I le aso 1 o Novema, 2011, i se faigalotu i le Iunivesite a Polika Iaga–Provo, sa apoapoai atu ai Peresitene Thomas S. Monson i le au faalogologo ina ia “avea ma se faataitaiga amiotonu.”

I le siiina mai o upu a le Aposetolo o Paulo mai le Feagaiga Fou—“Ia fai oe ma faaaoao i e ua faatuatua, i le upu ma le amio, ma le alofa, ma le loto, ma le faatuatua ma le le gaoia” (1 Timoteo 4:12)—Sa faailoa atu e Peresitene Monson lona naunau ina ia avea tagata o le Ekalesia ma se malamalama i le lalolagi.

“O le a le malamalama?” na ia fesili ai. “Ou te fiafia i le tali faigofie ‘o se mea e susulu.’ O le tuuina atu o se faataitaiga o le amiotonu … e mafai ona fesoasoani e faamalamalamaina ai se lalolagi ua faateteleina le pogisa.”

Sa ia ta’ua e faapea, o le toatele, o le malamalama ua mu itiiti lava lea ua toetoe a pe. Na saunoa o ia, o i tatou, o lo tatou tiute o le faatumauina o le mumu o a tatou sulu mo isi ia iloa ma mulimuli mai ai, lea e manaomia ai lo tatou talitonu.

“O i tatou taitoatasi e nafa lava ma le atiina ae o le faatuatua e manaomia e ola ai faaleagaga ma faailoa atu ai lo tatou malamalama ina ia iloa e isi,” na ia saunoa ai. “Ia manatua o le faatuatua ma le masalosalo e le mafai ona i ai faatasi i le taimi e tasi.”

O nisi o auala lelei lava e maua ma faatumau ai le faatuatua, na faamalamalama atu ai e Peresitene Monson, o le faitau ma suesue i tusitusiga paia ma ia tatalo e le aunoa ma le filiga.

“Ua e faitauina le Tusi a Mamona? Pe ua e faataitaia le folafolaga o loo maua i le Moronae?” na ia fesili mai ai. Sa ia uunaia i latou sa auai ina ia faataatia ese se taimi i aso taitasi ina ia latou iloa ai mo i latou lava pe moni le Tusi a Mamona, “aua o le a suia ai lou loto, ma o le a suia ai lou olaga,” na ia saunoa ai.

Sa ia siiina mai le 3 Nifae 12:16—“O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tama o i le lagi”—Sa faamalamalama mai e Peresitene Monson e faapea, o Keriso o le “‘malamalama moni lea na te faamalamalamaina tagata uma lava, i lona maliu mai i le lalolagi’ (Ioane 1:9), o se malamalama e ‘pupula i le pouliuli” (Ioane 1:5).

Sa ia faaiuina e faapea: “O o tatou avanoa e susulu atu ai e le mafaitaulia. … A o tatou mulimuli i le faataitaiga a le Faaola, o le a avea i tatou ma avanoa e avea ai ma malamalama, e pei ona sa i ai, i olaga o i latou o loo siomia i tatou.”