O Tupe ua Fesoasoani i le Au Paia i le Lalolagi Atoa ia Maua Faamanuiaga o le Malumalu

Talu mai le taimi sa ulufale ai o ia i le Malumalu o Manila Filipaina ia Iulai 2001, a o le’i tuuvaa atu o ia mo lana misiona i Sigapoa, sa iloa e Riaz Gill o Pakisitana sa manao o ia e toe foi atu i le malumalu ina ia mafai ona maua sona aiga e faavavau.

I le 2007, sa papatisoina ai lona toalua o Fara, ae peitai sa utiuti seleni ma la te le’i iloa po o afea o le a mafai ai ona la malaga i le malumalu, lea e silia ma le 3,500 maila (5,700 km) le mamao. O le fanau mai o le la atalii o Amona Fineaso, i le 2009, sa atili malosi ai lo laua mananao ina ia faamauina i le malumalu, ma i le faaiuga o le 2010, faatasi ai ma le fesoasoani mai o le Tupe Lautele a le Ekalesia e Fesoasoani Ai i Tagata Ulu i le Malumalu, sa taliina ai a laua talosaga.

“O le o atu faatasi ma lo’u aiga i le malumalu ua fesoasani e faamalosia atili ai la’u molimau,” o le tala lea a Brother Gill. “Ina ua uma la matou malaga i le malumalu, sa pei e tele ni mea o ia te au e avatu i le Alii. … Sa matuai manaia ma faatupu faatuatua le malaga atu i le malumalu, e faigata ona faamatalaina i ni upu.”

A o i ai iina, sa mafai foi e Tuagane Gill ona faataunuu sauniga mo lona tamā, tamamatua, ma le tamā o lona toalua, o e ua maliliu uma. Sa faia foi galuega mo lona tina, ma sa faamauina o ia i ona matua.

“O se faamanuiaga maoae mo a’u ma lo’u aiga le o atu i le malumalu,” o lana tala lea. “E fia momoli atu la’u faafetai faapitoa ma le anoano o tatalo i taitai o e na mafai ai ona faataunuuina lenei malaga i le malumalu.”

Talu mai le 1992 o le tupe, e 100 pasene e lagolagoina ai e saofaga a le au paia, o se auala lea e tuuina atu ai se malaga se tasi i le malumalu mo le au paia e nonofo i fafo atu o le Iunaite Setete ma Kanata o e e semanu e le mafai ona o [i le malumalu]. O le au paia o e fia foai atu i le tupe na o le tusi lava “Tupe mo Tagata Ulu i le Malumalu” i le vaega o le “Isi” i le lisiti masani o foai. E mafai foi e tagata taitoatasi ona foai i le tupe e ala atu i le LDS Philanthropies.

A o faagasolo le konafesi aoao ia Oketopa 2011, Sa uunaia ai e Peresitene Thomas S. Monson le au paia ina ia foai atu i le Tupe Lautele e Fesoasoani ai i Tagata Ulu i le Malumalu, e faapea, “O loo i ai lava vaega o le lalolagi e matuai mamao ese lava ia malumalu mai o tatou tagata, ma o lea latou te le gafataulimaina ai feoaiga e manaomia ina ia latou o ai i ai. Ona le mafai ai lea ona latou mauaina faamanuiaga paia ma le faavavau e maua mai i malumalu” (“A o Tatou Toe Feiloai Ai,” Liahona ma le Ensign, Nov. 2011, 4–5).

“O le faamoemoega o lenei tupe o le fesoasoani lea ia i latou e manino lava le nonofo i itu o le lalolagi lea o le a sili atu ona faigata ai ona auai atu i le malumalu,” o le faamatalaga lea a Elder William R. Walker, Faatonu Sili o le Matagaluega o Malumalu. “O lenei [tupe] e tasi le taimi e tuuina atu ai, e tuuina atu i se tagata se toatasi ina ia maua ai ona lava sauniga.”

O nisi o vaega e sili ona manaomia, na fai mai ai Elder Walker, e sau mai Aferika, le Pasefika, ma Asia. E tuuina atu e peresitene o siteki ma peresitene o misiona ia fautuaga i Au Perestiene o o latou Eria, o e taulimaina le tupe i se faiga e vaevae i lea atunuu ma lea atunuu.

I le gasologa o le 2009 ma le 2010, e tusa ma le 4,000 le au paia sa faaaogaina le tupe e malaga atu ai i se malumalu mo le taimi muamua—ma e masalo foi e na o le pau lena o le—taimi.

Na saunoa Elder Walker, ina ia mafai ona faamanuiaina ni olaga se tele i le mafai e oo i ai, latou te “vaavaai i le malumalu e mafai ona [latou] maua ai le pasese e sili ona taugofie. O le uiga o lena mea, e le faapea o taimi uma e faavae ai i le latalata pe faapea foi e i ai pe leai foi se malumalu i lo latou eria.”

O tagata taitasi o le au paia e faaaogaina le tupe, e faamoemoe foi ia latou faia se ituaiga o osigataulaga po o saofaga.

“I nisi o nofoaga e oo lava foi i le mauaina o se tusifolau e matuai taugata ma faigata tele,” o le saunoaga lea a Elder Walker. “O lea la, i nisi o eria, lea e tuua ai e le au paia o latou atunuu ina ia o atu i le malumalu, e tatau ona latou faia o latou lava tusifolau ina ia mafai ai ona faaaoga le tupe. I nisi o atunuu, e na o se aofaiga faatulagaina o le tupe. I nisi atonu e foliga mai e le o se mea e tele tele, ae mo i latou atonu e na o le pau lena o se aofaiga e mafai ona latou teuina i le ono masina.”

Fai mai Elder Walker, o i latou o e foai atu i se sini e masani lava ona latou iloa e sili atu ona latou talisapaiaina. “E toetoe lava o tulaga uma, e fai ai e tagata mea sili latou te mafaia e saofaga ai ma ua matuai faamanuiaina, ma latou te le’i manatu māmā i ai,” o lana saunoaga lea.

E faaopoopo atu i le mafai e tagata ona o atu i le malumalu, e faaaogaina foi ia tupe e faatau ai ni seti se fitu o ofu malumalu mo tagata taitoatasi ina ia mafai ona latou faamamaluina a latou feagaiga i le taimi lava e toe foi ai i le fale.

O le saunoaga a Peresitene Monson i le taimi o le konafesi, o le taimi muamua lea ua faasilasilaina ai le tupe i luma o le pulelaa e se perofeta. O lena mea, faatasi ai ma le faateleina o le manaomia o le tupe, atonu o le a oo atu ai i se faateleina o foai, o le saunoaga lea a Elder Walker.

“O loo o mai pea tagata i le Ekalesia, ma e le’i taitai ona tatou faamalieina manaoga i le tele o eria,” na ia saunoa ai. O le ta’ua o le fautuaga mai ia Peresitene Howard W. Hunter (1907–1995) i le 1994 mo tagata agavaa uma o le ekalesia e tauave se pepa faataga o le malumalu, (tagai i le “The Great Symbol of Our Membership,” Liahona, Nov. 1994, 6; Ensign, Oke. 1994, 2), sa faaauau lana saunoaga, “E toatele tagata faamaoni o le Ekalesia o e o loo i ai pepa faataga aoga o le malumalu, peitai e le’i o atu i se malumalu ma e le o i ai se faamoemoe lata mai e o atu i le malumalu.”

Fai mai Elder Walker, o le fofogaina e Peresitene Monson o le tupe na afua mai i lona faamemelo i malumalu ma lona alofa i le Au Paia o e o le a aoga i ai le tupe.

“A e alu i nei nofoaga taumamao, e te lagona le alofa i tagata ma luitau latou te feagai,” o le saunoaga lea a Elder Walker. “O lenei tupe o le a avea o se faamanuiaga i le tele o tagata.”