O La Tatou Avanoa

O i latou o e e mafai ona pulea o latou mafaufauga o ni toa ia i latou lava, o le saunoaga lea a Peresitene Boyd K. Packer, Peresitene o le Korama a Aposetolo e Toasefululua.¹ O se tasi o auala e pulea ai o tatou mafaufauga o le filifili lea o se viiga e sili ona e fiafia i ai ma ia i ai sau ata o le malumalu. Faapipii le ata [o le malumalu] i totonu o lou potumoe. Soo se taimi lava e te vaaia ai se tagata e le tauagafau ona lavalava, ia toe faamanatu ma le toto’a le viiga i totonu o lou mafaufau pe mafaufau foi i le malumalu. Afai e le o ese ia mafaufauga le lelei mai lou mafaufau, ia tatalo ma anapogi ina ia mafai ai ona e faagaloina na mea.

O se tasi o tofotofoga sa onosaia e lo matou aiga sa tupu i le taimi na ma’i ai lo’u tuagane matua, ma ina ua mavae se taimi, ona maliu ai lea o ia. Sa matuai faigata ia i matou i le taimi muamua, ae sa mafai ona faatoilalo e lo matou aiga lena tofotofoga. Ona sa faamauina lo matou aiga i le malumalu, o lea sa matou iloa ai o le a matou toe faatasi ma lo’u tuagane, ma le Tama Faalelagi ma Iesu Keriso pe a oo i le taimi e tatau ai.

Ou te iloa o lenei tofotofoga o se tasi lea o auala na tapena ai i matou e le Alii mo isi tofotofoga—e fesoasoani ia matou malolosi atili ai. E tofu tagata uma ma tofotofoga e onosaia, ma ua silafia e lo tatou Tama Faalelagi e mafai ona tatou faatolilaloina. O lea e le tatau ai ona vaivai lo tatou faamoemoe.

Mo le tausaga ua tuanai atu, sa ou faapea ai, ua tele naua tulafono i totonu o le Ekalesia, ma sa ou mafaufau faapea “E faapefea ona maua ni mea malie i le lagi?” Sa ou lagonaina le pei na saisaia au i le Ekalesia ma sa faigata ona ou mamulu ese.

Ona ou tilotilo lea i olaga o a’u uo. Aisea na ou le oo ai i nisi o tofotofoga sa latou oo i ai? O se tasi po na faatoa ou malamalama ai—ou te le’i oo i na mea aua sa ou mulimuli i tulafono na faatulaga mai e le Tama Faalelagi mo a’u. Sa ou iloaina foi afai e te mulimuli i tulafono, e mafai ona e fiafia ma mafai ona e tausia se aiga ma mafuta faatasi ma le Tama Faalelagi ma Iesu i le faavavau.