Ko ha Faʻahinga ʻAkau Kilisimasi Naʻe Kehe

Naʻe fiefia ʻa Kālosi he Kilisimasí. Naʻe ʻi ai ha meʻa foʻou ʻi hono ʻapí he taʻu ko ʻení. Naʻe fakapipiki ki he matapā lahí ha fuʻu ʻakau lahi naʻe ngaohi ʻaki e pepa ngingila lanumata.

Fineʻeiki, ko e hā ʻoku ʻai ai e fuʻu ʻakaú he matapaá?

Te tau fai ha meʻa ʻe kiʻi kehe ʻi he Kilisimasi ʻo e taʻu ní.

Ne fifili ʻa Kālosi pe ko e hā nai ha meʻa ʻe kehe. Naʻe fifili foki ki ai mo hono tuofefine ko ʻAlaselí, mo hono kiʻi tokoua ko Tiekó.

Naʻá ku ngaohi e ngaahi meʻa teuteu ko ʻení ʻaki ha pepa ke ʻai he fuʻu ʻakaú. Te tau tohiʻi he meʻa teuteú ha meʻa ʻo kau kia Sīsū ʻi he ʻaho takitaha pea fakapipiki ia he fuʻu ʻakaú. Ko ʻene aʻu pē ki he efiafi kimuʻa he Kilisimasí kuo fonu e fuʻu ʻakaú!

Naʻe saiʻia ʻa Kālosi he fakakaukau ko iá. Naʻe lele ʻa ʻAlaseli ki he ngaahi meʻa teuteú pea toʻo mai ha peni kulokula.

Naʻe papitaiso ʻa Sīsū.

Foʻi meʻa lelei ia. ʻE lava ke u tohiʻi naʻe fakahoko ʻe Sīsū ha ngaahi meʻa mana lahi?

Fakaʻofoʻofa ia. Fakatou tōtō atu hoʻomo fakakaukaú!

ʻI he pō kotoa pē hili e kai efiafí, naʻe ngaohi ʻe ʻAlaseli mo Kālosi ha meʻa teuteu ʻe taha ʻo ʻai ki he fuʻu ʻakaú. Naʻe tokoni ʻa Tieko ʻaki ʻene talaange ʻokú ne ʻofa ʻia Sīsū.

Ko ʻene faingataʻa pē ke na maʻu ha toe ngaahi fakakaukau, naʻá na sio ki he folofolá. Naʻe ʻikai ke ʻiloʻi ʻe Kālosi ia ne fuʻu lahi pehē e ngaahi veesi kau kia Sīsuú!

ʻI he efiafi kimuʻa he ʻaho Kilisimasí, naʻe fai ʻe he fāmilí ha ngaahi foʻi hiva mo lau e ngaahi meʻa teuteu kuo nau ʻai ki he fuʻu ʻakaú. Naʻe fiefia ʻa Kālosi he naʻá ne ʻilo ha meʻa lahi ʻaupito ʻo kau kia Sīsū. Naʻá ne ʻiloʻi kuó ne mateuteu atu ki he Kilisimasi ʻo e taʻu ní.