Sa Ou Filifili e Faalogo

O tausaga ua mavae sa amata ai ona faalavelave soo mai se lagona e tatau ona ou tuufaatasia se tusikuka a le aiga, e aofia ai ni fua o kuka mai i lo’u aiga lautele. Sa ou faataatiaina ese lea manatu. Sa masani ona ou mafaufau ifo ia te au lava, “E leai so’u taimi e fai ai se na tusikuka faavalevalea! O loo i ai sa’u fanau pisi e toaono! O le faiga o tusikuka e mo ituaiga tina o loo faatoa tau amata ona faia-ni falaoa, ma ni pani sinamoni. E leai so’u taimi mo lena mea!”

Sa tumau lava ia te au lea lagona malosi mo le tele o tausaga seia oo i se tasi aso, sa ou filifili ai loa e mafaufau loloto i ai. Ae sa ou mafaufau po o ai o lo’u aiga o le a fia auai ai. Sa na o a’u le tagata o lo’u aiga e auai i le Ekalesia, ua maliliu o’u matua, e leai ni ou uso ma ni tuagane, ma o le toatele lava o lo’u aiga lautele e mamao mea e nonofo ai. Ae peitai, sa ou filifili lava e faalogo i le uunaiga.

Sa ou faafesootaia lo’u aiga, ma faamatala i ai o loo ou tuufaatasia se tusikuka a le aiga ma valaaulia i latou e aumai ni fua o kuka. I le aluga o le tausaga na sosoo ai, sa ou maua mai ai ni nai fua. Sa auina mai foi e nisi o lo’u aiga ni tala ma ni ata o le aiga. O lenei mea sa uunaia ai au e faatalanoa nisi o tagata sili ona matutua o lo’u aiga na soifua pea ma ao mai lo’u talafaasolopito faaleaiga, lea na ou filifili foi e faaaofia i le tusi.

I le tuufaatasia ai o le tusi, sa ou iloaina ai, ou te le’i iloaina le toatele o tagata o le aiga o e na auina mai ia fua o kuka. Ona o lenei mafuaaga, sa ou filifili ai e faaaofia ai ma se gafa o le aiga. Sa ou fesili atu mo faamatalaga a tagata uma, tusi le gafa o le aiga, ma tuu loa i le tusi.

A o ou toe tilotilo tasi i le tusi ua maea, sa ou sueina i le itulau o le gafa o le aiga ma oo ai ina lofituina a’u i le Agaga. Sa maligi ou loimata ina ua ou manino lelei i le mafuaaga na tatau ai ona ou tuufaatasia lenei tusikuka “faavalevalea”. Sa laitiiti lava se mea e uiga i fua o kuka. Sa ou tuufaatasia igoa ma aso o augatupulaga o o’u tuaa. Ua mafai nei ona faia galuega o le malumalu o nei tagata uma. Ma le isi, sa ou faasaosaoina ni tala matagofie mo tupulaga i le lumanai.

O le taimi nei o loo matou fesootai pea e le aunoa ma nisi o o’u tausoga ma fiafia ai i se mafutaga matagofie faatasi ma lo’u aiga lautele. A ou vaai i la’u tusikuka, e masani ona ou mafaufau i le mau, “O le mea lea, aua le faavaivai i le faia o mea lelei, ona o lo o outou faataatiaina le faavae o se galuega tele. Ma o mea iti e tutupu mai ai mea tetele” (MFF 64:33). O loo ou maofa pea pe a ou nofo ma mafaufau i le fiafia ma mea matagofie uma na oo mai ona o le usitai i se uunaiga ma tuufaatasi ai se tusikuka faatauvaa.