Faitalia ma Musumusuga

Tulaga e suesue ai numera 1: Sa i ai se alii e igoa ia Oliva Kaotui. … Sa ia tusitusia upu na faitau atu e le Perofeta a o nofo le Agaga i ona luga i le faagasologa o le faaliliuga (i le taimi na faaliliuina ai le Tusi a Mamona). O le taimi lena sa faalelava le matua po o le silafia faaleagaga o Uso Kaotui, ma sa ia sailia ma manao e fai se mea sa i tua atu o lona malosi faaleagaga i lena taimi. Sa oo ina manao o ia e faaliliu. Ma o lea sa ia [fai atu] ai i le Perofeta, sa molimoli atu e le Perofeta le mataupu i le Alii, ma sa la maua ai se faaaliga. Na fetalai le Alii, “Oliva Kaotui e, e moni, e moni, Ou te fai atu ia te oe, e pei ona mautinoa o loo soifua le Alii, o lē o lou Atua ma lou Togiola, o le a faapea lava ona mautinoa ona e maua o se malamalama e uiga i soo se mea e te ole mai ai i le faatuatua, ma le loto faamaoni, ma le talitonu o le a e maua.” Ma o le mea e tasi na te ono maua ua faamatalaina o “se malamalama e uiga i togitogiga o talafaamaumau tuai, ua mai anamua, ia ua i ai vaega na o a’u tusitusiga paia na fetalaia e ala i le faaaliga a lo’u Agaga.”

O le taulimaina ai o le faafitauli faapitoa, na faaali mai ai e le Alii se mataupu faavae e faatatau i ai ma isi tulaga uma faapena: “Ioe, faauta, o le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto. O lenei, faauta, o le agaga lenei o faaaliga” (MFF 8:2–3). …

… Ma sa ole atu o ia. Ma e pei ona outou silafia, na te le’i mafaia; sa matuai le mafai lava ona ia faaliliu. … Sa toe molimoli atu le mataupu i le Alii, o lana folafolaga lea sa laua taumafai e faafetauia; ma sa oo mai le tali, sa oo mai le pogai, sa le mafai ai ona ia faaliliu: “Sa e le malamalama; sa e manatu o le a Ou tuu atu ia te oe lena mea, ae e te lei mafaufau i ai ae nao lou ole mai ai ia te a’u” (MF&F 9:7).

Ia, e foliga mai, na o le pau lena o le mea sa faatonuina o ia e fai, ia ole atu i le faatuatua; ae o loo afifi mai i le ole atu i le faatuatua le tulaga e manaomia muamua, ia tatou faia mea uma i lo tatou malosi e ausia ai le sini ua tatou sailia. Tatou te faaaoga le faitalia ua faapea ona faaeeina mai ia i tatou. Tatou te faaaogaina soo se taleni ma le gafatia ma le tomai ua ia i tatou e maua ai avanoa o loo aafia ai. Ia, o le faaliliuga lea o le Tusi a Mamona, o le filifilia o se avā, o le filifilia o se galuega, o le faia o soo se tasi o mea taua e 10,000 e tutupu i o tatou olaga. …

Ia, o le tulaga e suesue ai numera 2: … Sa oo atu [Sa Iareto] i vai o le a latou sopoia, ma sa fetalai atu le Alii i [le uso o Iareto], “Fau ni vaa.” …

[O vaa] o le a faaaogaina i lalo o ni tulaga e uiga ese ma faigata, ma sa manaomia e [le uso o Iareto] se mea e sili atu nai lo mea na i ai ia i latou i lena taimi: sa ia manaomia se ea. Ma o se faafitauli lenei sa le oo i ai lona malosi. O lea sa ia molimoli atu ai le faafitauli i le Alii, ma ona sa matuai le mafai lava ona oo i ai lona malosi e fofo ai le faafitauli, o lea sa fofo ai e le Alii mo ia ma fetalai mai, “Fai le mea lena ma o le a outou maua ai le ea.”

Ona toe fesili lea o le uso o Iareto—ua ia maua le to’a aua sa talanoa i le Alii, aua sa talanoa atu o ia ma maua mai tali—: … “O le a se mea matou te faia mo le malamalama i totonu o vaa?”

Ma sa talanoa le Alii ia te ia e uiga i ai mo sina taimi, ona Ia fetalai mai lea: “O le a se mea tou te mananao ia ou faia ina ia outou maua se malamalama i totonu o o outou vaa?” (Eteru 2:23). I se isi faaupuga, “… Ua ou tuuina atu ia te outou le faitalia; ua faaeeina atu ia te outou le gafatia ma le tomai. O laia e fofo le faafitauli.”

Ia, sa maua e le uso o Iareto le savali. Sa alu ae o ia i luga o se mauga na taua o Selema, ma fai mai le tala, sa ia “gaosi mai se papa ni maa laiti e sefulu ma le ono; ma sa papae ma manino ia maa, e pei lava o se tioata manino” (Eteru 3:1). …

Ma sa faapea ona fai e le Alii le mea na talosagaina e le uso o Iareto, ma o le taimi lenei na vaai ai o ia i le tamatamai aao o le Alii; ma, a o i ai i lena siosiomaga, sa ia maua se faaaliga na sili mamao atu nai lo soo se isi lava mea na maua e soo se perofeta e oo atu i lena taimi. Sa tele atu mea na faaali mai e le Alii ia te ia e faatatau i Lona natura ma uiga nai lo se isi lava taimi muamua seia tau mai i lena taimi, ma sa oo mai nei mea uma ona sa ia faia mea uma na mafai ona ia faia ma ona sa filifili faatasi ma le Alii.

O loo i ai se paleni tutusa i le va o le faitalia ma musumusuga. Ua faamoemoe tatou te faia mea uma i lo tatou malosi tatou te mafaia ona saili lea o se tali mai le Alii, o se faailoga mautinoa ua tatou ausia le faaiuga sa’o; ma o nisi taimi, i le fiafia, ma le isi, tatou te maua upumoni ma le malamalama faaopoopoina tatou te le’i mafaufauina.

O lenei, o le tulaga e suesue ai numera 3: I talaaga o le popofou o le Ekalesia, sa poloaiina ai e le Alii le Au Paia e faapotopoto i se nofoaga faapitoa i Misuri. … Ia matau le mea na tupu. O le Alii o loo fetalai:

“Ma o lenei e pei ona Ou tautala atu e uiga i la’u auauna o Eteuati Paterika, o le laueleele lenei o le laueleele lea o lona alaalafaga, ma i latou o e ua ia tofia mo ona fesoasoani; ma o le laueleele foi lea o le alalafaga o ia o le ua Ou tofia e tausia lo’u faleteuoloa;

“O le mea lea, ia tuu atu ia te i latou e aumai o latou aiga i le laueleele lenei, e pei ona latou taupulepule ai i le va o latou lava ma a’u” [MF&F 58:24–25; ua faaopoopo le faamamafa]. …

Tou te silafia, na fetalai le Alii e “faapotopoto” i Siona. Ae peitai, o faamatalaga ma feutagaiga, o le faapefea ma le o afea ma tulaga, e tatau ona iloiloina e le faitalia o i latou o e ua valaauina e faapotopoto, ae e tatau ona latou filifili ma le Alii. …

Ia, ina ua uma ona ta’u atu e le Alii lenei mea i le Au Epikopo Pulefaamalumalu o le Ekalesia, sa Ia tuuina mai le mataupu faavae na taitaia ai lena tulaga, ma e taitai ai i tulaga uma. Ma o se tasi lenei o a tatou upumoni mamalu ua faaalia mai. Na Ia fetalai:

“Aua faauta, e le tatau ona ou poloai atu i mea uma; aua o ia o lē e tau faamalosia i mea uma, o ia lava lea o se auauna paie ma lē poto; o le mea lea e le maua e ia se taui.

“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele” [MF&F 58:26, 27; ua faaopoopo le faamamafa]. …

Ia, o tulaga na e tolu e suesue ai; sei o tatou o mai la i le faaiuga na faaali mai. …

… Afai e te iloa ona faaaoga le faitalia ua tuuina mai e le Atua ia te oe, ma afai e te taumafai e fai a oe lava faaiuga, ma afai e te oo i faaiuga e lelei ma sa’o, ma e filifili faatasi ma le Alii ma maua mai Lana faamaufaailoga o le faamaoniga o faaiuga ua e faia, mo se mea e tasi; ma mo se isi mea, o le a e maua le taui tele o le ola e faavavau, o le siitia i le aso o le gataaga. …

Ua foai mai e le Atua ia i tatou le poto i nei mea. Ua foai mai e le Atua ia i tatou le lototele ma le malosi e tutu ai i o tatou lava vae ma faaaoga lo tatou faitalia ma gafatia ma malosi o loo ia i tatou; ia sei o tatou matuai faamaulalo ma usitai i le Agaga ia gauai atu o tatou loto i Lona finagalo, ia maua mai Lana faamaoniga, faamaufaailoga o le faamaoniga, ina ia maua i o tatou olaga, i lena auala, le agaga o faaaliga. Ma afai tatou te faia faapea, o le a le fesiligia lava le taunuuga: o le filemu i lenei olaga; o lona matagofie ma le mamalu ma le malualii i le olaga a sau.