Te 182raa o te amuiraa rahi matahiti e te mau tauiraa feia faatere i roto i te Hitu Ahuru, te Episekoporaa Faatere Rahi, e te Sotaiete Tauturu.

« Eita tatou paatoa e ô i roto hoê noa iho fare », ta te peresideni Thomas S. Monson, te peresideni o te Ekalesia, i parau i te tuhaa pureraa matamua no te 182raa o te amuiraa rahi matahiti i te 31 no mati 2012, « ua ti‘a ia tatou i teie nei ia faaroo i te tereraa o teie amuiraa na roto i te mau rave‘a maere o te afata teata, te ratio, te haapurororaa pee‘utari e te Itenati—e tae roa’tu i roto i te mau matini iti afa‘ifa‘i. Te amui nei tatou, to tera e tera reo, i roto i tera e tera fenua, hoê râ to tatou paatoa faaroo e hoê haapiiraa tumu e hoê opuaraa ».

Ua tano roa te reira parau no te hau i te 100.000 taata tei tae mai i te mau tuhaa pureraa no te amuiraa rahi i roto i te Pû amuiraa i Roto Miti, i Utah, i te mau Hau Amui no Marite, i te 31 no mati e te 1 no eperera—no te tau milioni taata atoa tei mata‘ita‘i e aore râ tei faaroo mai i te mau haapurororaa na roto i te afata teata, te radio, te pee‘utari, e te Itenati. Na roto i te haapurororaa ti‘a anei e aore râ te mau haapuroro-faahou-raa, ua farii e aore râ e farii atu te mau melo e te tahi atu mau taata na te ao atoa nei i te reira na roto i na 94 reo.

Oia atoa hou te haamataraa o te amuiraa rahi, e rave rahi mau melo o te Ekalesia tei patapata i ni‘a i ta ratou mau materia ihi apî no te ani manihini i te tahi taata ia hi‘o i te amuiraa. E riro te mau faanahoraa faatianianiraa apî « widgets », « banners », e « info graphics » tei tuuhia i te ava‘e mati ra, na roto i na reo rau, i te tuu-faahou-hia’tu i ni‘a i te conference.lds.org i te mau hepetoma hou te amuiraa rahi tata‘itahi.

E rave rahi tauiraa teie ravehia i rotopu i te feia faatere o te Ekalesia i te tuhaa pureraa no te avatea mahana maa ; i roto i te reira te haamauruuraa o te mau melo no te Episekoporaa Faatere Rahi e te peresideniraa rahi o te Sotaiete Tauturu. Ua haamauruhia Elder Steven E. Snow i roto i te peresideniraa no te Hitu Ahuru ; na reira atoa na 37 Hitu Ahuru Area. No te tapura o te mau patururaa e te mau haamauruururaa, a hi‘o i te api 27.

Ua piihia ei Episekoporaa Faatere Rahi, te mau taea‘e Gary E. Stevenson, ei Episekopo Faatere Rahi; Gérald Caussé, ei tauturu matamua, Dean M. Davies, ei tauturu piti. Ua piihia ei peresideniraa rahi no te Sotaiete Tauturu, te mau tuahine Linda K. Burton, ei peresideni, Carole M. Stephens, ei tauturu matamua; e Linda S. Reeves, ei tauturu piti.

Ua piihia Elder Richard J. Maynes no te pŭpŭ matamua no te Hitu Ahuru ia tavini i roto i te peresideniraa no te Hitu Ahuru.

Ua piihia ei melo no te pŭpŭ matamua no te Hitu Ahuru, na taea‘e i muri nei, Elder Larry Echo Hawk, Elder Robert C. Gay, e Elder Scott D. Whiting. Ua faanuuhia mai te pŭpŭ piti no te Hitu Ahuru i te pŭpŭ matamua, na taea‘e i muri nei, Elder Craig A. Cardon e Elder Stanley G. Ellis.

Ua tavini te episekopo H. David Burton i pihai iho i to’na na tauturu i roto i te Episekoporaa Faatere Rahi hau i te 16 matahiti. Te vai ra te tahi mau Episekopo Faatere Rahi tei tavini maoro a‘e, aita râ e Episekoporaa Faatere Rahi tei tavini maoro a‘e ia ratou tootoru.

A tai‘o i te parau no te feia i pii-apî-hia mai i te api 135 e haere atu.