Tuuatoatasi ae Le o Tuulafoaia

Na aoaoina e matua o Iuana o ia a o tamaitiiti e mulimuli i tulaga faatonuina ina ia manuia lona olaga. O nei aoaoga na fesoasoani ia te ia e tuputupu a’e ma atiae ai ana taleni. “Talu mai lou laitiiti, na ou faatuina ni sini i le Peraimeri ma Alii Talavou ina ia aoao i mea faifaaili,” sa ia faamalamalama mai ai. “Ou te taina le vaiolini, fagufagu, piano, ma o le taimi nei o le kitara. E sili atu lou fiafia i le kitara.”

E faatu foi e Iuana ni sini mo le malosi patino e faavae i le Faataunuuina o Lou Tiute i le Atua. Na ia aoaoina le tae kwon do, aau, ma tagafiti, ma na i ai foi o ia i le au tamomoe a lana aoga.

“Ou te fiafia e aoao. O le mea lena ou te faia ai lava le luitau ia aoao se mea faifaaili fou po o se taaloga, ia aoao se isi mea,” na ia fai mai ai.

O nei sini na lagolagoina se faamoemoega sili atu. “O mea uma na ou faia, mea uma na ou aoaoina, sauniuniga faaletino uma lava, o sini uma lava na ou faatuina—o mea uma lava sa i ai lava le faamoemoega o le alu i se misiona,” sa ia faamalamalama mai. “Ma o le alu i se misiona ua na o se vaega o se isi sini: ina ia faamauina i le malumalu ma avea o se tane lelei.”

E ui lava i na taulaiga loloto, ua iloa e Iuana e le faigofie le tumau i le ala sao. O nai tausaga ua mavae na ia mauaina le tele o le malosi mai alii talavou matutua atu i lana uarota. Ae o le toatele o i latou ua malaga ese po o ua auai i le korama a toeaina, ae tuua Iuana ma nai uo laiti i le Lotu e lagolagoina o ia pe a faigata le olaga. I na taimi, na saili atu e Iuana le malosi mai ona matua ma ona tei—ma lona Tama Faalelagi.

“E te maua sina lagona o le tuuatoatasi i nisi taimi ona e ese ou tulaga faatonuina, e ese le auala e ola ai, o le taulimaina o isi tagata, ma le sailia o mea eseese i le olaga. Ae o le mea moni lava,” le faaopoopo mai a Iuana ma le mautinoa, “e le tuuatoatasi lava oe. Matou te tatalo soo, ma e mafai ona matou latalata atu i le Tama Faalelagi. Ou te tatalo i taimi uma ina ia maua le malosi e fai ai le mea sao, ia maua le toa e tu atu ai i au uo pe a latou faia ni mea e le sao.

“Ma, e te silafia?” sa ia faaauau ai. “O nisi taimi e tau mai e au uo ia te au latou te faamemelo i au faataitaiga ma le malosi e mafai ai ona ou fai atu leai.”

O nisi o faaosoosoga na feagai ma Iuana na faigofie ona tetee. E faigofie lava ona ia fai atu leai pe a valaaulia o ia e se uo e inu mea inu malolosi. O se soliga manino lena o poloaiga.

“Ae i ai taimi e sili atu ai ona faigata faaosoosoga,” le faamalamalama mai a Iuana. “E pei ona taua i tusitusiga paia, o nisi taimi e faafoliga [tagai i le Mataio 7:15]. E mafai ona foliga mai faaosoosoga e pei e leai se mea e leaga ai ona latou te foliga mai e le solia ai se poloaiga patino. O le taimi lena e tatau ai ona e tatalo ia iloa le mea o loo tupu ina ia aua nei e le mautonu. Na fesoasoani mai le Agaga ia te au ia malamalama i lenei mea i le tele o taimi pe a i ai se mea ua sese pe taumafai foi tagata ia ou faia ni mea leaga.”

A o sauni Iuana mo lana misiona, na ia maua ni uo fou i le Ekalesia na lagolagoina o ia.

“Ua avea nei au ma faataitaiga i isi talavou, ma o se faamanuiaga lenei ia te au,” sa ia fai mai ai. “Ua fesoasoani ia te au e malamalama ai o le taumafaiga ina ia malosi, ina ia faamaoni, e i ai lona taua.”