Sauniuni mo le Konafesi Aoao

Matou te iloaina ma lo matou aiga o le auala sili lava e saunia ai mo le isi konafesi aoao e sosoo ai, o le faatofuina lea o i matou lava i fautuaga na tuu mai i le konafesi na tea atu. Pe a maua se taimi avanoa o lo’u toalua, na te faitauina lauga o le konafesi i le Liahona. Ona ia taumafai lea e faaaoga ia aoaoga sa ia aoaoina. Mo se faataitaiga, sa fai mai o ia ia te au o le lauga a Elder David A. Bednar e faatatau i le faaleleia o le tulaga o a tatou tatalo, ua fesoasoani tele ia te ia i le sailia ma le naunautai sili atu o le alofa i le tausiaina o le ma fanau tama ulavavale e toalua.¹

O le toe iloiloina o le konafesi ua mavae o se mea lea ou te taumafai foi e fai. A ou savali i le aoga i taeao taitasi, ou te faalogologo i se tasi o lauga ona mafaufau lea ma tatalo, ma faatagaina aoaoga a perofeta e nofo i lou loto ma lou mafaufau. Ou te talanoa atu i le Tama Faalelagi e uiga i lou aso e sosoo ai ma ou tiutetauave o se tane, tama, Au Paia o Aso e Gata Ai, tagata aoga, ma se tagatanuu.

O le lauga a Elder L. Tom Perry o le “Tuu Atu ia te Ia e Faafaigofie” na lagonaina ai i se tasi taeao le taua tele i ou tulaga. Na faatatau e Elder Perry ia mataupu faavae lea na aoaoina e Henry David Thoreau i Walden e faafaigofie ai o tatou olaga e ala i le faateleina o le faaleagaga ma ia maua le toomaga mai popolega o le lalolagi. Ona o le mamafatu o lau aoga, o tafaoga faaleaiga mo i matou na taua ma seasea lava maua se avanoa e faataunuu ai. Ae peitai, i se tasi taumafanafana a o le’i faia le lauga a Elder Perry, sa matou asia ai ia Walden Pond, ma faaaluina se taimi i totonu o le tamai fale laau ua toe fausia a Thoreau e tomanatu ai. Sa matou faaaogaina lelei lena aoauli e savalivali ai i le Walden Pond ma fausia ni fale tetele i oneone i luga o le matafaga. Ina ua matou toe foi i le fale, sa faafetai lo matou aiga i le Tama Faalelagi mo Ana foafoaga, sa matou fiafia faatasi ai.

I nai masina mulimuli ane a o ou savali i le auala savali sa ufitia e le kiona, sa ou toe manatua lena aso fiafia o le taumafanafana. O se taunuuga o lena aafiaga ma le savali a Elder Perry, sa ou malamalama manino lelei ai, e taua le faaaluina o le taimi e faatasi ai ma lou aiga i le ola ai i se olaga fuafuaina e totonugalemu ai le talalelei.

E ese mai le faalogologo o le tagata lava ia i lauga, ae e faalogologo foi lo matou aiga i taeao o Aso Sa i se lauga o le konafesi i le matou komepiuta a o matou sauni mo le lotu. I se tasi taimi na ma mauaina ai ma lou toalua o fai atu le ma tama e fa tausaga i le ma tamaitiiti laitiiti e filemu ina ia mafai ona ia faalogo ia Peresitene Thomas S. Monson.

O aoaoga a lo tatou Faaola e ala mai fofoga o perofeta o nei ona po, o se faamanuiaga lea i lo matou aiga. O le sailia ina ia faaaofia ai ia perofeta, tagata vaai, ma tali faaaliga i o matou olaga i aso uma, ua tatala ai le auala e avea ai le Agaga Paia ma o matou taiala e le aunoa. Matou te ta’ua pea lava upu o le pese: “Ia Viia Oe Le Atua.”³

O le suesueina pea e le aunoa o fautuaga na tuuina mai i le konafesi aoao, ua ma maua ai ma lou toalua se malamalamaaga sili atu e uiga i aoaoga lata mai a le Alii, seia toe oo mai le isi konafesi aoao e sosoo ai. Ua toefaafouina faaleagaga i ma’ua ma ua sili atu ona saunia e maua Ana aoaoga o i ai nei e ala mai i Ana auauna, o perofeta.