Faariro i te amuiraa ei tuhaa no to tatou oraraa

Ua faaite mai te peresideni Dieter F. Uchtdorf e piti parau faufaa ta’na e hinaaro ia tatou ia haamana‘o ia tae noa mai te hinaaro ia hamani ino i te hoê taata (api 70) Te haamana‘o ra anei outou i teie na piti parau ? A paraparau e to outou mau metua no ni‘a i te te tahi o te mau raveraa ta’na i parau mai e faaea. A feruri i te rave‘a no outou no te riro rahi a‘e mai ia Iesu Mesia ia au i ta outou mau raveraa ia vetahi ê.

Ua paraparau Elder Russell M. Nelson no ni‘a i te mau aravihi o to tatou tino tahuti (api 77), e ua haapii Elder Ronald A. Rasband e, ua here to tatou Metua i te Ao ra ia tatou noa’tu aita to tatou mau tino i te mea maitai roa (api 80). Eaha to outou mana‘o no to outou fana‘oraa tino ? A feruri i te mau ohipa rau ta to outou tino e nehenehe e rave. Ia pure outou, a feruri i te mau mea ta outou e nehenehe e haamauruuru i te Metua i te Ao ra, no teie ihoa râ horo‘a.

Ua matau anei outou i te tahi taata tei ui i na toru uiraa ta te peropheta i parau i roto i ta’na a‘oraa i te tuhaa pureraa no te po‘ipo‘i sabati ra (api 90): « No hea mai tatou ? No te aha tatou i ô nei ? I hea tatou e haere ai ia faaru‘e tatou i teie oraraa ? A tai‘o i ta’na pahonoraa i teie mau uiraa e a feruri i te mau rave‘a no outou ia faaite i te reira mau parau mau i mau taata tei ore â i ite i te reira mau pahonoraa.

Te vai ra te tahi mau taata aita e maramarama ra e, te tiaturi nei te Feia Mo‘a i te mau Mahana Hopea Nei ia Iesu Mesia e te pee nei ratou Ia’na. Tai‘o i te a‘oraa a Elder Dallin H. Oaks, « Tusia », e a feruri i teie faahitiraa i muri nei: « To tatou oraraa tavini e te tusia, o te faaiteraa tano roa a‘e ïa no ta tatou fafauraa ia tavini i te Fatu e i to tatou taata tupu » (api 19). Eaha te mana‘o e mahiti mai no ni‘a i to outou iteraa papû no te Faaora ia hi‘ohia ana‘e te huru o to outou oraraa ?

Ua haapii Elder Quentin L. Cook e, « ia ore te tari‘a o te taata e haru i te ta‘iraa reo o te faaroo, ua atea roa ïa oia i te reni a te Varua » (api 41). A feruri na i te hoê upaupa aita i tano to’na ta‘iraa e a feruri atoa na i te tumu no taua upaupa ra i te ta‘iraa tano ore. Eaha te mau mea taa ê ta outou e nehenehe e rave ia ape i te oreraa « e haru i te ta‘iraa reo o te faaroo » ?

E rave rahi taata a‘o i roto i teie amuiraa tei paraparau no ni‘a i to ratou utuafare—e utuafare afa melo anei, e utuafare metua otahi anei, e aore râ e utuafare e faaruru ra i te tahi mau ati rau. Eaha ta teie mau taata a‘o i haapii mai mai to ratou utuafare e eaha ta ratou i au i reira ? Eaha ta outou e here e e au nei i to outou iho ? E nahea ta outou e nehenehe e paturu e e faateitei i te mau melo no to outou utuafare ?

Ua haapii te peresideni Boyd K. Packer e, « Te hoê o te mau iteraa apî e te rahi no te ti‘araa metua, o to tatou ïa haapii-rahi-raa no ni‘a i te mau mea faufaa a‘e na roto mai i ta tatou mau tamarii, o te mea ho‘i aita i noaa mai na roto mai i to tatou na metua ». (api 6). Mai te mea e metua outou , a feruri na i te mau haapiiraa rahi ta outou i apo mai mai to outou mau tamarii, mai te peu aita outou i te metua, a feruri i te mau haapiiraa ta outou i apo mai mai te mau tamarii o ta outou i matau. A feruri ia faaite i te reira mau haapiiraa —na reira atoa te taime outou i apo mai i te reira —i to outou hoa faaipoipo, te tahi hoa, ta outou mau tamarii, e aore râ te tahi atu taata.

E nehenehe ta tatou e faaorahia mai te ino ia fariu tatou i te mau haapiiraa o te mau papa‘iraa mo‘a, o ta Elder L. Tom Perry ia i haapii mai (api 94). E nahea ra te mau haapiiraa o te mau papa‘iraa mo‘a i faaora ia outou ? E nahea te reira i tauturu ia outou e ma‘iti i te maitai ?

E rave rahi a‘oraa e haatumu nei i ni‘a i a te mau fafauraa, te mau fafauraa ihoa râ o te hiero. A feruri i te mea ta Elder Robert D. Hales i parau: « A paraparau atu ia tatou iho i roto i te hi‘o e a ui, ‘I hea vau i te ti‘araa mai te au i ta’u mau fafauraa?’ » (api 34). A feruri i ta outou iho pahonoraa e peneia‘e atoa i te mea ta outou e nehenehe e rave no te haapa‘o maitai a‘e i ta outou mau fafauraa—e na reira e ani manihini ia vetahi ê ia rave i ta ratou iho e ia ora i te reira.

Ua paraparau Elder Jeffrey R. Holland (api 31), Elder Neil L. Andersen (api 111), e te tahi atoa no ni‘a i i te aupĭpĭraa e te nuuraa ia haere i te Mesia. Eaha te faito o ta outou iho nuuraa ei pĭpĭ ? Eaha te mea ta outou i haapii mai mai teie mau a‘oraa e te tahi atu â no ni‘a i te haere-tamau-raa i te Faaora ?

Ua haapii mai Elder D. Todd Christofferson e, « te opuaraa tumu a te Ekalesia o te haapii ïa i te evanelia a Iesu Mesia, Ta’na haapiiraa tumu, i te ao taatoa nei » (api 86). A tai‘o faahou i te a‘oraa a Elder Christofferson e te a‘oraa atoa a Elder Donald L. Hallstrom (api 13) e i reira a feruri eaha mau te evanelia a Iesu Mesia. Eaha te mau taime maitai i roto i to outou utuafare, to outou piiraa e ta outou mau faahoaraa e nehenehe ai outou e haapii i te reira ?