Ang Inyong Buluhaton sa Aaronic Priesthood

Ang usa ka deacon mahimong maayo nga ehemplo alang sa kaubang mga miyembro sa korum ug sa ubang mga miyembro sa Simbahan. Siya magpuyo og matarung nga kinabuhi ug magpabiling takus sa paggamit sa priestood.

Siya mopasa diha sa sakrament. Kini mao ang usa sa labing sagrado nga mga buluhaton sa usa ka deacon. Samtang ang deacon mobuhat niini nga katungdanan, siya usa ka representante sa Ginoo. Siya kinahanglang takus sa pagdala sa mga simbolo sa sakrament ngadto sa mga miyembro sa Simbahan. Siya kinahanglang magsinina ug molihok sa paagi nga mopakita sa sagradong kinaiyahan sa sakrament. Kon mahimo, siya kinahanglang mag-polo og puti.

Ang deacon nagserbisyo isip ministro, “sa pagbantay sa simbahan” (D&P 84:111). Siya usab “magpasidaan, magpatin-aw, mag-awhag, ug magtudlo, ug magdapit sa tanan sa pagduol ngadto kang Kristo” (D&P 20:59). Kini nga responsibilidad naglakip sa pag-fellowship sa mga miyembro sa korum ug sa ubang mga batan-ong lalaki, pagpahibalo sa mga miyembro sa mga miting sa Simbahan, mamulong diha sa miting, pagpakigbahin sa ebanghelyo, ug pagpamatuod.

Siya nagtabang sa bishop sa “pagpangalagad … sa temporal nga mga butang” (D&P 107:68). Kini nga responsibilidad mahimong maglakip sa pagpundok sa mga halad sa puasa, pag-amuma sa kabus ug nanginahanglan, pag-atiman sa mga meetinghouse ug sa nataran, ug pagserbisyo isip mensahero sa bishop alang sa mga miting sa Simbahan.

Siya nag-apil sa instruksyon sa korum pinaagi sa pagkahimong aktibo nga estudyante diha sa ebanghelyo. Ubang mga katungdanan naglakip sa pagtabang sa mga miyembro nga matubag ang ilang temporal nga mga panginahanglan, pag-andam ug paghatag og misyonaryo nga pagserbisyo, pagsuporta ug pagtabang sa presidente sa korum, pagpaaktibo sa batan-ong mga lalaki nga iyang kaedad sa korum, ug pagkat-on sa ebanghelyo.

Mahimo sa teacher ang tanang responsibilidad sa deacon. Siya aduna usab sa mosunod nga mga responsibilidad:

Siya ang moandam sa sakrament. Responsibilidad sa mga teacher sa pag-andam kanunay sa sakrament alang sa miting sa sakrament. Ang pag-andam sa sakrament usa ka maayong ehemplo sa pagbuhat og serbisyo nga dili magdahum og pagdayeg sa pagbuhat niini. Sa kasagaran ang mga miyembro wala maghunahuna nga ang mga teacher mao ang moandam sa sakrament, apan gihimo gihapon ang pagserbisyo, ug ang Ginoo nahimuot tungod kay kini ang tinuod nga serbisyo.

“Ang katungdanan sa magtutudlo mao ang pagbantay diha sa simbahan sa kanunay, ug magpaduol ug maglig-on kanila” (D&P 20:53). Usa ka paagi sa paghimo niini mao ang pagserbisyo isip usa ka home teacher.

Siya ang “motan-aw nga walay kadautan sa simbahan, ni kapintas sa usag usa, ni pamakak, paglibak, ni pagsulti og mga dautan” (D&P 20:54). Kini nga responsibilidad naglakip nga mahimong peacemaker pinaagi sa pagtabang sa mga miyembro nga magkasinabtanay. Siya moawhag niadtong nagpalibut kaniya nga tan-awon kanunay ang maayo sa uban.

Siya ang “motan-aw nga ang simbahan magkatigum sa kanunay, ug usab ang pagtan-aw nga ang tanan nga mga sakop naghimo sa ilang katungdanan” (D&P 20:55). Lakip niini nga responsibilidad mao ang pagdapit sa uban sa pagsimba.

Mahimo sa priest ang tanang responsibilidad sa deacon ug teacher. Siya aduna usab sa mosunod nga mga responsibilidad:

Siya ang mo-officiate diha sa lamesa sa sakrament. Ang pasidungog sa pagpahigayon sa sakrament gihatag ngadto sa mga priest, kinsa mohatag sa mga pag-ampo sa sakrament. Ang priest kinahanglang pamilyar sa mga pag-ampo sa sakrament, magsinina og tarung, ug manghugas sa iyang kamot sa dili pa mopahigayon niini nga ordinansa. Labaw sa tanan, ang mga priest kinahanglang takus sa pagpahigayon niining sagrado nga ordinansa isip representante sa Manluluwas.

Laing katungdanan sa priest mao ang pagbunyag kon tugutan sa bishop o presidente sa branch (tan-awa sa D&P 20:46). Ang bunyag pinaagi sa may eksaktong awtoridad mao ang usa sa labing mahinungdanon ug sagradong ordinansa sa Simbahan, kay pinaagi niini nga ordinansa kita nahimong mga miyembro sa Simbahan, mapasaylo sa atong mga sala, ug maanaa sa dalan paingon sa celestial nga gingharian.

“Ang katungdanan sa pari mao ang pagpamulong, pagtudlo, pagpatin-aw, [ug] pag-awhag” (D&P 20:46). Kini nagpasabut nga ang priest gitawag sa pagtudlo sa uban sa mga baruganan sa ebanghelyo. Ug aron makatudlo sa mga baruganan sa ebanghelo, siya kinahanglan nga magkat-on una kon unsa kini. Kini nga responsibilidad dako og matabang samtang siya nag-andam sa pagserbisyo og full-time nga misyon.

Siya ang “moduaw sa balay sa matag sakop, ug pag-awhag kanila sa pag-ampo sa dayag ug sa tago, ug pag-amuma sa tanan nga mga katungdanan sa banay” (D&P 20:47). Ang priest nagbuhat niini samtang siya nagtuman sa iyang responsibilidad nga mahimong home teacher ug mobisita sa mga pamilya nga na-assign kaniya.

Siya may awtoridad sa pagtugyan sa Aaronic Priesthood ug mo-orden sa ubang mga priests, teacher, ug deacon kon tugutan lamang sa bishop o presidente sa branch (tan-awa sa D&P 20:48). Ang gahum sa pagtugyan sa Aaronic Priesthood sagrado.

Bisan tuod ang awtoridad sa priesthood ihatag lamang ngadto sa takus nga mga lalaki nga miyembro sa Simbahan, ang mga panalangin sa priesthood maanaa sa tanan—ug kining mga panalangin susama alang sa mga lalaki ug babaye, mga batang babaye ug lalaki, sa datu ug kabus. Ang tanang mga anak sa Dios adunay kahigayunan sa pagdawat sa samang makaluwas nga mga ordinansa sa priesthood.

Isip pinili nga mga anak nga babaye sa Dios, ang tanang batan-ong mga babaye nga nabunyagan nakadawat usab sa gasa sa Espiritu Santo. Sila adunay katungod nga magtinguha ug mapanalanginan sa espiritwal nga mga gasa, sama sa “gasa sa mga pinulongan, pagpanagna, pagpadayag, mga panan-awon, pagpang-ayo, pagpanghubad sa mga pinulongan, ug uban pa” (Mga Artikulo sa Hugot nga Pagtuo 1:7). Samtang ang batan-ong mga babaye nagpuyo nga matarung ug naningkamot sa pagserbisyo sa uban pinaagi sa pagdawat ug pagpalambo niining mga gasa sa Espiritu, ang ilang ehemplo sa kaayo mahimong dako nga impluwensya ngadto sa batan-ong mga lalaki nga nagpalibut kanila.

Sa unsang paagi nga ang batan-ong mga babaye makatabang sa batan-ong mga lalaki nga mahimong takus nga tighupot sa priesthood? Usa ka batan-ong lalaki mitubag: “Sa akong hunahuna duha sa mahinungdanong butang mao ang pagsinina og tarung ug magmabination sa tanan. Ang tarung nga sinina makatabang kanako nga limpyo ang akong hunahuna, ug makadiretso ko og tan-aw nila samtang nag-istorya!”

Samtang kamong mga deacon, teacher, ug priest makasabut ug motuman sa inyong mga katungdanan sa priesthood, kamo makasinati sa hingpit nga kalipay nga moabut gikan sa pagpangalagad sa mga ordinansa sa priesthood, sa pagserbisyo sa uban, ug pagdapit sa tanan nga moduol ngadto kang Kristo. Sa ilang mensahe ngadto sa mga tighupot sa Aaronic Priesthood, ang Unang Kapangulohan misulat: “Ang Langitnong Amahan adunay dako nga pagsalig ug paglaum diha kanimo ug adunay usa ka importante nga misyon alang kanimo nga pagatumanon. Motabang Siya kanimo samtang ikaw mag-ampo ngadto Kaniya, mamati sa mga pag-aghat sa Espiritu, mosunod sa mga kasugoan, ug motuman sa mga pakigsaad nga imong nahimo’ (Pagtuman sa Akong Katungdanan ngadto sa Dios [2010], 6].”