Ua Mulimuli le Au Paia i le Lalolagi Atoa i le Fautuaga Faaperofeta i le Faia o se Aso o Auaunaga

O se tasi o siteki muamua lava na tali atu i le valaaulia a le Au Peresitene Sili e auai i se aso o auaunaga o le siteki o Tavita i Panama, lea sa faatulagaina se faaaliga o sauniuniga mo le lautele o le lotoifale. O le fuafuaga lea sa faia ia Aperila, sa lagolagoina e nisi o faalapotopotoga o tagata lautele, lea sa faaalia ai ni mafutaga faaleaoaoga ma faatinoga i autu e faatatau i le teuina o meaai, mea tautupe a le aiga, sauniuniga mo faalavelave faafuasei, ma le soifua maloloina.

E le lava le na ona iloa o nei mataupu faavae mo i tatou lava, o le tala lea a Itzel Valdez Gonzalez, o le sa auai i le aso o le auaunaga. E taua foi le auauna atu i isi e ala i le faasoa atu o ia [mataupu faavae].

“O le auauna atu i isi o se uiga taua lea o tagata e mulimuli ia Iesu Keriso,” o lana tala lea. “O lenei fuafuaga na maua ai ni avanoa e tagata o le Ekalesia e tuuina atu o latou taimi ma taleni e faamanuia ai i latou e manaomia le fesoasoani.”

Sa filifili le au paia o le Paranesi a Arusha i Tanzania e volenitia i le Maota o Shanga, o se nofoaga e tuuina atu ni aoaoga faalegaluega i tagata e i ai manaoga faapitoa ma aoao i latou ia maua se tausiga mo i latou lava ma o latou aiga.

I le aso 20 o Aokuso, 2011, e 35 tagata auai—o tagata matutua, talavou, ma tamaiti; o tagata o le Ekalesia, tagata sailiili, ma faifeautalai—sa galulue faatasi ma tagata e i ai manaoga faapitoa i le faiga o galuega taulima ma teuga [o asoa ma mea faapena], o le a faapea ona faatauina atu i se taimi mulimuli ane. Sa fesoasoani foi tagata volenitia i galuega i totonu o fale e pei o le tapenaina ma le saluina.

A o lei tuumuli le vaega, sa talosaga atu taitai faamaopoopo o le Maota o Shanga ina ia latou faatasitasi atu i se eria i le ogatotonu ina ia mafai e tagata sa latou tautuaina ona lululima ma i latou ma faafetai atu ia i latou. “Sa o se aafiaga ootia,” o le faamatalaga lea a Sister Sandra Rydalch, o lē o loo auauna atu faamisiona ma lona alii o Elder Rich Rydalch i le eria. Talu mai lena taimi, a vaai tagata mai le Maota o Shanga i tagata o le paranesi i le taulaga, “latou te iloaina lelei lava i matou, talotalo mai, ma tutu foi e feiloai mai,” o le tala lea a Sister Rydalch.

O Patience Rwiza, o lē sa faatulagaina le galuega fesoasoani a le paranesi i lalo o le taitaiga a taitai perisitua, sa ia ta’ua e faapea o le gaoioiga sa aoga e le gata ia i latou i le Maota o Shanga ae faapena foi ia i latou na ofoina atu le auaunaga. “Sa atiina ae e tagata se lagona o le alofa e ala i le fesoasoani atu i isi, ma i le aluga o le faagasologa, sa iloa ai e tagata ni mea mai le afioaga lea sa faapea ona latou le iloaina muamua,” o lana tala lea. “Ua faamalosia la’u molimau i le mea na ou faia ma vaaia—mai le auai ai o le au paia ma le afioaga atoa.”

Ua iloa e le au paia o le Siteki a Coimbra Potukale, o le auauna atu e le o se mea e tasi se taimi e tupu ai. O le mea moni, e auai le siteki i ni gaoiogia i tausaga taitasi i lalo o le faamalu o Mamona Lima Fesoasoani. O gaoioiga o le tausaga ua mavae na aofia ai le faamamaina o se paka mo tagata lautele ma le aveina atu o tamaiti o le Peraimeri e asi isi tamaiti o e o loo nonofo i se nofoaga o tamaiti ua leai ni aiga. I nei gaoioiga ma isi foi gaoioiga, e taua le aofia ai o le aiga atoa, o le faamatalaga lea a Anabela Jordão Ferreira, o lē o loo avea ma faatonu o le va i fafo mo le Siteki a Coimbra.

“I a matou galuega faatino, o nisi taimi matou te fai atu ai matou te taliaina tagata mai le 8 masina e oo i le 88 tausaga le matutua,” o le tala lea a Sister Jordão. “O le mea moni lava lena. Matou te vaaia ia tina ma ni pepe ma tamamatutua o e e faigata ona feoai, ae o loo i ai foi a latou molimau malolosi ma le naunau e auauna atu i le Alii.”

Ina ua tuuina atu ia Michael Hatch, o lē o loo galue i le au fautua maualuga i le Siteki a Farmington New Mexico, le tofiga e faatulaga se aso o auaunaga a le siteki e tali atu ai i le valaaulia a Peresitene Eyring, sa mafaufau o ia po o fea o le a latou maua mai ai ni manatu e auauna atu ai i e matitiva i lo latou lotoifale. Sa latou fono ma lana komiti, ma sa latou uunaia ma isi taitai o le siteki ia tagata o le siteki e faasoa atu o latou manatu e faatatau i manaoga o le lotoifale.

Sa iloa e Roberta Rogers se manaoga faapitoa i nisi o faalapotopotoga i le eria—e aofia ai se falemai lea e faigaluega ai i mataupu tau i le lotoifale. E ui o galuega faatino o le aoina mai o lavalava, e masani lava ona maua mai ai foai aoga e pei o ofuvae vae uumi ua faaaoga, ofutino, seevae, ma peleue, ae o le tele o mea o loo manaomia pea e faalapotopotoga o galuega alofa o mea e pei o totini, ofulaiti, ma ofumoe—o foai ia e tatau lava ona fou. Sa fautuaina e Sister Rogers ia faatulaga e le siteki le aoina mai o ni aitema faapena.

I le aso 15 o Oketopa, sa tufatufaina atu ai e tagata o le siteki i o latou pitonuu le 1,000 o kata e tautau i faitotoa na faapea ona faamatalaina ai le galuega fesoasoani, ma valaaulia ai le lotoifale e auai, ma lisiina ai aitema na manaomia. O se vaiaso mulimuli ane, sa toe foi atu ai tagata o le siteki e ao mai aitema ona avatu lea i le faleautu o le siteki mo le iloina ma le tufatufaina i faalapotopotoga o fesoasoaniga alofa e 10 o loo i le lotoifale.

O lena taumafaiga tuufaatasi sa faafetauia ai se manaoga faavavave i lo latou lotoifale, o le faamatalaga lea a Sister Rogers. “O se mea sa ese foi, ma sa fesoasoani ai i tagata. Ma talu ai ona sa le matuai taugata tele, o lea e mafai ai e se aiga se tasi ona faaalu ni nai talā ma mafai moni ai ona fesoasoani i se tagata.”