Ngaahi Meʻaʻofa Ne Fakakaukauʻi Fakalelei
Ko e hā ne foaki ai ʻe he Kau Tangata Potó ʻa e koula, laipeno, mo e mula kia Siosefa mo Melé?
ʻOku tui e kakai tokolahi ko e taimi ʻoku foaki ai ha meʻaʻofa, ko e fakakaukaú ʻoku mahuʻingá. Mahalo ko hono ʻuhingá he ʻoku hanga ʻe he fakakaukau ʻokú ne fakatupu hono foaki e meʻaʻofa ʻo ʻai ke laka hake ia ʻi heʻene ʻaongá pē pe fakamānakó—ʻokú ne ʻai ʻe ia ke hoko ʻa e meʻaʻofá ko ha fakaʻilonga ʻo e ʻofa ʻa e tokotaha ʻokú ne foakí pe fakaʻatuʻi ʻo e tokotaha ʻoku foaki ki aí. ʻOku mahuʻinga ange foki e ngaahi meʻaʻofa ia ʻe niʻihi ʻi he fakakaukau pē ʻokú ne fakatupu hono foaki e meʻaʻofá; ʻoku maʻu ʻe he ngaahi faʻahinga meʻaʻofa ko ʻení ha ngaahi fakataipe ʻoku lahi hono talí ʻa ia ʻokú ne ʻai ʻo toe mahuʻinga ange. ʻI he taimi ʻoku maʻu ai ʻe ha meʻaʻofa e ngaahi meʻa kotoa ʻe tolú—ʻene ʻaongá, hono mahuʻinga fakatāutahá, mo e fakataipe ʻo hono ʻuhingá—mahalo ko e meʻaʻofa ia ʻoku fakakaukauʻi mo fakahoungaʻi lahi tahá.
Fakakaukau ki he ʻuhinga naʻe foaki ai ʻa e ngaahi meʻaʻofa ko e koula, laipeno, mo e mula ne foaki ʻe he kau Tangata Potó ki he valevale ko Kalaisí (vakai, Mātiu 2:11). ʻOku ʻikai talamai ʻe he Tohi Tapú hono ʻuhinga ne ʻomi ai ʻe he Kau Tangata Potó e ngaahi meʻaʻofa ko ʻení, ka naʻe mahuʻinga ʻaupito e ngaahi meʻaʻofa ʻe tolú pea mahalo naʻe ʻi ai honau ʻuhinga fakataipe ki he ʻAlo ʻo e ʻOtuá mo ʻEne ongomātuʻa fakaemāmaní.
Koula
ʻAongá: Ko ha meʻaʻofa mahuʻinga ʻaupito e koulá ki ha ongomeʻa kei talavou ʻe vavé ni pē ʻena fakamole ki haʻana fononga ki ʻIsipite ke hola mei he houhau ʻa Hēlotá.
ʻUhinga mo e fakataipé: Ko e meʻaʻofa angamaheni ia maʻá e ngaahi tuʻí ʻa e koulá (vakai, 1 Ngaahi Tuʻi 9:14, 28) he ko e fakataipe ia ʻo e tuʻi mo e tuʻunga fakaʻeiʻeiki—ko ha meʻaʻofa naʻe tāu mo e “Tuʻi ʻo e ngaahi tuʻí” (1 Tīmote 6:15).
Laipeno
ʻAongá: Makehe mei hono mahuʻinga fakapaʻanga ʻo e laipenó, naʻe fakaʻaongaʻi ia ko ha meʻa fakanamu lelei mo e kaloni.
ʻUhingá mo e fakataipé: ʻOku maʻu ʻa e laipenó mei he huhuʻa namulelei (lesini) ʻo ha fuʻu ʻakau pea naʻe fakaʻaongaʻi ia ʻi he ngaahi ouau ʻo e lakanga fakataulaʻeikí ki he feilaulau tutú (vakai, Levitiko 2:1), pea ʻi he lolo ki hono pani ʻo e kau taulaʻeikí. Ko ia, ʻoku lava ke ne fakafofongaʻi e lakanga fakataulaʻeiki ʻo e ʻEikí mo Hono fatongia ko e Lami ʻa e ʻOtuá ʻe feilaulau ʻaki koeʻuhí ko kitautolu (vakai, Sione 1:29).
Mula
ʻAongá: Naʻe mahuʻinga fakapaʻanga foki mo e mulá, ko ha lolo mahi ʻoku maʻu mei he huhuʻa ʻo ha fuʻu ʻakau, kae mahalo naʻe ʻaonga ange ia kia Mele mo Siosefa ʻi hono ngāue ʻaki fakafaitoʻó.
ʻUhingá mo e fakataipé: ʻI he Fuakava Foʻoú, ʻoku faʻa fakaʻaongaʻi ʻa e mulá ki he fakatolonga ʻo e sino kuo pekiá mo hono telió koeʻuhí ko e ngaahi meʻa naʻá ne maʻu ʻo lava ai e fakatolongá (vakai, Sione 19:39–40). ʻOku lava ke fakataipe ʻe he ngaahi ʻaonga fakafaitoʻo ʻo e mulá ʻa e tufakanga ʻo Kalaisi ko e Fai Fakamoʻui Pulé, pea lava ke fakataipe ʻe hono fakaʻaongaʻi ki he telio ʻo ha sino kuo pekiá ʻa e “ipu vai mahi’ te Ne inu ʻi he taimi te Ne mamahi ai koeʻuhi ko ʻetau ngaahi angahalá (vakai, T&F 19:18–19).
Tā fakatātaaʻi ʻe Scott Greer