Ou Te Lei Manao e Auauna Atu

Ina ua 11 ou tausaga, i se konafesi faarisone i Johannesburg, Aferika i Saute, na ma lululima ma Peresitene Howard W. Hunter (1907–95) ma faapea mai, “O le a e alu i se misiona ma o le a avea oe ma se faifeautalai lelei i se aso.”

O le tele o alii talavou o le a faamemelo i na upu e oo i le faavavau. E lei faapena au. E lei i ai sou manao e auauna atu faamisiona i le isi 10 tausaga na sosoo ai. Na sili atu lou popole i le faamanuiaina i taaloga ma lou olaga masani. Na ou manatu o le tuuina atu o le lua tausaga, o le a tiai ese ai uma mea ou te fiafia ai. I au faatalanoaga ma ou peresitene o le paranesi ma le siteki, ou te maua lava alofaga e mafua ai ona ou le manao ai e auauna atu.

I le 21 o ou tausaga, e le o i ai lava se manao e auauna atu i se misiona, na ou asiasi ai i lou aiga i le Iunaite Setete, i Iowa. Na malaga ese atu i latou iina i le tausaga ua mavae. A o i ai i Iowa, na ou maua ai le avanoa e alu ai i le Malumalu o Winter Quarters Nebraska faatasi ma le paranesi nofofua o le lotoifale. E lei faia ou faaeega paia, ma na ou manatu o le a ou faia ni papatisoga mo e ua maliliu.

Ina ua taunuu atu i le malumalu, na ou iloaina e leai se sauniga papatisoga ua fuafuaina mo le afiafi. Na ou mafaufau, “Oka, o le a le mea o le a ou faia i le isi lua ma le afa itula?”

Na ou filifili ou te alu i le nofoaga autu mo tagata asiasi o le Mormon Trail i le isi itu o le auala. Ina ua maea le matamataina o se tifaga e 15 minute e uiga i paionia, na faafeiloaia au e ni tamaitai faifeautalai e toalua o le a aveina au i sau lava matamataga taamilo. I le iloa ai o sina vaega itiiti e uiga ia te au, na fesili mai Tuafafine Kusika pe aisea na ou le alu ai i se misiona. Na felelei mai i fafo au alofaga masani. Na molimau mai ia te au Tuafafine Kusika e le gata i paionia, ae faapena foi le galuega faafaifeautalai.

Ina ua maea le matamataga taamilo, na ou nofonofo i le potu malolo o le malumalu, ma mafaufau. Na faafuasei lava, o au alofaga mo le le auauna atu faamisiona na avea ma mafaufauga nenefu. Na molimau malosi mai le Agaga e tatau ona ou auauna atu faamisiona. Mai le taimi na ou talanoa ai i faifeautalai tamaitai, na suia mea uma i totonu ia te au. Na molimau mai le Agaga i lou loto i le mea e tatau ona ou faia.

I ni masina mulimuli ane na ou iloaina ai o le leo itiiti, ma le filemu na tauina atu ia Tuafafine Kusika na ou manaomia le faia o lau lava matamataga taamilo. Na te lei iloa pe aisea, ae na i ai fuafuaga a le Alii mo au.

Na ou auauna atu i le Misiona a Kalefonia Venetura—le misiona sili ona maoae i le lalolagi—ma fausia ni faauoga matagofie ou te faamoemoe o le a oo atu i le faavavau. Na ou le talitonu ia Peresitene Hunter mo le 10 tausaga, ae na ia silafiaina lelei lava le mea na ia saunoa mai ai.

Na suia atoa lou olaga, ona o se tamaitai faifeautalai na usitai i uunaiga a le Agaga Paia.