Kuo fakatapui e Faiʻanga Heleʻuhila Selusalemá ne langa ʻe he Siasí ki hono fakafaivaʻi e ngaahi faiva fakataumuʻa ki he ongoongoleleí pea ʻoku lolotonga ngāue ʻaki ia ki hono faitaaʻi ʻo ha ngaahi faiva. Naʻe fuofua ngāue ʻaki ki hono faʻu ʻo e New Testament Scripture Library Project—ko ha ngaahi vitiō hokohoko ʻoku fakafaivaʻi ai e ngaahi konga mahuʻinga mei he moʻui ʻa Sīsū Kalaisí mo e kau ʻAposetoló.

ʻOku tuʻu ʻeni ʻi he LDS Motion Picture Studio South ʻi he ʻApiako ʻi Kōseni, ʻIutā, USA, ʻoku meimei maile ʻe 60 (97 km) ki he faka-Tonga ʻo e ʻuluʻi ʻōfisi ʻo e Siasí ʻi Sōleki Sití. ʻOku ʻikai ke tatau tofu pē ia mo Selusalema, ka ko hono toe fokotuʻu pē ʻo ha ngaahi feituʻu mahuʻinga ʻi he koló.

Naʻe fili ʻa e kiʻi kolo siʻisiʻi ko Kōsení he ʻoku faitatau e ʻātakaí mo e tuʻunga fakasioloki ʻo Selusalemá—ngaahi tafungofungá, tokaleleí, ʻulu ʻakau ko e sitá, fokotuʻunga ʻoneʻoné, mo ha vaitafe. Pea ʻe hoko leva ʻa e Anovai Ofi ʻi ʻIutaá ko e Tahi Kālelí.

ʻI he taimi ʻe niʻihi, ʻe tokoni e ngaahi meʻa fakakomipiutá ke fakakakato e fanga kiʻi meʻa ʻoku ʻikai ke maʻú.

Ne toki fakangofuá ni ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi liliu ki he ngaahi tuʻutuʻuni fekauʻaki mo e lōloa e taimi ngāue fakafaifekau ʻa e kau faifekau matuʻotuʻa angé, ke poupouʻi ke tokolahi ange ʻa e mātuʻa mali ke ngāue fakafaifekau taimi kakató pea mo toe lelei ange ʻa e meʻa te nau aʻusia heʻenau ngāue fakafaifekaú.

ʻI he ʻaho 1 Sepitema 2011, ʻe ala ngāue e ngaahi hoa malí ʻi ha māhina ʻe 6, 12, 18, pe 23. Tānaki atu ki aí, kuo fokotuʻu ha $1,400 (US) he māhina ki he fakamole ki he nofoʻangá. ʻE hokohoko atu e totongi ʻe he ngaahi hoa malí e fakamole ki he meʻakaí mo e fakamole fakatāutaha kehé.

ʻI he kuohilí, ko e ngaahi hoa mali ko ia ne uiuiʻi ke nau ngāue ki ha fonua kehe mei honau fonua tupuʻangá, ne uiuiʻi ke nau ngāue ʻo ʻoua ʻe siʻi hifo he māhina ʻe 18. ʻE ala lava ke ngāue ʻa kinautolu ʻoku fie ngāue ki tuʻa mei he fonua ʻoku nau nofo aí ʻi ha taimi nounou ange ʻi he māhina ʻe 18 ʻo kapau te nau fua e fakamole ki he fefolauʻakí.

ʻE ala ʻave e ngaahi fehuʻi fekauʻaki mo e ngāue fakafaifekau ʻa kinautolu ʻoku matuʻotuʻa angé ki he seniormissionaryservices@ldschurch.org.

ʻOku toe fakalahi atu e ngaahi lea fakafonua ʻe maʻu ʻi he LDS.org. Kuo ʻi ai ʻeni ha lea fakafonua foʻou ʻe 48 ne toki tānaki ki he uepisaiti fakalao ʻa e Siasí. ʻI hoʻo lomiʻi ko ia ʻi ha lea fakafonua ʻi he “Languages” ʻi he tuliki toʻomataʻu ki ʻolunga ʻo ha peesi pē he LDS.org, ʻe lava ke ke sio ki he ngaahi fakafehokotaki ki he nāunau ʻa e Siasí ʻoku lolotonga maʻu atu ʻi he ʻinitanetí ʻi he lea fakafonua ko iá.

ʻE ʻi ai ha lea fakafonua foʻou ʻe 10 ki he 15 ʻoku ʻamanaki fakaʻatā atu ʻi he LDS.org. ʻI he taimi ko ʻení, ʻe ʻikai leva ke toe fakaʻaongaʻi e ngaahi peesi lea fakafonua ia ki he ngaahi lea fakafonua ko iá. (Hangē ko ʻení, ʻoku ʻikai ha peesi lea fakafonua ia ki he lea faka-Pilitāniá, Falanisē, Siamane, Potukali pe faka-Sipeini, he ʻoku ʻosi ʻi ai ha konga lahi ia he LDS.org ʻi he ngaahi lea fakafonua ko iá.)

ʻOku lolotonga ngāue foki ʻa e kau ngāue ʻa e Siasí ke fakaʻatā ʻa e ngaahi makasini mo e ngaahi nāunau kuo liliu mei he LDS.org ki he ngaahi telefoni toʻotoʻó.