Pe Faapefea ona Ou Fesoasoani i Lenei Tamaitiiti?

Na faaali mai e lo tatou Faaola ia i tatou le auala e auauna atu ai i isi e ala i le fetuunaia o Lana savali ma faatinoga ina ia fetaui ma manaoga o tagata taitoatasi.¹ Mo se faataitaiga, ina ua Ia asiasi atu i tagata sa Nifae, sa Ia faapotopotoina mai a latou fanau ia te Ia ma sa “ave [i latou], taitoatasi, ma faamanuia i latou, ma tatalo atu i le Tama mo i latou” (3 Nifae 17:21; faaopoopo le faamamafa). Ona afifio ifo lea o agelu ma “lio faataamilo ia tamaiti laiti” i se afi mai le lagi ma sa “auauna atu [agelu] ia te i latou” (3 Nifae 17:24).

Tatou te galulue faatasi i le galuega a le Alii a o tatou aoao atu ia tamaiti uma. Na toe faamanatu mai ia i tatou e Elder M. Russell Ballard o le Korama a Aposetolo e Toasefululua: “O i tatou ua tuuina mai i ai fanau pele, ua tuuina mai i ai se tiute paia mamalu, aua o i tatou ia ua tofia e le Atua e siosioina fanau o aso nei i le alofa ma le afi o le faatuatua ma se malamalamaaga po o ai i latou.”² Pe a tatou faataunuuina lo tatou tiutetauave o le fesoasoani i tamaiti e i ai manaoga faapitoa, o le a fesoasoani le Alii ia i tatou e fetuutuunai a tatou auaunaga ma aoaoga ina ia fetaui ma o latou manaoga.

Ina ia malamalama lelei i nei manaoga, e mafai ona feiloai faiaoga ma taitai o le Peraimeri i le tamaitiiti ma ona matua, ma o se taimi lelei lea mo le faiaoga e amata ai ona faauo atu i le tamaitiiti. E masani lava, o le nofoaga e sili ona lelei e faamasani ai o totonu lea o lona aiga, lea ua masani ai o ia ma atonu foi e sili atu ona ia fesootai atu ai i tagata fou.

E tatau i faiaoga ma taitai ona faaalu se taimi e aoao ai e uiga i le tulaga le atoatoa o le tamaitiiti. O se nofoaga sili e amata ai o le uepisaite a le Ekalesia o le lds.org/disability (e maua i le tele o gagana), lea e mafai ona latou faitau ai i vaaiga lautele e uiga i manaoga faapitoa, aoao i ni motugaafa faafaiaoga, ma saili nisi punaoa faaopoopo.

A uma ona sailiili i le uepisaite, e mafai ona toe feiloai atu faiaoga ma taitai i matua o le tamaitiiti e faasoa atu ni manatu, ma talanoaina ni popolega, ma faatutu ni sini. E mafai ona faasoa atu e matua ni faamatalaga e uiga i le la tama e fesoasoani ai i faiaoga ina ia faamanuiaina, e pei o ni malamalamaaga i le auala e fesootai ai ma le tamaitiiti, po o a gaoioiga e fiafia i ai ae po o a foi gaoioiga e tatau ona aloese mai ai, ma auala e uunaia ai amioga talafeagai. E taua le galulue faatasi ma matua i le faatulagaina o le lotogatasi, feoeoeai, ma talanoaga faifai pea e manaomia e tautuaina lelei ai se tamaitiiti e i ai ni manaoga faapitoa.

E ao foi i faiaoga ma taitai ona fesootai atu i taitai perisitua ao latou atiina ae ni auala e auauna atu ai i le tamaitiiti. Ina ua faatoa faailoa mai e maua le ma tama i le ma’i o le faigata ona fesootai ona o le faaletonu o le mafaufau, ma te lei iloa po o le a faapefea ona ia siitia mai le vasega pepe i se vasega o le Peraimeri faatasi ai ma ana uo. Sa i ai se tamaitai i le matou uarota o se faiaoga sa alu atu i lo matou epikopo ma le peresitene o le Peraimeri ma ofo atu e avea o ia ma fesoasoani i le ma tama. Sa matou fono ma le peresitene o le Peraimeri, se tasi o le au epikopo, lo’u toalua, faatasi ma ia, ma sa ia talanoa mai ia i matou i le auala e fesoasoani ai i le ma tama. Sa matou faatutuina ni sini ma faia se fuafuaga e fesoasoani ia te ia ina ia malamalama i le faagasologa masani o le Peraimeri. Sa tele lava ina manaomia lo matou fetuunaia o le fuafuaga i le aluga o le tolu tausaga, peitai ina ua ia iloa ma malamalama i le mea na tupu na siomia ai o ia, na amata ona fiafia o ia e galulue faatasi ma ana uo ma auai i lesona. O le malamalama ma le tautinoga faamaoni a lenei uso na fausia ai se faavae lea o loo faaauau pea ona tu ai le ma tama. O lona alofa ma le faauoga na aoaoina ai [le ma tama], o ia o se atalii faapelepele o le Atua. Ona o lena mea, ua faaauau ai pea ona ia vaai atu i le lotu o se nofoaga e mafai ona alu i ai ma fai ai mea e loto i ai ma alofagia.

I le avea ai ma ni faiaoga e mafai ona tatou “mulimuli i faatataiga a le Faaola mo le ofoina atu o le faamoemoe, malamalama, ma le alofa ia i latou e i ai manaoga faapitoa.”³ Ao tatou faaali atu le naunau moni i tamaiti o loo i ai manaoga faapitoa, o le a tuputupu pea a tatou faauoga ma i latou.

Atonu e ese lava fesootaiga a tamaiti o loo i ai manaoga faapitoa o le mafaufau nai lo isi. Afai ae masani ia faiaoga i ituaiga fesootaiga a le tamaitiiti lava ia, o le a mafai ona la atinaeina le faatuatuaina ma le faauoga ma avea atili ai ma ni faiaoga mataalia. O auala nei e lua e faaleleia atili ai fesootaiga:

• Ia tutusa le maualuga o ou foliga ma le maualuga o le tamaitiiti.⁴ Afai e fai e tagata matutua lenei mea, o le a lagona e le tamaitiiti le faaitiitia o lona fefe ma o le a aofia atili ai i mea e fai. O le a fesoasoani foi i tamaiti o loo faigata ona taulai atu i se faatulagaga faalevaega. O le a mafai e le faiaoga po o le fesoasoani ona puepue mai le mafaufau o le tamaitiiti ma faasoa atu se fuaiupu pe lua foi e uiga i le lesona i lea taimi ma lea taimi i le aluga o le vasega.

• Saili le mea e fiafia i ai le tamaitiiti. E lagona e tamaiti le faatauaina o i latou pe a faaali atu e isi le naunau i mea latou te fiafia i ai. O tamaiti e i ai manaoga faapitoa e tele lava ina pipii o latou loto i ni mea faapitoa, e pei o se meataalo faapitoa, meaola, po o se taaloga. E mafai e le faiaoga ona fai atu i le tamaitiiti e talanoa atu e uiga i mea e fiafia i ai ma faatatau atu i lena mea i le lesona. E tusa lava pe le tautala le tamaitiiti, ae e mafai lava e le faiaoga ona talanoa e uiga i mea e fiafia i ai o ia.

I le tele lava o tulaga, e tatau ona tofi atu le tamaitiiti e i ai manaoga faapitoa o le mafaufau i lana vasega masani i le Peraimeri. E taua lea tulaga mo le tamaitiiti faapea lana tupulaga. O le tuufaatasi o le a fesoasoani ia te ia e aoao ai i fegalegaleaiga ma amioga talafeagai i le lotu ma saunia ai o ia mo le siitia atu i vasega a le autalavou. Mo lana tupulaga, o le i ai faatasi i le vasega o le a tuuina atu ai ni avanoa mo auaunaga ma mo le lagonaina o ni malamalamaaga uiga ese e mafai e le fanau o loo i ai manaoga faapitoa ona tuuina atu. O le faaaluina faatasi o le taimi e uunaia ai foi le faauoga—o se vaega taua lea o le lagonaina o le auai ma le manaomia i le lotu.

Ina ua oo tausaga o le ma tama tama i tausaga o le aoga faataitai, sa masani lava ona nofo se tasi o teineitiiti i ona autafa i le Peraimeri. Na te faia ni kata ma ni ata mo ia pe a le alu atu i le vasega. E le mafai ona ta’u e le ma tama lona igoa, ae na te uuina lona lima ma valaau o ia “la’u uo.” O le la faigauo na maua ai e le [teneitiiti] le avanoa e auauna atu ai ma fesoasoani ai i le ma tama ina ia fiafia e auai i le lotu.

Ina ia fesoasoani i ni faauoga, e mafai ona filifili se matua po o se faiaoga e faailoa atu le tamaitiiti i lana tupulaga i le aso muamua o le vasega ma talanoa e uiga ia te ia o se tagata—ma faasoa atu ana taleni, tomai, ma gaoioiga e sili ona fiafia i ai. Ona latou talanoa atu lea e uiga i le manaoga faapitoa ina ia malamalama lana tupulaga i manaoga o le tamaitiiti ma soo se amio e ono foliga ese ia i latou. E masani lava, afai e faamalamalama lautele atu e matua ma taitai o le Ekalesia nei mea, o le a sili atu ona maua e ana tupulaga le fiafia e faauo atu ai ia te ia.

Mafaufau e faafesootai ni tagata tomai faapitoa e mafai ona fesoasoani i faiaoga o le Peraimeri i le faatulagaina o se fuafuaga ina ia mafai ona faaaofia atili ai le tamaitiiti. O nisi taimi e malie ai le faiaoga a le tamaitiiti i le aoga ina ia feiloai ma matua ma taitai o le Peraimeri e aoao atu ia i latou po o a metotia o loo aoga i le tamaitiiti i le aoga. E ono mafai foi ona malie le faiaoga e auai atu i le lotu e tuu atu ni faataitaiga e faatatau i ai.

E i ai ni nai itu, e mafai ai ona fai ese le aoaoina o le tamaitiiti, pe mafai foi ona faia nisi fetuunaiga. O loo tuuina mai i le vaega o le Peraimeri o le Serving in the Church i le LDS.org nisi o taiala e uiga i lenei mea.⁵

E mafai ona avea ma luitau le taulimaina o manaoga o soo se tamaitiiti i soo se vasega o le Peraimeri. Afai e i ai se tamaitiiti e i ai manaoga faapitoa i lena vaega, e ono manaomia le tofia o se faiaoga fesoasoani po o se tagata fesoasoani. E auauai ia faiaoga fesoasoani i le aoaoina o le lesona ma fesoasoani i le tamaitiiti, pe mafai foi ona valaauina se tagata fesoasoani e galulue faapitoa lava ma le tamaitiiti o loo i ai le manaoga faapitoa. E tatau i tagata o loo galulue i le Peraimeri ona faatulaga le faagasolo o lesona, atiina ae se polokalama o fesootaiga, ma talanoa i ni auala latou te taulimaina ai ni tulaga eseese e ono tulai mai. E pei ona masani ai, o le tatalo, fesootaiga, ma le faia o ni fuafuaga e taua tele i le mauaina o se faigapaaga manuia ma le tuuina atu o se aafiaga aoga faafaiaoga.

Pe a valaauina se faiaoga fesoasoani po o se tagata fesoasoani, ia manatua o matua e galulue faatasi ma le la tama ma foia luitau lea e oo mai faatasi ma le tausiga o se tamaitiiti e i ai manaoga faapitoa mo le 24 itula i le aso. Atonu la te manaomia se avanoa e auai atu ai i a laua vasega o le Aso Sa po o le aafia foi i nisi o tofiga; o lenei malologa puupuu e mafai ona fesoasoani ia i laua e toe faafou ai lo laua malosi ma sauniuni ai e fetaiai ma luitau o le vaiaso a sau.

O loo aoao mai i le tusitaulima a le Ekalesia “e tatau i taitai ma faiaoga ona faaaofia ai tagata e i ai manaoga faapitoa i fonotaga, vasega, ma gaoioiga i tulaga atoa e mafai ai. E tatau ona fetuunai ia lesona, lauga, ma metotia faafaiaoga ina ia fetaui ma manaoga o tagata taitoatasi.”⁶ O le aoaoina atu o lesona i se auala e fetaui ai ma manaoga o tagata taitasi o le vasega e manaomia ai le tatalo, sogasoga, ma se taumafaiga.

Amata i le sueina po o le a le auala e sili ona lelei ai le aoao a le tamaitiiti. O le sootaga The Leader and Teacher Resources i le lds.org/disability o loo i ai faamatalaga e uiga i le fetuutuunaiga o lesona. O loo lisiina nisi o fautuaga faaopoopo i lalo o ulutala taitasi o e e i ai manaoga faapitoa. O le vaega o le Peraimeri i le Serving in the Church i le LDS.org o le isi lea punaoa sili ona lelei. O fetuutuunaiga e faia mo se tamaitiiti e i ai manaoga faapitoa o le a aoga foi i isi tamaiti. Na aoga nei auala uma mo au:

• Fesoasoani Vaaia: O le toatele o tamaiti e aoao i fesoasoani vaaia, o lona uiga o ata po o mea faitino e fesoasoani ia i latou ina ia malamalama ai i aitia. E mafai ona saofai le faiaoga fesoasoani po o le tagata fesoasoani i talaane o le tamaitiiti e i ai ni manaoga faapitoa ma faaali atu ia te ia ni ata tusi po o ni ata i le aluga o le lesona e faailoa atu ai le mea o loo aoaoina. Afai e fiafia le tamaitiiti e tusiata, atonu o le a manao ia i ai ni ana pepa e faasoa ai ma lana tagata fesoasoani. E mafai ona la tusia ata o mea na ta’ua i le lesona.

• Faalogologo: O tamaiti e aoao e ala i le faalogologo e fiafia e faalogo i tala. Latou te fiafia foi pe a faaaoga e le faiaoga lona leo e faamatala ai le tala—musumusu, tau mole i le ofo, po o le faaaogaina o se leo faatopetope i vaega fiafia [o le tala]. Atonu e manaomia e faiaoga ona faafaigofie pe faapuupuu ia tala mai le lesona ina ia malamalama ma tumau ai le fiafia o le tamaitiiti e i ai se manaoga faapitoa. Mafaufau e faamatala le tala, ona faatatau lea o mataupu faavae mai le tala i se mea moni na tupu i le olaga po o se tala po o se mea na tupu e masani ai le tamaitiiti.

• Mea faitino: O tamaiti o e e aoao e ala i le pa’i e fiafia e uu ma lotelote se mea faitino. Afai o se tala o le lesona e tupu i fafo, e mafai ona aumai e le faiaoga se maa lamolemole, lala laau, po o se meaola e utu i vavae, e faaali atu ao faamatala le tala ona pasi solo lea o le mea faitino ina ia tofu maua uma e tagata se avanoa e uu ma iloilo ai. O galuega taulima ma itulau e valivali o isi ia mea faitino aoga.

O le faaauai e taua mo tamaiti e i ai manaoga faapitoa. Ia sogasoga i le sueina o ni auala e faaaofia ai i latou i le faitauina o se mau, tatalo, ma le faasologa o lauga i le taimi o le fetufaaiga. Afai e faigata i se tamaitiiti ona tautala, mo se faataitaiga, atonu e mafai ona ia faaaogaina ni ata e fesootai atu ai. Atonu foi e fiafia nisi o tamaiti i le aitia o le tūtū i le pulelaa ae e matamuli pe le fiafia e lauga. I lea tulaga, tuu le tamaitiiti e tu i le pulelaa ma fiafia i lona i ai iina ae tuu atu i le matua e fesoasoani e ala i le avea ma leo mo lea tofiga. Atonu e mafai ona ia fesoasoani i le uuina o ata mo lana lauga po o le fai ma faataitaiga i le taimi e piilima ai mo le tatalo.

O nisi nei o gaoioiga ma ituaiga o fetuutuunaiga e mafai ona e mafaufau i ai:

• Polokalama a le Peraimeri mo le sauniga faamanatuga. Atonu e manaomia e se tamaitiiti e i ai manaoga faapitoa se lagolagosua faaopoopo ma fetuutuunai aua o le polokalama o le sauniga faamanatuga e le o se mea lea e masani ona ia faia. O le faaaofia ai o ia i a’ogamea o le a fesoasoani e masani ai i suiga. O se manatu lelei le faasaofai o le tamaitiiti i autafa o le tagata e fesoasoani ia te ia ina ia mafai ona faaoleole o ia ao lei oo i taimi o pese po o le taimi e fai ai lana tautalaga. Afai e faigofie ona lofituina o ia i le pisa po o le vaaia o ni faatinoga faatauanau lea e oo mai pe a faafesagai ma se aofia, ia faaavanoa se pito o le nofoa umi e lata i luma mo ia ma lana tagata fesoasoani. O lenei faiga e mafai ai ona ia valivali, tilotilo i tusi ata, pe tuumuli foi mo sina koma i le falefaafiafia e aunoa ma le faalavelave i isi tamaiti. O lenei foi faiga e mafai ai ona alu atu o ia i luma e fai lana vaega pe pese, ona toe foi atu lea i le nofoa e faato’a malie ai. O se isi tamaitiiti atonu e lelei lava pe a saofai i luga o le tulaga ae e ono manaomia ni meataalo e faifaimea ai, e pei o ni kilipi faamaupepa se lua pe tolu po o se maamaa lamolemole e uu i luga o ona vae. E aoga lenei metotia i tamaiti o ni vaega toatele e faigata ona nonofo ma faalogo lelei.

• Taimi o Fetufaaiga. Afai na tuu atu i le vasega a se tamaitiiti se tofiga ia auai i le taimi o le fetufaaiga, ia mautinoa ia faaaofia ai le tamaitiiti o loo i ai se manaoga faapitoa i se auala e lagona ai e ia le fiafia. Afai e fai e le vasega se tala faatino puupuu, e mafai ona ia faia se vaega puupuu po o se vaega e le tautala ai, ae o lona ofuina o ni ofu e faatino ai le tala faatasi ai ma isi tamaiti, o le a fesoasoani lea ia te ia e lagona ai lona aofia ai. E taua ia te ia le fefaasoaai o ni aafiaga ma lana tupulaga e atiina ae ni sootaga.

• Polokalama faaopoopo. Afai e auai le Peraimeri i se gaoioiga e pei o se faaaliga taleni a le uarota po o le paranesi po o se poloklama o le Kerisimasi ae e le fiafia le tamaitiiti o loo i ai se manaoga faapitoa i le pisapisao po o ni potu tumutumu, ia tuu lana vasega e faamuamua i le polokalama. Ona filifili lea o ona matua pe ave o ia i le fale ao lei lofituina o ia.

Ou te faafetai i la’u tama e maua i le ma’i o le faigata ona fesootai ona o le faaletonu o le mafaufau, ua ou maua ai se vaaiga fou i le uiga o le avea ma se atalii o le Atua. Ua ou aoao ai e silafia lelei lava ma alofa le Tama Faalelagi ia i tatou taitoatasi. Na te silafia o tatou manaoga ma musuia matua ma taitai e ala i le Agaga Paia ina ia tausia ma faamanuia olaga o o tatou aiga ma fanau o loo tatou auauna atu i ai. Ua ou mauaina foi se lagona talisapaia naunautai ma le alofa mo faiaoga Peraimeri a la’u tama ma taitai o le Ekalesia o e na faaaluina le taimi e faauo atu ai ia te ia. O i latou o ni faataitaiga matagofie o le alofa o le Faaola.

O le aoaoina o se tamaitiiti e i ai manaoga faapitoa o le mafaufau e manaomia ai se taimi ma se taumafaiga faaopoopo ma e i ai taimi e aofia ai ma le ita. Peitai o le tatalo, musumusuga, ma le faalagolago i le Alii, e mafai ai ona tatou maua le faamanuiaina ao tatou faataunuuina le avea o i tatou ma tausimea ina ia fesoasoani ai i nei fanau faapitoa.