Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Ko ʻEku Tokoni ko ha Mēmipa Tāutahá,” peesi 12: Hili hoʻo lau e talanoa ʻa Sisitā Pētetí, fakakaukau ke aleaʻi e ngaahi tāpuaki ʻoku maʻu mei he ngāue ʻi he Siasí. Te ke lava fakaafeʻi e kau mēmipa ʻo e fāmilí ke vahevaha ha aʻusia mahuʻinga ne nau maʻu lolotonga ʻenau fua ha fatongiá.
“Ko e Melino mo e Fiefia ʻi Hono ʻIloʻi ʻOku Moʻui ʻa e Fakamoʻuí,” peesi 18: Fakakaukau ke fehuʻi ki he kau mēmipa ʻo e fāmilí ko e hā te nau lava ʻo fai maʻá e Fakamoʻuí ʻi he taʻu kahaʻú. Lau ʻa e palakalafi fakaʻosi ʻi he talanoa “Ko ʻEtau Meʻaʻofa Maʻaná.” Ko e hā e meʻaʻofa maʻongoʻonga taha te tau lava foaki maʻá e ʻEikí naʻe talanoa ki ai ʻa ʻEletā Nalesoní?
“Mou Omi, Ke Tau Hū Kiate Ia,” peesi 42: Kimuʻa pea fai e lēsoní, lotua pea fili ha konga pe ngaahi konga ʻoku kaunga tonu mo ho fāmilí. Kapau te ke fili ʻa e konga fekauʻaki mo e kau tauhi sipí, te ke ala vahevahe e akonaki ʻa Palesiteni Monisoni ke “ʻoua ʻaupito naʻa tau teitei fakatoloi haʻatau muimui ki ha ueʻi ʻa e Laumālié” pea aleaʻi mo ho fāmilí ʻa e mahuʻinga ʻo e konga leá ni. Ke fakatātaaʻi ʻeni ki hoʻo fānaú, fanafana ange ha fakahinohino ki honau telingá pea fakalotolahiʻi kinautolu ke muimui ki ai.
“Feʻiloaki mo Siosefa,” peesi 58: Fakakaukau ke fakaʻaliʻali ha fakatātā ʻo Siosefa Sāmita ʻi hoʻo lau e lisi ʻo e ngaahi moʻoni fekauʻaki mo iá ʻoku hā ʻi he fakamatalá. Te ke ala fakahoko ha ʻekitivitī ʻi he ʻosi ʻa e lēsoní ke vakaiʻi pe ko e ngaahi moʻoni ʻe fiha ʻoku manatuʻi ʻe homou fāmilí.
“ʻA e Ngaahi Lea Ko Iá,” peesi 60: Hili hono lau fakafāmili e talanoá, fakakaukau ke aleaʻi pe ko e hā ʻe ala lea ʻaki ʻe he kau mēmipa ʻo e fāmilí kapau ʻe ʻi ai ha taha ʻe lea kovi ʻiate kinautolu. Te ke lava ke fakamatala ki he fānau īkí ʻa hono ʻuhinga ʻoku fekauʻi ai kitautolu ʻi he ʻEkesōtosi 20:7 ke ʻoua ʻe takuanoa ʻa e Huafa ʻo e ʻEikí (vakai foki, T&F 63:60–64).
Vahevahe e Ngaahi Fakauluí mo e Laumālié
ʻI he taimi ne u ʻi ha uooti kakai lalahi kei talavou aí, ne mau efiafi fakafāmili mo e uōtí. Ko e taha e ngaahi efiafi fakafāmili ʻe ʻikai toe ngalo ne u kau atu ki aí ko ha pō ne tataki ia ʻe he kau faifekau taimi kakató.
Naʻe fakaafeʻi ʻe he kau faifekau tangatá ha kau papi ului ʻi homau uōtí ke vahevahe ʻenau ngaahi talanoa ki honau fakauluí. ʻI he taimi ne lea ai e kau papi uluí, ne ongo mālohi e ʻi ai e Laumālié.
Hili hono vahevahe e ngaahi talanoá, ne foki ʻeku manatú ki heʻeku ngaahi aʻusia he ngāue fakafaifekaú—ʻi heʻeku fakatou hoko ko e faifekau taimi kakato mo ha faifekau ki he kotoa ʻo ʻeku moʻuí. Naʻá ku toe vakaiʻi ai ʻeku ngaahi tōʻongá ʻi hono vahevahe ʻo e ongoongoleleí ʻi he ʻaho takitaha pea hokohoko atu ʻeku fakakaukau ki aí ʻi he ngaahi uike ka hoko maí.
ʻI hono ui ko ia ke u tokangaʻi kimui ange e efiafi fakafāmili ʻi he uōtí, naʻá ku fokotuʻu ai ke hokohoko atu ʻa hono fakahoko maʻu pē “e ngaahi pō talanoa fakauluí,” ʻo kole ki he kau ului kehekehe ʻi he uōtí ke nau kau mai ki ai.
Janna McFerson, Kalefōnia, USA