Adto sa Mission Home!

Pagkasunod buntag sa akong pag-uli sa Ghana gikan sa akong misyon sa Ivory Coast, mibangon ko pagka 6:00 sa buntag. Ang sabut nako sa presidente sa stake para sa akong release inigka hapon pa, busa mihukom ko nga mobalik sa pagtulog. Samtang padulong nako nga matulog, usa ka impresyon dali nakong nahunahunaan. “Adto sa mission home sa Cape Coast.” Kahibalo ko sa mission home sa Ghana Cape Coast, apan wala koy ideya nganong kinahanglan ko nga moadto nianang buntag.

Human niining panghunahuna, misugod ko og kabalaka sa impresyon, busa miadto ko sa mission home. Sa akong pagpadulong didto nabalaka ko kon unsa ang akong isulti sa presidente sa misyon. Nasayud ko nga siya mangutana kanako sa katuyoan sa akong pagbisita, mao nga nag-andam ko og angay nga tubag.

Sa akong pag-abut, wala pa gihapon ko kahibalo sa tubag. Ang presidente sa misyon, Melvin B. Sabey, midapit kanako sa iyang opisina, naghunahuna nga miadto ko didto aron iya kong i-release. Human sa pagpangutana og pipila ka pangutana, si Presidente Sabey miingon kanako nga moadto ko sa presidente sa stake aron ma-release.

“Kahibalo ko niana, President,” mitubag ko.

Siya mihunong sa pipila ka segundo ug dayon nangutana siya kanako sa pangutana nga naglisud ko sa pagtubag: “Nganong ania ka karong buntaga, Elder Mobio?”

“President Sabey, wala koy angay nga tubag alang niana nga pangutana,” mitubag ko. “Basta lang karong buntaga aduna koy kusog nga impresyon nga moanhi dinhi.”

Siya mihunong og kadiyot ug hinay nga misulti kanako, “Elder Mobio, ang imong presensya dinhi mao ang tabang nga akong giampo kagahapon.” Siya mipasabut nga ang iyang mga assistant bag-o lang miabut uban sa bag-ong mga misyonaryo. Usa kanila usa ka Ivorian, ang unang misyonaryo nga iyang nadawat nga mosulti lang og French, ug wala siya masayud kon unsaon sa pagkigsulti kaniya. Dayon siya mideklarar, “Sigurado ko nga ang Langitnong Amahan nakadungog sa akong problema kagahapon sa gabii.”

Sa katapusan nahibaloan na nako ang rason sa akong impresyon nianang buntaga. Dayon miadto mi sa bag-ong mga misyonaryo, ug ako ang mihubad para sa Ivorian elder sa dihang iyang gisugdan ang iyang misyon.

Pipila ka bulan ang milabay mibiyahe ko og balik sa Ivory Coast aron bag-uhon ang akong passport ug sa pagpakigbahin niadtong talagsaon nga kasinatian ngadto sa akong presidente sa misyon. Siya miingon kanako, “Kita mga instrumento diha sa kamot sa Ginoo. Siya nasayud kon unsaon ug kanus-a ta gamiton diha sa Iyang buhat.”

Nasayud ko nga kon atong ipahinungod ang atong kaugalingon niining mahimayaong buhat sa Langitnong Amahan, kita dili angay nga mabalaka. Kinahanglan lang nga mosunod kita sa mga pagdasig sa ligdong, hinay nga tingog ug ang Ginoo mogiya kanato.