Weteaki iroun te Atua ao ni Kamatoaki irouia Aomata

Ngkai ngaira membwa n te Ekaretia, ti aki toki ni kaoaki bwa ti na kamatoaia aomata n nakoaia ake a weteaki iai. Tabeua te ririki n nako temanna ataein te reirei ae 18 ana ririki e kaotia nakoiu nanon katabuan ana toro te Uea. I teimatoa ni kakabwaiaki man te katooto aei.

E a tibwa moana ana moan ririki n te reirei ae rietata. E aki koro ana ririki ngke e bwabetitoaki imwain ae kitana mweengana ni moana ana reirei n te iuniwetiri ae rietaata. I riki bwa ana bitiobi n te iuniwetiri.

Ngke e a waaki te reirei, e reke au tai ni maroro ma ngaia n ana aobiti te bitiobi. I uringa teutana te moan ni marooro anne e taekina ana kanganga n ana tabo ae boou, ma n na bon aki maninga taekan ara kauoua ni marooro.

E tuangai bwa e na kawarai n au aobiti. I rangin ni kubanako ngke e kangai, “Ti kona ni uaia n tataro, ao I kona ni karaoa te tataro?” I kuri n taekinna ae I a tia n tataro ao ni kantaningaia naba bwa e a tia naba. Irarikina I kariaia.

E moana ana tataro ma te koaua are e ataia bwa te bitiobi e rineaki iroun te Atua. E tuanga te Atua bwa e na tuangai te bwai ae na karaoia n te bwai ae onrake n te tamnei. Te ataeinimwaane e tuanga te Atua bwa e ataia raoi bwa te bitiobi e ataa kainnanona ao e na tuangaki te bwai ae kainnanoia bwa e na ongo.

Ngke e taetae, kabuanibwai aika e na kaitarai a roko n au iango. Te reirei e bebete ma e rangin ni matata aron taekinana: tataro n tainako, karinei taian tua, ao tai maaku.

Te ataeinimwaane anne, teuana ana ririki n te Ekaretia, e reireinaki n te katooto tera ae kona ni karaoia te Atua nakon te tia kairiiri ngke e katabuaki man aia onimaki ao aia tataro naake e weteia bwa ana riki bwa taan kairiiri. Te ataeinimwaane anne e karaoia ibukiu mwaakan iango aika bwainaki n te Ekaretia (taraa D&C 26:2). Engae ngke e weteia Ana toro te Uea n te kaotioti, a kona ni waaki ti ngkana a tia ni katabuaki irouia naake a tia ni weteaki bwa ana beku.

Ti karaoi berita aika a korakora, ngkana ti anga ara rinerine ni kamatoa. Ti berita n tataro ibukin ana toro te Uea bwa E na kairiia ao ni kakorakoraia (taraa D&C 93:51). Ti berita bwa ti na taratarai ao ni kantaningai n namakina ana kaunganano mai iroun te Atua n aia kauntira ao n taai ake a karaoi iai weteakiia (taraa D&C 1:38).

Te berita anne e na kainnanoia ni kabouaki inanora n tainako. Ami tia reirei n Tabati e na kataia n reirei man te Tamnei, ma tii ngkana ko kona ni karaoia, am tia reirei e kona ni karaoi kairua imatan te kiraati. Ngkoe, n arona, ko kona ni baireia n ongora ao ni mataku ibukin te tai ngkana ko namakina rokon te kaunganano. N te taina ko na ataia bwa kairua aika a uarereke ao e mwaiti riki kakoaua bwa te Atua e kamatoa te tia reirei anne.

Ngkai ti katei bai ni kamatoa te aomata, ti kabaeira nakon te mwakuri ibukin are e kantaningaia te Uea bwa te aomata e weteaki bwa e na katia. Ngke a uarereke natira, kainnabau e weteaki bwa e na reireiniia ataei aika uarereke n ara uoote. I aki tii kateibai ni kamatoa, ma I tataro naba ibukina ao imwiina ni bubuti bwa e na buokaki. Te reirei are I karekea n te kakaitau ibukin are a karaoia aine ao ana tangira te Uea ibukiia ataei e bon kakabwaia naba au utu ao maiu.

I tibwa taetae ma te kairake n ataeinimwaane are e kamatoa ana bitiobi n ririki aika nako. I reiakinna bwa te Uea ao aomata a tia ni kamatoa ni weteana bwa te mitinare, bwa te titeiki beretitenti, ao ngkai te karo. E taku ni motin ara marooro, “I bon tataro naba ibukim ni katoabong.”

Ti kona n nanomatoa n tataro ni katoabong ibukin wetean temanna iroun te Atua bwa e na beku ibukira. Ti kona ni karabwa temanna are e a tia ni kakabwaiaira man ana mwakuri. Ti kona ni baireia n anganano ngkana temanna are ti a tia ni kamatoa e bubuti ibukin te anganano.¹

Naake a tabekiarake ana toro te Uea n Abanueana a na kamatoaaki ni mwaakana ae akea kabotauana. Ti bane ni kainnanoa te kakabwaia anne.