Mi Bin Filim se Mi Mas Kam

Tu mo haf yia afta we mi bin baptaes long Buenos Aeres, Arjentina, ol toktok blong wan long ol elda we i bin tijim mi i stap ring yet long sora blong mi: “Mi save se yu yu wan misinari.” Mi tingbaot tu, ansa we i gat paoa we mi bin kasem taem mi bin prea blong save sapos filing we i bin stikim hat blong mi i bin tru o nogat. Taem mi kasem 20 yia, mi bin save se mi mas rere blong go long wan misin.

Be olsem wanem nao bae mi kam olsem wan misinari? Mi mi no olsem enjel yang man we i bin tijim gospel long mi. Olsem wanem nao bae mi lego wok blong mi? Bae mi stap wea afta we bae mi kambak hom? I bin had finis blong faenem ples ia we mi bin gat, nomata we i wan smol rum long bak blong haos blong wan man.

Taem mi bin stap go hom long naet ia, ol filing ia mo ol tu tingting ia oli kambak long maen blong mi. Taem mi kasem hom, mi traem mekem wan desisen. Mi bin disaed blong nildaon mo mekem wan prea blong kasem help. Taem mi bin mekem olsem, mi gat strong filing se bae mi mas go luk fren blong mi, Leandro, wan fren we i bin givhan plante long mi long taem we i bin had.

Be, tingting ia se bae mi go wekemap hem long medelnaet i mekem se mi holemtaet tingting ia. Mi bin save se hem i stap girap eli blong go long wok, mo mi no bin wantem blong noknok long doa blong hem long taem olsem. Mi traehad wetem tingting ia be mi bin gohed blong filim se mi mas go luk hem. Be yet, mi jusum blong no folem tingting ia.

Be mi go wokbaot raon long ples blong pulum sam gudfala win. Taem mi tingbaot se mi bin livim doa blong mi i bin open, mi stat blong wokbaot i gobak long haos. Taem mi go insaed, mi luk Leandro i sidaon insaed long rum blong mi. Spirit i foldaon long mi, mo mi nomo save toktok. Wetem wan voes we i stap jokjok, mi bin askem hem, “Yu stap mekem wanem long ples ia?”

Hem i talem se: “Mi no save. Mi jes filim blong kam luk yu.”

Mi talem long hem abaot ol fulap tingting we mi bin gat blong go long wan misin. Hem i talem testemoni blong hem long mi mo i bin leftemap tingting blong mi. Afta, hem i bin helpem mi blong fulumap ol misin pepa blong mi, we mi bin tekem i go long bisop blong mi long nekis moning. Tu manis afta, mi kasem koling blong mi blong go long Arjentina Salta Misin.

Mi save se fren blong mi i bin wan tul long han blong Lod long naet ia, mo wetem evri hat blong mi, mi bin save se Papa long Heven i bin lisin mo i bin ansarem ol prea we oli talem wetem wan tru hat mo wetem wan tru tingting.