O Le Aoaoga Faavae A le Tama

O le totonugalemu o le iloaina o le Tama, o le malamalama lea i le mamanu ua faaalia mai o le aiga. O le aiga o le iunite e aupito sili ona taua i le olaga nei ma le faavavau ma ua faauuina e le Atua.¹ O le ola i ni fegalegaleaiga alofa faaleaiga e le gata ina aumaia ai ia i tatou se fiafia sili, ae e fesoasoani foi ia i tatou e aoaoina mataupu faavae sa’o ma ia sauniuni ai i tatou mo le ola e faavavau.² Ma le isi, o sootaga faaleaiga o le a fesoasoani ia i tatou ina ia iloa, alofa, ma malamalama ai i le Tama. O se tasi lea o mafuaaga e faamamafa ai pea lava pea e le Au Paia o Aso e Gata Ai le taua o le faaipoipoga ma le aiga i vaega uma e lua, o le Ekalesia ma le lalolagi. O le fuafuaga a le Atua ua saunia ai se ala mo sootaga faaleaiga ia oo atu i talaatu o le oti. E mafai ona tatou toe foi atu i le afioaga o le Atua, ma faatasia ai e faavavau ma o tatou aiga.³

Ua filifili lo tatou Tama Faalelagi e le faaalia mai ni faamatalaga se tele e uiga i lo tatou olaga i le muai olaga faatasi ma Ia. Atonu o le mafuaaga o lenei mea ona e mafai ona tatou aoaoina le tele o mea i le na o le matauina o mamanu mo aiga amiotonu ua Ia faavaeina i luga o le fogaeleele. O le matauina ma le totoa ma le ola magafagafa e tusa ai ma mamanu o se aiga amiotonu i le lalolagi, o le fatu lea o la tatou sailiga ia iloa le Tama.

O le Tama Faalelagi ma le aiga e le mavavaeeseina lo laua sootaga. A tatou malamalama i le tele o itu o lenei sootaga, ona mafai lea ona amata ona tatou iloa atoatoa le patino ma le fitoitonu o le alofa ma le sootaga a le Tama Faalelagi ma i tatou taitoatasi. O le malamalama i Lona finagalo e uiga ia i tatou, tatou te maua ai le malosi e alofa ai ia te Ia i se alofa e sili atu ona mama ma atoatoa. O le lagonaina e le tagata lava ia o le moni, alofa, ma le mana o lena sootaga o le punavai lea o lagona ma faanaunauga sili ona loloto ma matagofie lea e mafai ona oo mai i se alii po o se tamaitai i le olaga nei. O nei lagona loloto o le alofa e mafai ona faaosofia ai i tatou ma aumai ai le malosi ia i tatou i taimi o faigata ma tofotofoga ina ia tatou faalatalata atili atu ai i lo tatou Tama.

Soo se tagata soifua lava o se atalii po o se afafine agaga na fanaua e lo tatou Tama Faalelagi.⁴ Fanaua o se upu faamatala o le veape fanau ma o lona uiga “avea ma se tagata.” O le fanau o se upu na faaaoga i tusitusiga paia e faamatala ai le faagasologa o le tuuina atu o le ola (tagai i le Mataio 1:1–16; Eteru 10:31).

I le mamanu a le Atua ua faaalia mai mo aiga amiotonu, o le fanau mai o se tamaitiiti o le taunuuga lea o se filifiliga magafagafa ma le alofa. O le taunuuga faavavega o faatinoga alofa ma fuafua lelei na faia e matua e auai faatasi ma le Tama Faalelagi i le faagasologa paia o le foafoaina o se tino faaletino mo se tasi o Ana fanau agaga. O le iloaina o lo tatou olaga o le taunuuga o se filifiliga alofa ma se faatinoga na fuafuaina, e mafai ona tatou maua ai se lagona o le maoae o lo tatou taua patino i le olaga nei. O lena lagona o le faatauaina e mafai ona faamalosiauina ai i tatou i o tatou gafatia ma puipuia ai i tatou mai faaosoosoga.

E fiafia Satani e faaaoga ia tulaga e itiiti le taua e uiga i nisi e fananau mai i le olaga nei e faaoso ai nisi o i tatou e fesiligia o tatou lava taua ma gafatia. Po o a lava tulaga o lo tatou fananau mai i le olaga nei, o i tatou uma o atalii ma afafine agaga a ni matua faalelagi. O le Atua o se tama amiotonu ma agaalofa. O o tatou agaga ua avea ma ni tagata ona o le alofa ma se filifiliga na fuafuaina e tuuina mai ia i tatou o le ola ma le avanoa.

E le gata ina faia e matua amiotonu ni filifiliga na fuafuaina ma le alofa e aumai ai fanau i le lalolagi, ae la te saunia foi, tatalo, ma faatalitali ma le naunautai i le faagasologa o le vaitaimi o le maitaga, ma faatalitali mo le fanau mai o le la tama. I le taimi e fanau mai ai, la te fiafia e siisii, talatalanoa i ai, ma tausi ma puipui le la tama. La te aoao i mamanu ma manaoga patino o le pepe. E sili atu lo la iloa o le tamaitiiti nai lo le iloa e le tamaitiiti o ia lava. Pe toafia lava le fanau a ni matua, o i latou o ni tagata taitoatasi ia i laua.

O le iloaina o lenei mamanu ua fesoasoani ai ia i tatou ia malamalama o le avea ai ma fanau agaga ua silafia ai i tatou taitoatasi e lo tatou Tama Faalelagi. Na Ia silafia i tatou e le itiiti ifo mai le taimi na avea ai i tatou ma agaga na fanaua. O i tatou o Ona atalii ma afafine faapeleple, lea e alofa i ai o Ia i tagata taitoatasi.

O se isi mamanu o aiga faalelalolagi e fesoasoani lea ia i tatou ina ia malamalama ai i le natura patino o le alofa o le Tama mo i tatou. O se tasi o uluai laasaga i le fausiaina o se faasinomaga patino, pe a mavae le fanau mai o se tamaitiiti, o le tuuina atu lea e matua i le la tama o se igoa. O le faaigoaina o se vaega taua lea i soo se aganuu ma e masani lava ona o faatasi ma ni sauniga aloaia aua o se igoa e taua tele i le faasinomaga patino o se tagata e ona. E le filifilia e tamaiti o latou igoa; o o latou matua e faaigoaina i latou.

O le tele o aganuu latou te tuuina atu i se tamaitiiti se igoa muamua (ma i nisi tulaga se igoa lona lua, po o le igoa ogatotonu). O se mea masani foi i le lalolagi le tuuina atu i tamaiti o se igoa faaleaiga po o se igoa e fesootai ai i o latou matua, aiga, ma tuaa. O nisi o aganuu e faaaogaina nisi igoa e matauina ai e pei o se faaiu lona lua (mo se faataitaiga, o le faaiu o le tina) ina ia faailoa atu ai le sootaga o le tamaitiiti i le aiga ma tagata lautele.

O lena lava mamanu, ua tatou iloa ai ua matauina patino ma taitoatasi i tatou e le Tama Faalelagi. Na te silafia o tatou igoa. O nai mau ia o loo ta’ua ai ni tagata i le muai olaga, sa iloaina i latou i o latou igoa i le mamanu lava lea e tasi o loo iloaina ai i tatou i le tulaga faaletino. I faamaumauga o asiasiga a le Tama i tagata taitoatasi i le lalolagi, sa Ia faaaoga ai igoa e faaalia mai ai Lona silafia ma faailoa patino taitoatasi i tatou. Faapei ona fai mai le Perofeta o Iosefa Samita e faatatau i le Uluai Faaaliga lea na faaali mai ai le Tama, “Sa fetalai mai le tasi o i laua ia te a’u, ma fofoga mai ai te a’u i lo’u igoa” (Iosefa Samita—Talafaasolopito 1:17; tagai foi i le Mose 1:6; 6:27).

E silafia i tatou e le Tama aua na Ia fanaua atalii ma afafine agaga faapelepele taitoatasi, ma tuuina mai ia i tatou taitoatasi se faasinomaga ma le ola. E pei ona Ia fetalai atu ia Ieremia, “Na a’u iloa oe a o le i faia oe e a’u i le manava” (Ieremia 1:5).

O loo aoao mai e le Tusi Paia o le alii ma le tamaitai na foafoaina i le faatusa o le Tama (tagai i le Kenese 1:26–27). O le saienisi o kenera ma suesuega patino ua molimau uma mai i le mataupu faavae o le tamaitiiti ua soo i le fuaitino, foliga, ma uiga o matua. O nisi ua fausia o latou lagona o le taua patino e ala i le faatusatusaina o i latou lava i isi. O lena faiga e mafai ona oo atu ai i lagona o le le atoatoa po o le fia mata muamua. E sili atu le vaai totoa atu i lo tatou Tama mo lo tatou lagona o le taua faaletagata lava ia.

O o tatou siata o le faasologa o gafa i le olaga nei e faaalia ai le tele o augatupulaga e tau atu lava i augatupulaga i tua. Ae peitai, o o tatou siata o le faasologa o le gafa faaleagaga, e na o le lua lava augatupulaga—o lo tatou Tama ma i tatou. O lo tatou fuaitino o Lona fuaitino, ae e le o i ai le mamalu. “O le fanau [atalii ma afafine] i tatou a le Atua i nei ona po, a e … pe a faaali mai o ia, ona foliga ai lea o i tatou ia te ia; aua tatou te iloa tino ai lava o ia” (1 Ioane 3:2; tagai foi i le MF&F 130:1). O totonu o i tatou taitoatasi o loo i ai fatu natia o le faaleatua lea e mafai ona fuga ae ma fua mai e ala i Lana faamanuiaga ma e ala i le mulimuli i le ala o le usiusitai a’ia’i lea na faaalia ia i tatou e Iesu. O loo i ai le mana i le faaleoina po o le usuina o upu “O a’u o se atalii/afafine o le Atua.”⁵

O se tasi o faauigaga sese maoae o le Liliuese sa i ai, o le faaalia ai lea e faapea o le ata o le faaolataga a le Atua le Tama e matuai faalealofa lava. O Frederic Farrar, o le taitai o le lotu Alekana, o se tagata atamai maoae, tagata talitonu, ma o le tusitala na sili ona viia o le tusi Life of Christ, na faaalia ma le faanoanoa e faapea, o le tele o lotu Kerisiano ua sese lo latou faauigaga o seoli ma le tausalaga ona o se taunuuga o mea sese i le faaliliuga mai le gagana Eperu ma le gagana Eleni i le Lomiga a King James o le Tusi Paia.⁶

E pei ona faaalia i le Perofeta o Iosefa Samita, o le ata o le faaolataga a se Tama alofa e faatatau i tagata uma, e aofia ai ma i latou o e le’i faalogo ia Iesu Keriso i lenei olaga, o tamaiti ua oti ao le’i atoa tausaga e tali atu ai mo ia lava, ma i latou o e le’i maua se malamalama (tagai i le MF&F 29:46–50; 137:7–10).

E oo lava foi ia i latou o e—e le pei la o Satani ma ana agelu (tagai le Isaia 14:12–15; Luka 10:18; Faaaliga 12:7–9; MF&F 76:32–37)—e lei ola amiotonu ae latou te lei tetee i le Atua, ua saunia e se Tama alofa ni malo o le mamalu e maualuga atu nai lo tatou nofoaga i le lalolagi (tagai le MF&F 76:89–92). E leai a se masalosalo e uiga i le alofa o le Tama mo Lana fanau agaga.

Pe a tatou saili ina ia iloa le Tama e ala i mamanu o le olaga faaleaiga amiotonu, ua amata ona tatou malamalama i le loloto o Lona alofa mo i tatou ma amata ona lagona se alofa loloto atu mo Ia. O taumafaiga ina ia suia ma faataumaoia le aiga ua mamanuina ia taofia ai fanau a le Tama mai le lagonaina o Lona alofa o loo tosoina atu i latou ia te Ia.

O alii saua o loo avea ma taitai, tamaiti e fananau i ulugalii e nonofo faapouliuli, fanau e le manaomia, ma isi luitau faaagafesootai o o tatou aso ua faafaigata ai mo i latou o mafatia ai ona malamalama, faamoemoe, ma maua le faatuatua i se Tama amiotonu, alofa, ma manatu mai. Faapei lava foi ona taumafai le Tama e fesoasoani mai ia i tatou ia iloa o Ia, o loo faaaoga foi e le fili soo se auala na te mafaia e oo mai ai i lo tatou va ma le Tama. O le mea e lelei ai, e leai se mana, agasala, po o se tulaga e mafai ona taofia mai i tatou mai le alofa o le Tama (tagai i le Roma 8:38–39). Aua na muai alofa le Atua ia i tatou, ua mafai ai ona tatou iloa o Ia ma alofa ia te Ia (tagai i le 1 Ioane 4:16, 19).

O le mafuaaga tonu lava ona ua matuai taatele faafitauli lautele i aso nei, lea e tatau ai ona tatou aoao atu le aoaoga faavae o le Tama ma le aiga e fesoasoani e faamalolo, faasa’o, ma tatou faatoilalo ai manatu ma faatinoga le sa’o faifai pea a le lalolagi. E pei ona faaalia mai ma le mataina e Eliza R. Snow (1804–87), e toatele tagata i le lalolagi latou te ta’ua le Atua “Tama” ae ua latou “le [iloa] pe aisea.”

O le mea e faafetai ai, ua toefuataiina mai “le autu o le malamalama”⁷ ma le aoaoga faavae o le Tama i luga o le fogaeleele!