Na Lagona Lava o le Mea Sa’o Lea

E tele auala e fesootai mai ai le Agaga. Sa ou oo i ni taimi o le toafilemu, lagona o le mafanafana, ma le manino o le mafaufau. O nisi o o’u manatu sili ona malolosi e oo mai o se lagona o le moni po o le sa’o. E faigata ona faamatala le lagona, ae e i ai iina pe a e iloaina lava e moni se mea pe e manaomia ona e faia se mea.

O se tasi o aafiaga sili ona mamana na ou maua i lenei lagona o le taimi na sue ai so’u fale e faatau. Sa ou nofofua ma sa ou mafaufau mo ni nai tausaga e faatau so’u fale. Sa ou ta’u atu i le tagata o le ofisa faatau fale le mea sa ou sailia, ma sa ia faia se galuega lelei tele i le sueina o fale e fetaui ma la’u faamatalaga. Na te faaali mai ia te au ni fale, ae ou te musu ai leaga ou te le’i lagonaina o le fale sa’o lea. Sa amata ona ia fesili mai pe o a mea ou te le manao ai i ia fale taitasi ina ia ona faaali faalelei mai ia te au ni fale e fetaui ma lo’u manao. O le mea na leaga ai, sa le mafai ona ou faamatalaina lelei atu mea na misi.

Mulimuli ane, i se tasi aoauli sa ma savavali ai i totonu o se fale sa le tutusa lona manaia ma nisi o fale sa ma matamata ai. Sa fai si taugata teisi atu nai lo isi fale. Sa fetaui ma la’u faamatalaga o le mea sa ou ta’u i ai sa ou manao ai, ae sa le atoatoa e pei o isi fale sa ou vaai i ai. Ae ui i lea, ina ua uma ona ma matamata i totonu, sa ou fai atu i le tagata faataufale, sa ou manao ou te tauofo i ai. Sa foliga mai sa fai si ona te’i i lo’u naunau e faagaoioi vave loa. Pe a mafaufau atu i lo’u faatuatuai i masina na muamua atu, sa sa’o o ia i lona faate’ia. Peitai o le lagona e faapea, o le fale lenei e tatau ona ou nofo ai sa toetoe lava a lofituina. Ou te le’i lagonaina se manao e taofi sei mafaufau i ai.

Sa tuu i ai la’u ofo, ma sa taliaina e tagata na faatau maia le fale la’u tauofo, e ui lava i le mea moni e faapea, sa le o le ofo aupito maualuga lea na latou mauaina. Sa ou fai atu i lo’u aiga sa ou iloaina sa tatau ona ou nofo i lena fale, e ui ou te le’i iloaina pe aisea.

Sa fai si vave ona ou iloaina le mafuaaga sa tatau ai ona ou nofo iina. Sa ou feiloai i se tamaitai i le uarota a le au nofofua i totonu o se masina talu ona ou siitia atu i le fale. O le silia laitiiti ma le tausaga mulimuli ane, sa ma tootutuli ai i le fatafaitaulaga i le malumalu, lea na faamauina ai i maua o se tane ma se ava.

E moni lava e galue le Alii i auala ofoofogia. Sa leai ma so’u mafaufau sa Ia taitaiina atu au i se faaipoipoga e faavavau ina ua Ia fesoasoani mai ia te au e filifili se fale. Na pau le mea na ou iloaina sa taialaina au e fai lenei laasaga, ma ua ou iloa nei o lena taitaiga na sau mai i Lona Agaga.