem, mo blong folem. Plante plante taem, mi bin kasem insperesen. Wan bigfala taem i bin tekem ples long Ogis 1987 long taem blong dedikesen blong Frankfet Jemani Tempol. Presiden Esra Taf Benson i bin stap wetem mifala long fas dei o tu blong dedikesen be i bin gobak hom, mekem se i janis blong mi blong kondaktem ol sesen we i stap.

Long Satedei, mifala i gat wan sesen blong ol memba blong Nedalan we oli bin stap long Frankfet Tempol distrik. Mi bin savegud wan long ol gudfala lida blong Nedelan, Brata Pita Murik. Jes bifo long sesen, mi bin gat strong filing se bae mi singaotem Brata Murik blong toktok long ol memba blong Nedalan long taem blong sesen ia, mo i tru, hem i mas fas spika. Mi no bin luk hem long tempol long moning, nao mi pasem wan not i go long Elda Karlos E. Asei, Eria Presiden blong mifala, mo askem sapos Pita Murik i bin stap long sesen. Jes bifo mi stanap blong statem sesen, mi kasem wan not i kambak long Elda Asei we i talem se Brata Murik i no stap, se hem i gat wan nara samting blong mekem, mo hem i plan nomo blong kam long dedikesen sesen long tempol long nekis dei wetem ol stek blong ol ami memba.

Taem mi stanap long pulpit blong welkamem ol pipol mo talem program, mi kasem wan insperesen we mi no save mistek, se mi mas anaonsem Pita Murik olsem fas spika. Hemia i agensem evri nara filing blong mi, from we mi jes harem Elda Asei i talem se Brata Murik i no stap nating insaed long tempol. Mi trastem insperesen, mo anaonsem kwaea presentesen, prea, mo talem se fas spika bae i Brata Pita Murik.

Taem mi gobak long jea blong mi, mi sakem ae i go long Elda Asei mo luk se ae blong hem i open bigwan. Samtaem afta, hem i talem se taem mi anaonsem Brata Murik olsem fas spika, hem i no save bilivim nating. Hem i talem se hem i save se mi kasem not blong hem mo mi bin ridim, mo i no andastanem from wanem mi anaonsem Brata Murik olsem wan spika, we mi save se hem i no stap eni ples insaed long tempol.

Long taem we samting ia i stap tekem ples, Pita Murik i bin stap long wan miting long eria ofis long Portstras. Taem miting i stap gohed, wantaem nomo hem i tanem hem i go long Elda Hoks, we i Rijin Ripresentetiv, mo askem: “Bae yu tekem hamas minit blong draevem mi, i go long tempol?”

Elda Hoks, we oli save se hem i stap draev i spid long smol spot trak blong hem, i ansa: “Mi save draevem yu go longwe long 10 minit! Be, from wanem yu nidim blong go long tempol?”

Brata Murik i talem se hem i no save from wanem hem i nid blong go long tempol be hem i save nomo se hem i mas go. Tufala i aot i go long tempol wantaem nomo.

Long taem blong naesfala kwaea namba, mi lukluk raon, mi ting se eni taem bae mi luk Pita Murik. Mi no luk. Be, mi stap kwaet nomo. Mi gat wan swit filing blong pis we evri samting bae i oraet.

Brata Murik i bin kam long do long fored blong tempol stret long taem we fas prea i finis, i no save yet from wanem hem i kam. Taem hem i hariap i kamdaon, hem i luk pikja blong mi long skrin mo i harem mi mi anaonsem, “Naoia, bae yumi harem Brata Pita Murik.”

Long bigfala sapraes blong Elda Asei, Pita Murik i wokbaot kwiktaem i kam long rum mo tekem ples blong hem long pulpit.

Afta long sesen, Brata Murik mo mi i bin storian long wanem i bin tekem ples long wanem i bin hapen bifo hem i toktok. Mi bin tinghevi long insperesen we i kam long dei ia, i no long miwan, be tu, long Brata Pita Murik. Gudfala eksperiens ia i givim wan witnes we mi no save tanem baksaed long hem se hem i impoten blong stap klin inaf blong kasem insperesen olsem mo trastem insperesen ia—mo folem—taem hem i kam. Mi save, mo mi no gat kwestin, se Lod i wantem blong olgeta we oli stap long sesen ia long Frankfet Tempol dedikesen blong harem ol toktok blong paoa mo strong testemoni blong wokman blong Hem, Brata Pita Murik.

Ol brata mo sista we mi lavem, komunikesen wetem Papa blong yumi long Heven—we i tekem ol prea blong yumi i go long Hem mo insperesen blong Hem i kam long yumi—yumi nidim blong yumi fesem ol strong win mo tes blong laef. Lod i invaetem yumi blong kam kolosap long Hem mo bambae Hem i kam kolosap long yumi; lukaotem Hem wetem strong tingting mo bambae yumi faenem Hem.⁷ Taem yumi mekem olsem, bae yumi filim Spirit blong Hem long laef blong yumi, mo i givim yumi tingting blong wantem mo strong paoa long tingting blong stanap strong mo stret long stret mo gud fasin—blong stanap long ol tabu ples mo no muv.⁸

Taem ol win blong jenis oli swing raon long yumi mo tred blong fasin blong sosaeti i gohed blong golus long fored blong ae blong yumi, bae yumi tingbaot bigfala promes blong Lod long olgeta we oli trastem Hem: “Yufala i no fraet! Mi mi stap wetem yufala! Mi mi God blong yufala! Yufala i no seksek! Mi bambae mi mekem yufala i strong! Mi bambae mi givhan long yufala! Mi bambae mi blokemgud yufala, mi sevem yufala.”⁹

Hemia i wan gudfala promes! Blong hemia i blesing blong yumi, mi prea olsem wetem tru hat blong mi, long tabu nem blong Lod mo Sevya blong yumi, Jisas Kraes, amen.