Ko Hono Fakaulo ʻe ha Kau Tautehina Fefine ʻe Toko Fitu ʻa ʻEnau Māmá ʻi he Malaʻe Ngāue Fakafaifekaú

Ko e Peliatisí, pe ko e Kau Tautehina Fefine ʻe Toko Fitú, ko ha pupunga fetuʻu kinautolu ʻo ha foʻi fetuʻu ʻe fitu ʻoku kilukilua honau mamaʻó, pea fie maʻu ki ai ha taʻu ʻe 350 kae toki aʻu mai honau hueló ki he māmaní.

Ko e kau tautehiná ni ʻoku ʻi he vahaʻa ʻo e taʻu uofolu tupú ki he tolungofulu tupú, pea naʻa nau fakaulo atu ʻenau māmá ki he fāmilí pea ʻi he malaʻe ʻo e ngāue fakafaifekaú ʻi heʻenau vahevahe ʻa e ongoongoleleí ki ha kakai ʻi ha fonua ʻe nima.

Ko Malisolo (Silei ʻOsōno), ʻAnitonia (ʻĀsenitina Lesisitenisia), Tenieli (Kositā Lika Seni Hōsē), Folōlenisia (Honitulasi Komeiakuela), Velonika (Silei Senitiako ʻĪsite), ʻAnau (Kuatemala Siti Noate), mo Palapina Nava ʻAkuila (ʻAsenitina Pahia Palanaka) ko ʻenau omí mei Mekisikou pea ʻoku nau ngāue fakafaifekau maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ne fuofua fetaulaki e kau fafiné ni mo e kau faifekau LDS ʻi heʻenau fuofua kau atu ki he ngaahi kalasi lea faka-Pilitānia taʻetotongi ʻi ha falelotu fakalotofonua. ʻI he 2006—naʻa nau papitaiso— fakataha mo ha fefine kehe mo honau tuongaʻané. Ne toe foki mai ʻenau mātuʻá ʻo mālohi ʻi he Siasí he taimi ko ʻení, ʻa ia ko ʻAlapino Nava mo ʻIsitala ʻAkuila he ne na kau ki he Siasí ʻi ha ngaahi taʻu lahi kimuʻa.

Naʻe pehē ʻa Sisitā ʻAkuila ʻoku lava ke ne vakai ki he lelei ʻoku maʻu ʻi he ʻave ko ia ʻa hono ngaahi ʻōfefine ʻe toko fitú ke ngāue fakafaifekaú.

Naʻá ne pehē, “ʻOku nau ʻi he toʻukupu ʻo e ʻEikí, ʻo ngāue mo malangaʻi ʻEne ongoongoleleí ke ʻomi ha ngaahi laumālie lahi ange [kiate Ia].”

Naʻe pehē ʻa Fololenisia, “ʻOku ou ʻofa ʻi he ongoongoleleí ni pea ʻoku ou ʻilo ʻoku liliu ʻe he ngāué ha kakai. Naʻá ne liliu ʻeku moʻuí pea te ne liliu e moʻui ʻa kinautolu ʻoku ou akoʻí.”

ʻE kamata ʻosi mai e kau tautehiná ʻi he fakaʻosinga ʻo e taʻu 2011.