Hem I Bin Brekem Ol Rop blong Ded

Wan naet, taem ol pikinini blong mifala i bin smol, mifala i bin stap gat taem blong famle skripja. Mifala i bin stap ridim abaot Sevya mo stap tokbaot olsem wanem Hem i neva mekem wan mistek.

Samtaem afta, long naet ia, waef blong mi i putum gel blong mitufala we i gat tri yia, Susi, i go long bed. Susi i lukluk long mama blong hem, mo talem: “Mama, Jisas i bin mekem wan mistek.”

Mama blong hem i askem: “Yu minim olsem wanem?”

Susi i talem: “Hem i bin brekem wan samting.”

Mama blong hem we i wari smol, i askem: “Wanem nao hem i bin brekem?”

Susi i ansa: “Jisas i bin brekem ol rop blong ded.”

Waef blong mi i bin luksave se hem mo Susi, tufala i bin singsing long singsing blong Praemeri “On a Golden Springtime” plante taem, mo Susi i bin lanem ol toktok ia we i talem se long wan gol springtaem, Jisas i bin wekap mo i aot long tumb we Hem i bin silip long hem; Hem i bin brekem ol rop blong ded.¹ Mama blong Susi i bin eksplenem se blong brekem ol rop blong ded i minim se Jisas i bin laef bakegen long ded blong mekem se yumi evriwan i save laef bakegen afta we yumi ded.

Storian ia i bin givim taem long waef blong mi mo mi, plante janis blong tijim ol gel blong mitufala, Lisi, Susi, mo Ema, abaot wanem tru mining blong Atonmen long wanwan long yumi. Susi i bin talem stret: Jisas i bin brekem ol rop blong ded. Be hem i no bin wan mistek. Hem i bin presen we i moa bigwan we Hem i save givim! (Luk long Doctrine and Covenants 14:7.)

Sevya i bin ded mo i bin laef bakegen long ded blong mekem se yumi save laef bakegen wetem Papa blong yumi long Heven mo ol famle blong yumi folem hamas laef blong yumi i stret mo gud. Sapos yumi klin inaf, yumi save stap glad long ol blesing blong gat wan bodi we i nomo save ded mo blong gat laef we i no save finis wan dei. Mi talem tangkyu se Jisas i bin brekem wan samting—ol rop blong ded!