O Le Anapogi e Faamalosia ai i Tatou Faaleagaga ma Faaletino

Ua avea le anapogi ma se vaega o le talalelei a Iesu Keriso talu mai taimi o le Feagaiga Tuai (tagai, mo se faataitaiga i le, Tanielu 9:3; Ioelu 2:12). O le anapogi e faamalosi ai faaleagaga ia tagata ma faateleina ai le tauaogaina o a latou tatalo (tagai i le Isaia 58:6–11). O aso nei, e anapopogi tagata O Le Ekalesia a Iesu Keriso o le Au Paia o Aso e Gata Ai ma tuuina atu tupe na semanu latou te faaaluina i meaai i le Ekalesia e fesoasoani ai i e matitiva ma le tagolima.

“Ua atofaina e le Ekalesia le Aso Sa e tasi i masina taitasi, e masani lava o le Aso Sa muamua, o se aso o le Anapogi. O le faamamaluina o lenei Aso Sa anapogi e aofia ai le le ‘ai ma le le inu mo ni taumafataga sosoo se lua [o se periota e 24-itula], auai i le sauniga anapogi ma molimau, ma le tuuina atu o se taulaga anapogi e fesoasoani ai i le tausiga o e o loo manaomia le fesoasoani.

“O lau taulaga anapogi e tatau ona le itiiti ifo ma le tau o aiga e lua e te le’i taumafaina. Afai e mafai, ia e limafoai ma tuuina atu ia sili atu nai lo lenei tau.

“E le gata i le faamamaluina o aso anapogi ua faatulagaina e taitai o le Ekalesia, ae e mafai foi ona e anapogi i soo se aso lava, e tusa ma ou manaoga ma manaoga o isi. Ae peitai, e le tatau ona e anapogi faalausosoo pe [anapogi] foi mo ni vaitaimi uumi.”¹ O e o i ai se tulaga faalesoifua maloloina e faateleina le faaletonu pe a anapogi e tatau ona faaaoga tatau le atamai e fetuutuunai ai lo latou ala.

E anapopogi tagata o le Ekalesia mo faamoemoega eseese. Mo se faataitaiga, e mafai ona tatou anapogi ma tatalo mo se tagata o le aiga o ma’i. E mafai ona tatou anapogi e faailoa atu le agaga faafetai i le Atua, e atiina ae se lotomaulalo faateleina, e foia se vaivaiga po o se agasala, ia maua musumusuga mo o tatou tiutetauave faale-Ekalesia, ma isi lava mea. O le anapogi e fesoasoani tatou te lagona ai le agaalofa ia i latou o e aafia soo i le fiaaai. O le anapogi foi e fesoasoani i o tatou agaga e manumalo i le tino.

• O le anapogi o lona uiga o le volenitia e le ai pe inu mo le faamoemoega o le faalatalata atili atu i le Alii ma talosaga atu mo Ana faamanuiaga.

• Ua uunaia i tatou ia limafoai i a tatou taulaga anapogi: e faaaoga e le Ekalesia le tupe e fesoasoani ai i e matitiva ma le tagolima.

• O le Aso Sa anapogi e aofia ai le tuuina atu o molimau i le sauniga faamanatuga.

• E sili atu le tauaogaina o le anapogi pe a o faatasi ma le tatalo.

• O le anapogi e masani ona faatinoina e tagata talitonu faamaoni. Mo se faataitaiga, o tagata Iutaia anamua, sa anapopogi mo Eseta ina ia mafai ona ia talosaga atu i le tupu mo le puipuiga o lona nuu (tagai i le Eseta 4:16).