Bae Mi Ded Nao!

Olsem wan nes blong wan bisi yunit long hospital, mi bin kasem telefon kol wan dei long saed blong wan sikman we nem blong hem i Bill, we i jes go long operesen. Hem i sapos blong go long wan kea yunit we i spesel be oli bin sendem i kam long mi from yunit ia i bin fulap.

Sikman i kam i no longtaem afta wetem famle blong hem. Mi bin glad blong luk se hem i wekap, i save ples we i stap long hem, mo mi no luk se tingting blong hem i lus tumas.

Afta we mi jekem hem mo kam blong save hem mo famle blong hem long rum blong hem, mi go aotsaed blong raetem wan not long jat blong hem. Taem mi stat blong raet olsem, mi harem wan voes i talem: “Gobak long rum blong hem.” Mi bin stop blong raet mo lukluk i gobak biaen long mi. I no gat man i stap. Mi ting se tingting blong mi nomo i bin harem wan voes, be wantaem nomo, mi bin harem voes ia seken taem—mo i laod moa.

Mi ron i gobak long rum blong Bil blong faenem se nek blong hem i bin dabol long saes, mo hem i gat trabol blong pulum win. Mi ting se karotid blong hem i brok, nao mi putum han blong mi long nek blong hem wetem raet han mo prestem i go daon mo mi yusum lef han blong mi blong ringim dokta we i bin katem hem. Dokta ia i talem se bae i sendem wan tim i kam tekem Bill kwiktaem. “Mo yu no tekemaot han blong yu!” hem i talem.

Taem mi stap gohed blong prestem nek blong hem, mi luk wan buk blong Jos we mi save gud kolosap long bed blong Bill. “Yu wan memba blong Jos?” mi askem.

Hem i traem blong sakem hed blong hem mo afta, i talem se hem i wan odinens wokman insaed long Atlanta Jojia Tempol. Hem i sarem ae blong hem smol mo krae mo talem, “Bae mi ded nao!”

Mi bin talem long hem se bae hem i no ded, mo talem stret: “Bae mi mared long Atlanta Tempol long nekis manis, mo yu mas stap long taem ia.” Tim blong dokta blong katem man i kam mo oli pulum Bill i go.

From we mi bin glad tumas long ol plan blong mared ova long manis we i folem, kolosap mi foget abaot Bill, we i bin hapen se hem i nogud long wan meresin. Be taem we waef blong tempol presiden i lidim mi i go long siling rum long dei blong mared blong mi, mi bin luk wan fes we mi save: waef blong Bill, Jojia. Taem mi talem long hem se bae mi mared, hem i go faenem Bill. Smol taem bifo we seremoni i stat, doa i bin open mo hem i kam insaed. Afta long sam wik blong hed i soa, draot, mo taed, Bill i bin filim gud inaf long dei ia blong kam long tempol, mo i no bin luksave se i bin dei blong mared blong mi.

Tu yia afta, oli bin singaotem hasban blong mi mo mi blong kam olsem ol odinens wokman insaed long Nasvil Tenesi Tempol. Taem mifala i bin kasem tempol blong oli setem mitufala apat, wan naes man i holem doa mo openem long mi mo i talem: “Welkam long Nasvil Tempol!” Hem i bin Brata Bill.

Mitufala i bin givim seves tugeta blong tri yia. Bill i stap talem long evriwan se mi bin sevem laef blong hem, be mi bin save se Lod i bin sevem hem. Long wei ia, Hem i bin tijim mi olsem wanem i impoten blong folem ol toktok we oli kam long Spirit.