Yu Minim Wan Samting long Hem

Moa yumi lanem abaot yunives, moa yumi andastanem—wan smol pat—long wanem Moses i bin save. Yunives i bigwan tumas, i gat sikret, mo i gat glori mekem se i no posibol blong man i andastanem. God i bin talem long Moses se Hem i bin krietem ol wol we i plante tumas we i no save kaontem.³ Ol fulap samting we oli stap long skae long naet, oli wan naes testemoni blong trutok ia.

I gat sam samting we oli bin fulumap mi wetem sapraes we win blong mi i sot long hem, taem mi stap flae long blak blong naet krosem ol bigfala solwota mo ol graon mo lukluk aotsaed long windo blong plen i go long bigbigfala glori blong plante milian sta.

Ol man blong stadi long spes, oli bin traem blong kaontem namba blong ol sta long yunives. Wan grup blong ol man blong saens i talem se namba blong ol sta we masin blong yumi i kasem i 10 taem moa bitim evri smolsmol sid blong sanbij long evri sanbij mo draeples blong wol.⁴

Risal ia i stret wantaem wetem toktok blong profet blong bifo, Inok, we i talem se nomata sapos i posibol blong man i save nambarem ol smosmol pisis blong wol, yes, plante milian blong ol wol olsem, bae hemia i no iven stat blong namba blong ol kriesen blong God.⁵

From we ol kriesen blong God oli bigbigwan tumas, i no wan sapraes se bigfala King Benjamin i givim advaes ia long ol pipol blong hem blong “holem taet long tingting oltaem, se God i gat bigfala paoa, mo se yufala i nating nomo.”⁶

Be nomata we man i nating nomo, i mekem mi, mi tingting bigwan wetem sapraes mo kwestin blong ting se praes blong wan sol i bigwan long ae blong God.⁷

Mo yumi save luk long bigfala ples blong yunives mo talem, “Man i wanem sapos yu komperem hem wetem glori blong kriesen?” God Hemwan i bin talem se, yumi nao, yumi risen from wanem Hem i bin krietem yunives. Wok mo glori blong Hem—stamba tingting biaen long bigfala yunives ia—i blong sevem mo mekem man i kam olsem wan god.⁸ Long nara toktok, bigbigfala ples blong taem we i no save finis, ol glori mo ol sikret blong bigbigfala spes ia mo taem, Hem i bildim blong gud blong ol smol man blong wol olsem yu mo mi. Papa blong yumi long Heven i bin krietem yunives blong mekem se yumi kasem ful paoa blong yumi olsem ol boe mo gel blong Hem.

I gat wan samting we i no go tugeta wetem man: sapos yumi komperem long God, man i nating nomo; be yet, yumi minim evri samting long Hem. Taem yumi stanap long fored blong bigfala kriesen, yumi olsem nating nomo, be yumi gat smol laet blong faea we i no save finis insaed long jes blong yumi. Yumi gat promes we yumi no andastanem, blong kam olsem wan god—ol wol we oli no gat en—we oli stap long han blong yumi. Mo hem i wanem we God i wantem tumas, blong helpem yumi blong kasem olgeta samting ia.

Bigfala man blong giaman i save se wan long ol gudfala tul blong hem, i blong lidim ol pikinini blong God oli go rong, i blong stikim ol samting we i no go tugeta long saed blong man. Long sam, hem i pulum olgeta long ol fasin blong gat hae tingting, i tokbaot olgeta bigwan mo i leftemap tingting blong olgeta blong biliv se olgeta nomo oli impoten mo man i no save winim olgeta. Hem i talem olgeta se oli hae moa bitim man olbaot mo from wanem oli save mekem, from raet blong laen blong olgeta, o from ples blong ol long sosaeti, nao oli setem olgeta apat long wanem i nomol raon long olgeta. Hem i lidim olgeta blong mekem tingting se oli no nid blong folem rul blong eniwan, mo oli no nid blong wantem save long problem blong ol narafala man.

Ebraham Linkon, hem i laekem wan poem we i talem se:

Ol disaepol blong Jisas Kraes oli andastanem se, sapos yumi komperem long taem we i no save finis, laef blong yumi long wol ia i blong wan smol taem nomo long spes mo long taem.¹⁰ Oli save se tru praes blong wan man o woman i no go wetem wanem we wol i stap tingting long hem. Oli save se yu save hipimap evri mane blong ful wol, mo bae i no save pem wan ful bred long stoa blong heven.

Olgeta we oli “kasem kingdom blong God”¹¹ oli olgeta we oli kam olsem “wan pikinini we i stap lisin, no stap flas, i hambol, i save wet longtaem, i gat plante lav.”¹² From we man we hem nomo i stap leftemap hem. God bambae i mekem hem i stap daon, be man we i hambol, God bambae i leftemap hem.”¹³ Ol disaepol olsem oli andastanem se “taem we [oli] stap wok blong ol narafala man, [oli] stap mekem wok blong God blong [olgeta] nomo.”¹⁴

Wan nara wei we Setan i giaman long yumi i tru long fasin blong givap. Hem i traem blong mekem yumi lukluk nomo se yumi nating kasem taem yumi stat blong gat tu tingting long wanem i gud long yumi. Hem i talem long yumi se yumi smol tumas blong man i luk yumi, se oli fogetem yumi—speseli God.

Bae mi serem wetem yufala wan eksperiens blong mi we bae i save helpem olgeta we oli filim se oli nating, oli fogetem olgeta o oli stap olgetawan nomo.

Plante yia bifo, mi bin go long wan trening blong paelot long Ea Fos blong Yunaeted Stet. Mi bin longwe long hom, mi wan yang Wes Jemani soldia, we mi bin bon long Tsekoslovakia, we mi bin groap long Is Jemani; mo i had blong mi toktok gud Inglis. Mi tingbaot klia trip blong mi i go long ples blong trening long Teksas. Mi bin stap long plen, mi sidaon narasaed long wan pasenja we i toktok wetem hevi tiun blong Saot. Mi no save andastanem wan samting hem i talem. Mi stap askem miwan sapos oli bin tijim rong lanwis long mi. Mi bin fraet wetem tingting ia se bae mi kompit from ol top posisen blong trening blong paelot agensem ol studen we oli toktok gud Inglis.

Taem mi kasem ples blong trening long smol taon blong Big Spring, Teksas, mi lukaotem mo faenem Lata-Dei Sent branj, we i gat smol namba blong ol gud memba we oli stap mit long ol rum blong ples ia, mo oli rentem. Ol memba oli bin stap bildim wan smol mitinghaos we bae i stap olsem ples blong Jos. Long ol taem ia, ol memba oli mas wok blong bildim ol niu bilding.

Dei afta dei, mi go long paelot trening blong mi mo stadi had mo afta, mi spendem plante fri taem blong mi blong wok long niu mitinghaos. Long ples ia, mi lanem se wan tu-bae-fo i no wan step blong danis, be i wan pis wud. Mi bin lanem tu se impoten skil blong sevem laef taem yu mestem mo hamarem fingga be i no nel.

Mi spendem plante taem blong wok long mitinghaos mekem se branj presiden—we i wan long ol paelot tija tu—i talem se i gud mi spendem moa taem blong stadi.

Ol fren blong mi mo studen paelot fren oli bin gat tu ol fri taem aktiviti, nomata hem i sef blong talem se sam long ol aktiviti ia bae oli go stret wetem wanem i stap long pamflet ia, Blong Ol Yut Oli Kam Strong. Long saed blong mi, mi bin glad blong tekem wan aktiv pat long smol Teksas branj long Wes, mo praktisim ol niu skil blong kapenta, mo kam antap long Inglis blong mi taem mi stap mekem ol koling blong mi blong tij long kworom blong ol elda mo long Sandei Skul.

Long taem ia, Big Springs, nomata long nem blong hem, i wan smol ples we i nating mo man i no save. Plante taem, mi filim semmak abaot miwan—mi nating, man i no save mi, mo mi stap miwan. Nomata hemia, mi neva askem sapos Lod i bin fogetem mi o sapos bae Hem i save faenem mi long ples ia. Mi bin save se i nomata long Papa long Heven weaples mi stap long hem, wanem rank blong mi long paelot trening klas blong mi, o wanem nao koling blong mi long Jos. Wanem i impoten long Hem i we mi stap mekem bes mi save mekem, se hat blong mi i go long Hem, mo mi wantem helpem olgeta raon long mi. Mi bin save se sapos mi mekem bes we mi save mekem—evri samting bae i oraet.

Mo evri samting i bin oraet.¹⁵

Lod i no wantem save nating sapos yumi spendem dei blong yumi blong wok long ol gudfala ples o long ol nogud ples. Hem i save weaples yumi stap, nomata ples ia i simpol tumas. Bae Hem i yusum—long wei blong Hem mo from ol tabu tingting blong Hem—olgeta ia, we hat blong olgeta i stap long Hem.

God i save se sam long ol bigfala sol we oli bin laef, oli olgeta we bae oli neva kamaot long ol stori blong histri. Oli ol sol we oli gat blesing, oli hambol we oli mekem folem eksampol blong Sevya mo oli spendem dei blong laef blong olgeta blong mekem gud.¹⁶

Wan kapol olsem, mama mo papa blong wan fren blong mi, oli eksampol blong prinsipol ia long mi. Hasban i wok long wan ples blong wokem aean long Yuta. Long lanj taem, bae hem i tekem skripja blong hem o wan magasin blong Jos mo ridim. Taem ol nara wokman oli luk hemia, oli jikim hem mo jalenjem ol bilif blong hem. Taem oli mekem olsem, hem i toktok wetem olgeta wetem kaen fasin mo tras. Hem i no letem nogud fasin blong olgeta oli mekem hem i kros o i harem nogud.

Sam yia afta, wan long ol man we i stap jik i sik bigwan. Bifo hem i ded, hem i bin askem se hambol man ia i toktok long fenerol blong hem—mo hem i mekem.

Fetful memba blong Jos ia i no gat wan bigfala ples long sosaeti o i no rij, be paoa blong hem blong lidim tingting blong man i go kasem evriwan we oli save hem. Hem i bin ded long wan wok aksiden taem hem i stop blong helpem wan narafala wokman we i bin fas long sno.

Long sem yia ia, wido waef blong hem i mas gat operesen long bren, we i mekem se hem i nomo save wokbaot. Be ol pipol oli laekem blong kam spendem taem wetem hem from se hem i stap lisin. Hem i tingbaot. Hem i kea. Hem i no save raet, mekem se hem i lanem baehat ol telefon namba blong ol pikinini mo apu pikinini blong hem. Hem i laekem blong tingbaot ol betdei mo ol aniveseri.

Olgeta we oli visitim hem oli go wetem wan gud filing abaot laef mo abaot olgetawan. Oli filim lav blong hem. Oli save se hem i kea. Hem i neva komplen be hem i spendem ol dei blong hem blong blesem laef blong ol narafala. Wan long ol fren blong hem i talem se woman ia i wan long ol smol namba blong pipol we hem i save we i tru eksampol blong lav mo laef blong Jisas Kraes.

Kapol ia, bae i faswan blong talem se oli no impoten long wol ia. Be Lod i yusum wan skel we i defren long skel we wol i yusum blong skelem praes blong wan sol. Hem i save se kapol ia i fetful; Hem i lavem tufala. Aksen blong tufala i wan witnes we i laef, abaot strong fet blong tufala long Hem.

Ol gudfala brata mo sista blong mi, ating i tru se man i nating sapos yumi komperem hem long bigbigfala yunives. Long sam taem, yumi save filim se yumi nating, man i no luk yumi, yumi stap yumiwan o man i fogetem yumi. Be, tingbaot oltaem—yu mining samting long Hem! Sapos yu gat tu tingting long hemia, tingting long olgeta fo tabu prinsipol ia:

Faswan, God i lavem olgeta we oli gat tingting i stap daon, oli no flas, from we oli “hae moa, [oli] winim olgeta narafala man we God i King blong olgeta.”¹⁷

Sekenwan, Lod i trastem yumi, se yumi we yumi no strong mo yumi simpol bae yumi talemaot ful gospel blong Hem kasem evri en blong wol.¹⁸ Hem i jusum ol man we oli no strong blong kam fored mo brekemdaon olgeta we oli gat paoa mo oli strong,¹⁹ mo blong “mekem ol man we oli gat paoa,” oli sem.²⁰

Nambatri, nomata weaples yu stap long hem, nomata situesen blong yu i simpol, se wok blong yu i smol, paoa blong yu i smol, se yu olsem evriwan nomo, o se yu luk se koling blong yu i smol insaed long Jos, Papa long Heven i stap luk yu. Hem i lavem yu. Hem i save hambol hat blong yu mo ol aksen blong lav mo kaen fasin blong yu. Tugeta, oli stap olsem wan testemoni we i stap, abaot hamas yu stap tru mo yu gat fet.

Nambafo mo laswan, plis andastanem wanem we yu stap luk mo gotru long hem naoia i no wanem we bae i stap oltaem. Bae yu no filim se yu stap yuwan, harem nogud, soa, o wantem givap oltaem. Yumi gat fetful promes blong God se bae Hem i no fogetem, mo bae i no livim olgeta we hat blong olgeta i stap long Hem.²¹ Gat hop mo fet long promes ia. Lanem blong lavem Papa blong yu long Heven mo kam disaepol blong Hem long toktok mo long aksen.

Yu mas save se sapos yu holem taet, biliv long Hem, mo gohed blong stap fetful blong kipim ol komanmen, wan dei bae yu gat eksperiens long ol promes we Hem i talemaot long Aposol Pol: “God i putumgud plante samting oli rere finis blong ol man we oli lavem hem. Ol man oli no luk ol samting ya long ae blong olgeta, oli no harem tok blong olgea long sora blong olgeta, oli no tingbaot olgeta long tingting blong olgeta, be olgeta oli rere i stap.”²²

Ol brata mo sista, Man we i gat moa paoa long yunives i Papa blong spirit blong yu. Hem i save yu. Hem i lavem yu wetem wan lav we i stret evriwan.

God i luk yu, i no olsem wan man we i stap long wan smol planet we i laef blong smol taem—Hem i luk yu olsem pikinini blong Hem. Hem i luk yu olsem man o woman we i save mekem samting, olsem we oli mekem yu from. Hem i wantem yu blong save se yu gat mining long Hem.

Bae yumi biliv, trastem, mo stretem laef blong yumi i laen stret, blong yumi save andastanem tru praes mo paoa blong yumi. Bae yumi klin inaf blong kasem ol gudfala blesing we Papa long Heven i gat i stap blong yumi, hemia i prea blong mi long nem blong Pikinini blong Hem, we i Jisas Kraes, amen.