Ol bluberi mo Buk blong Momon

Sam yia i pas, famle blong mifala i bin muvaot long bigfala taon we laef i spid i fasfas i go long wam smol, rurol propeti aotsaed long wan kwaet smol vilej. Kolosap, i gat wan bluberi fam we man i nomo stap long hem, mo tru long ol fren blong ol ona, mifala i bin kasem raet blong pikimap ol bluberi we mifala i bin wantem.

Plante moning taem, long evri wik long sama taem ia, mifala i hivimap trak wetem ol baket, ol bag, mo spendem wan naes gud aoa blong pikimap ol bluberi. Wan moning, yangfala boe blong mifala, Haeram, i luk olsem we hem i no wantem kam wetem mifala. Hem i talem se hem i save stret se hem i pikimap evri bluberi mo bae mifala i westem taem blong gobak bakegen. Hem i bin sapraes tumas blong faenem fulap bluberi olsem dei bifo. I bin gat ol hip long ples we mifala i no bin luk, mo sam long bluberi we oli gat fulap jus oli bin gro long ol branj we hem i bin sua se hem i bin luk long hem bifo.

Long semfala taem ia, ol lida blong yut long wod oli bin givim jalenj long ol yangfala blong ridim ful Buk blong Momon bifo skul i stat long manis Ogis ia. Ol pikinini blong mifala oli bin tekem jalenj ia i go hom, mo famle blong mifala i bin komitim blong joenem olgeta long bigfala wok ia.

I no longtaem nating afta we mifala i bin finisim Buk blong Momon, nao Ogis 2005 Ensign i kam, wetem jalenj blong Presiden Godon B. Hinkli (1910–2008) blong ridim ful Buk blong Momon bifo long en blong yia. Haeram mo brata blong hem Josef oli bin glad tumas—oli ting se mifala i bin obei long profet finis! Nao, ol bigfala brata mo sista blong olgeta, Set mo Betani, i bin talem gud long tufala se Presiden Hinkli i bin stap askem yumi blong ridim bakegen, nomata hamas taem mifala i bin mekem finis.

“Be from wanem? Ol boe oli askem. “mifala i bin ridim evri toktok, mo wanem moa i stap blong ridim bitim wanem we mifala i bin ridim finis?”

Afta sam taem we ples i kwaet evriwan, wan i tokbaot ol bluberi: “Tingbaot se yumi bin ting se yumi bin pikimap evri bluberi? Be taem yumi bin gobak, i gat moa bluberi i stap—oltaem! Nomata hamas taem yumi bin stap go, nomata se i no longtaem nating, oltaem i gat ol blubleri we oli hip i stap.”

Kwiktaem mifala i bin luksave samting we i joen i stap. Semmak olsem fam we i bin stap kolosap mo fulap saplae blong hem blong ol naes blueberi, Buk blong Momon i stap oltaem olsem wan ples blong fidim mifala long saed blong spirit wetem ol niufala trutok blong faenemaot. Mekem se mifala i bin stat bakegen blong ridim Buk blong Momon.

Taem mi bin akseptem jalenj blong profet, mi bin ridim ol samting long Buk blong Momon we mi bin ridim finis plante taem bifo, be mi lukluk long olgeta long wan defren wei, o mi bin andastanem olgeta taem oli fit insaed long ol niu situesen o jalenj. Mi save se evri taem we yumi ridim Buk blong Momon wetem tru hat, yumi save kasem ol niu tingting mo kam kolosap moa long Sevya.