ʻOku hoko ʻa e Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní ko e taha ʻo e ngaahi fuofua fakamatala ʻoku ou sio ki ai ʻi heʻeku maʻu ʻeku makasiní ʻi he māhina kotoa. Pea ko e meʻa ʻeni ne hoko ʻi heʻeku lau ʻa e “Ko Kimoutolu ʻa e Kau ʻĀngeló” (Liahona, Tīs, 2010, 38). Naʻá ku ongoʻi ia ʻi ha fuʻu ivi fakalaumālie mālohi, pea naʻá ku mātuʻaki houngaʻia ʻi he misiona ʻa hotau Fakamoʻuí mo kinautolu ne nau ngāue taʻe siokita ʻi Hono huafá. ʻOku ou houngaʻia moʻoni ʻia Haiti Uinitisi Fenanitesi ki hono vahevahe ʻa ʻene aʻusia fakaofó.

ʻOku tokoni maʻu pē ʻa e ngaahi pōpoaki ʻo e Liahoná kiate au ko e tokotaha, tamai, husepāniti, mo e taki, pea ʻoku ʻomai ʻe he makasini ʻo e konifelenisi lahí ha laumālie makehe ki homau ʻapí. ʻOku ou totongi maʻu pē e makasini ʻo e konifelenisi lahí maʻaku, uaifí mo hoku ngaahi fohá kotoa ke mau lava ʻo lau pea fakaʻilongaʻi e ngaahi pōpoakí fakatatau ki heʻemau fie maʻú pea ʻoua te mau fetaliʻaki ke maʻu e makasiní. ʻOku mau fakatahaʻi e ngaahi makasiní he fakaʻosinga ʻo e taʻú pea ʻoange e toengá ki he ngaahi kaungāmeʻa māmālohí pe ʻikai kau ki he Siasí. ʻOku ou fakamoʻoni ʻoku fakahoko ʻe he Liahoná ha liliu ʻi heʻemau moʻuí.