O Le Mamalu ma le Faatulagaga o le Perisitua

“I le 1976 sa faia ai se konafesi aoao faale-eria i Copenhagen, Tenimaka. Ina ua maea le sauniga faaiu, sa faapea ona manao ia Peresitene Spencer W. Kimball [1895–1985] e asiasi atu i Vor Frue Church, lea o loo tutu ai ia faatagata Thorvaldsen o le Christus ma le Au Aposetolo e Toasefululua. …

“I le pito i luma o le falelotu, i tua atu o le fatafaitaulaga, o loo tu ai se faatusa masani o le Christus ma Ona aao o loo aapa i luma ma e pei o loo faaloloa, o lima o loo faaalia ai faailoga o fao, ma le manua i Lona itu o loo iloa lelei atu lava. I ona itu o loo tutu ai faatusa o Aposetolo, o Peter e pito i luma i le taumatau ma isi Aposetolo i le faasologa.

“O le toatele lava o le matou vaega sa i ai latalata i le pito i tua o le falelotu faatasi ai ma le teufanua. Sa ma tutu faasasao ma Peresitene Kimball i luma o le faatusa o Peteru faapea ma Elder Rex D. Pinegar ma Johan Helge Benthin, peresitene o le siteki a Copenhagen.

“I lima o Peteru, na faaalia i le maamora, ia se seti mamafa o ki. Sa tusi atu Peresitene Kimball i na ki ma faamalamalama mai lo latou faauigaina. Ona sosoo ai lea ma se faatinoga o le a le galo ia te a’u, sa faasaga atu o ia i a Peresitene Benthin ma se naunautai e le masani ai, ma tusi atu lona lima ia te ia ma faapea atu, ‘Ou te manao e te ta’u atu i tagata uma i Tenimaka, o a’u o loo umia ia ki! O loo tatou umia ia ki moni, ma tatou te faaaogaina i aso uma.’

“O le a le galo lava ia te au lena tautinoga, lena molimau mai se perofeta. O le faatosinaga sa malosi faaleagaga; ae o le lagona sa faaletino i lona aafiaga.

“Sa matou savavali atu i tua o le falelotu lea sa tutu uma ai le matou vaega. O le tusi atu i faatagata, sa saunoa atu ai Peresitene Kimball i le teufanua agalelei, ‘O Au Aposetolo nei ua maliliu.’ Sa tusi mai lona lima ia te au, ma fai mai, ‘O Aposetolo soifua nei. O Elder Packer o se Aposetolo. O Elder Thomas S. Monson ma Elder L. Tom Perry o ni Aposetolo, ma o a’u o se Aposetolo. O i matou o Aposetolo soifua.

“‘E te faitau e uiga i le Au Fitugafulu i le Feagaiga Fou, ma o le toalua lenei o Fitugafulu soifua, o Elder Rex D. Pinegar ma Elder Robert D. Hales.’

“O le teufanua, o lē e oo mai i lena taimi sa leai ni ona lagona sa faaalia, ae na faafuasei lava ona maligi ona loimata.

“Sa ou lagonaina sa ou maua se aafiaga o le olaga atoa.”²

“O le perisitua e sili atu nai lo o se isi o ona tofi. A maua e se tasi le Perisitua Arona po o le Mekisateko, e tuuina atu ia te ia e ala i le faaee o lima. A uma ona faaee atu le perisitua i ona luga, e faauuina o ia i se tofi i le perisitua. O tofi uma e maua mai o latou pule mai le perisitua.

“O le perisitua e le mavavaeeseina. E tutusa lava le tele o le perisitua e i ai i se toeaina ma se Aposetolo (tagai i le MF&F 20:38). A maua e se alii le perisitua, na te mauaina atoa lava. Ae peitai, e i ai tofi i totonu o le perisitua—vaevaega o le pule ma tiutetauave. E mafai e se tasi ona faaaoga lona perisitua e tusa ai ma aia tatau o le tofi ua faauuina pe ua vaetofia i ai o ia. …

“O ai lava e umia le Perisitua Mekisateko po o le perisitua maualuga atu ua umia uma foi le pule o le perisitua Arona po o le perisitua maualalo.”³

“O le faamatalaga e faapea ua taua o le perisitua maualalo e le faapea e faaitiitia ai le taua o le Perisitua Arona. Na fetalai le Alii e manaomia i le Perisitua Mekisateko. (Tagai i le MF&F 84:20.) Soo se tasi e umia le perisitua maualuga e tatau ona lagona le fiafia tele e faataunuu sauniga o le Perisitua Arona, aua e taua tele faaleagaga.

“Ua ou tufaina le faamanatuaga a e o au o se tasi o le Korama a Aposetolo e Toasefulua. Ou te tau atu ia te outou, sa ou lagona le agaga faafetai ma le faamaualalo e le mafai ona faamatalaina e fai le mea e ono manatu i ai nisi o se galuega masani. …

“O aso anamua sa latou faamoemoe ma le fiafia i le togiola a Keriso e ala i le sauniga o le osigataulaga. Tatou te toe tepa i tua i lena lava mea e tasi na tupu e ala i le sauniga o le faamanatuga.

“O le osigataulaga na i ai muamua, ma le faamanatuga mulimuli ane, e totonugalemu ia Keriso, o le faamaligiina o Lona toto, ma le togiola sa Ia faia mo a tatou agasala. O aso na ma aso nei o le pule e faataunuu ai nei sauniga e a le Perisitua Arona lea.

“E moni lava o lenei tiutetauave o se tiutetauave paia ma e aofia ai oe i se faaleusoga ma na auauna anamua a le Alii. E leitioa a tatou lagona le faamaualalo tele pe a tatou auai i sauniga ua tofiaina i le Perisitua Arona. …

“O nai vaega toalaiti o outou o loo saofafai mai nei iina o ni tiakono, aoao, ma ositaulaga, o le a i ai se aso e saofafai atu ai iinei o ni Aposetolo ma ni perofeta ma o le a pulefaamalumalu i le Ekalesia. E ao ona outou saunia.

“O le mea lena e sa’o lelei ai lava le ta’ua o le Perisitua Arona o le perisitua sauniuni.”⁴

“O le tofi toeaina o se valaauga lea e mamalu ma paia, e i ai le pule ma le mana faaleagaga. O le upu ‘faamoemoe’ o lona uiga o loo tulimatai atu ma e mafai ona avea ma toeaina. O le taimi nei ou te tautala atu ia te i latou i le aso nei, ma le iloa atonu e toatele lava nisi o le a aoga i ai lenei savali. …

“Afai o le a outou toe foi mai i le siosiomaga o loo tautalagia ai upumoni faaleagaga, o le a toe fetuleni mai i o outou mafaufau mea na outou manatu ua galo atu. O mea na le faaaogaina ma le faagaoioia o le a toe mapuna ae. O le a segia lo outou malosi faalemafaufau e malamalama ai i ia mea. …

“Afai o le a outou malaga mai ma faatasi ma le Au Paia, o le a vave ona outou toe malamalama i le gagana o musumusuga. Ma o le a sili atu ona vave ona outou iloa e foliga mai tou te lei o ese atu. Faauta i le matua taua tele o le iloa e outou, afai o le a outou toe foi mai, e mafai ona foliga tou te lei o ese atu lava. …

“O le a le pine ona outou faalogoina le atoatoa ma le sao i Lana ekalesia atoa ma Lona malo. Ona e iloa ai lea o le manaomia tele o oe iinei atoa ma le malosi o lou siufofoga ona o mea ua e iloa mo le togiolaina o isi tagata.”⁵

“O se valaauga e sili atu nai lo o se valaaulia po o se talosaga. O se valaauga mai le Alii e ala mai i Ana auauna filifilia. I tausaga ua mavae, a o avea Peresitene Spencer W. Kimball, ma peresitene o se siteki i Arisona, sa i ai sona aafiaga i le tuuina atu o se valaauga. Sa i ai se avanoa i le au peresitene o le faalapotopotoga o Alii Talavou i le siteki. Sa tuua e Peresitene Kimball lana kesi i le faletupe, savalivali atu i le auala i se pisinisi e le mamao atu, ma faapea atu, ‘Siaki, e te manao e avea oe ma peresitene o Alii Talavou a le siteki?’

“Sa fai mai Siaki, ‘E, Spencer, e te le o faatatau mai ia te au.’

“Sa fai atu o ia, ‘Ioe o oe. O oe o se alii talavou, ma e te fiafia i tagata talavou. O le a avea oe ma se peresitene sili ona lelei.’

Ma o iina na tupu ai le mea sa mafaufau Peresitene Kimball sa o se talanoaga na sili ona le lelei ona sa teena e Siaki le valaauga. Sa toe alu atu o ia i le faletupe ma saofai i lana kesi, ma le le fiafia i lona toilalo. Ona oo atu lea ia te ia. Sa ia tuua lana kesi, savali atu i le auala—i le faitotoa lava e tasi, ma le tagata lava e tasi—sa valaau o ia i lona igoa atoa, ma faapea atu, ‘O le Aso Sa ua te’a sa fono ai le au peresitene o le siteki e iloilo se avanoa i le au peresitene o Alii Talavou. Sa matou tatalo e uiga i ai. Mulimuli ane, sa matou o ifo i o matou tulivae ma fesili atu ma maua mai le musumusuga mai le Alii e tatau ona valaauina oe. I le avea ai ma se auauna a le Alii, ua ou iinei e tuuina atu lena valaau.’

“Na fai mai Siaki, ‘Ia, Spencer, pe afai o le itu lena ua e faaupuina ai.’

“Ma sa ia fai atu, ‘O le itu lena ua ou faaupuina ai.’”⁶

“E tatau i toeaina uma ona iloa o se valaauga e sili atu nai lo o se valaaulia po o se talosaga, e sili atu foi i lo o se tofiga. E masani ona tatou faalogo i faamatalaga e pei o le, ‘Ua talosagaina au e auauna o se fesoasoani i le au peresitene o le korama a le au toeaina.’ E sili atu ona talafeagai le faapea, ‘Ua valaauina au e auauna atu o se fesoasoani.’

“Tatou te le valaauina i tatou i tofi o le Ekalesia. Ae tatou te tali atu i le valaau a i latou o e pulefaamalumalu ia i tatou. O le tiutetauave a i latou o e pulefaamalumalu le feutagai ma le agaga tatalo ma le Alii po o le a Lona finagalo e uiga i se tofiga i le Ekalesia. O le galueaiina foi lena o le mataupu faavae o faaaliga. Ona tuuina atu lea o le valaauga e le taitai pulefaamalumalu o le o loo fai ma sui o le Alii.”⁷

“E faaeeina atu le perisitua e ala i le faauuga, e le ala atu i le faia o se feagaiga po o le maua o se faamanuiaga. Ua faapena lava talu mai le amataga. E tusa lava po o a o latou manatu na maua mai se mea na faalogo o taua pe tusia foi, i le taimi ua tea po o le taimi nei, o se faauuga faapitoa lava i se tofiga i le perisitua o se ala lea, ma e na o le pau lena o le ala ua faaee mai ai pe o faaee mai ai nei.

“Ma ua faamanino mai e tusi paia na o le pau lava le faaeega sa’o o le perisitua e sau lea mai ‘se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia’ [MF&F 42:11]. …

“Aua ne’i misia lena mea e tasi, faigofie, manino mautinoa: O le perisitua e faavavau lava ma le aunoa ona faaee atu e ala i le faauuga e mai se tasi o i ai le pule, ma e iloa e le Ekalesia o loo i ai ia te ia. Ma e tusa foi pe ua tuuina atu le perisitua, e leai se pule a se tagata e i tua atu o le mea e a le tofi faapitoa ua faauuina i ai se tagata. O na foi tuaoi e faatatau foi i se tofi e vaetofia i ai se tagata. O faauuga po o vaetofia e le faatagaina e leai se mea e ta’u atu ai, e leai se pule po o se mana o le perisitua.”⁸

“Ua lelei tele lo tatou tuuina atu o le pule o le perisitua. Ua toetoe o soo se mea ua i ai le pule o le perisitua. Ua i ai a tatou korama a le au toeaina ma faitaulaga sili i le lalolagi atoa. Ae peitai, o lo’u manatu, o le tuuina atu o le pule o le perisitua ua televave atu i le tuuina atu o le mana o le perisitua. E le o i ai i le perisitua le malosi e tatau ona i ai ma o le a le i ai seiloga e mausali le i ai o le mana o le perisitua i totonu o aiga e pei ona tatau ai. …

“Ua ia i tatou le pule o le perisitua. I le mavae ai o mea uma ua tatou faamaopoopoina ma faatulagaina, ua oo nei i lo tatou tiute o le galueaiina o le mana o le perisitua i le Ekalesia. O le pule i le perisitua e oo mai e ala i le faauuina; o le mana i le perisitua e oo mai e ala i le ola faamaoni ma usiusitai i le faamamaluina o feagaiga. E faateleina e ala i le faatinoina ma le faaaogaina o le perisitua i le amiotonu.

“O lenei, tama e, ou te toe faamanatu atu ia te outou le natura paia o lou valaauga. Ua ia te oe le mana o le perisitua ua tuusao mai le Alii e puipui ai lou aiga. E i ai taimi o le a na o le pau lava le mea e tu atu o se talipupuni i le va o lou aiga ma faaosoosoga a le fili, o le mana lena. O le a e maua le taitaiga mai le Alii e ala i le meaalofa o le Agaga Paia.”⁹

“O le mana tou te maua lea e tusa ma mea tou te faia i lea meaalofa paia ma lē vaaia.

“Tou te maua le pule e ala mai i le faauuina o outou [i le perisitua]; a o le mana, tou te maua i le usiusitai ma le tauaogaina. …

“E maua le mana o le perisitua mai le faia o ou tiute i mea faigofie: auai i lotu, talia o tofiga, faitauina o tusitusiga paia, ma le tausia o le Upu o le Poto.”¹⁰

“Tatou te le faalogo e faaaogaina e isi lotu Kerisiano ia ki o le perisitua. E foliga e ese lava le faamatalaina e nisi o i tatou e faapea o i tatou e le o ni tagata Kerisiano ae ua na o i tatou lava o loo i ai le pule ma le faatulagaga sa Ia faatulagaina.

“O le Toasefululua o loo i ai nei o ni tagata masani lava. E le o i latou, e pei foi o le uluai Toasefululua, o ni tagata iloga, ae a tuufaatasi o le Toasefululua e mamana.

“Matou te o mai mai ni galuega eseese. O i matou o saienitisi, loia, faiaoga.

“O Elder [Russell M.] Nelson o se fomai tipitipi ua leva o le fatu. …

“O nisi o i lenei Korama o ni alii o le militeli—o se aliivaa, malini, pailate.

“Sa latou umia ni tulaga eseese i le Ekalesia: faiaoga o aiga, faiaoga, faifeautalai, peresitene o korama, epikopo, peresitene o siteki, peresitene o misiona, ma le mea e sili ona taua, o tane ma tama.

“O i latou uma o tagata aoga ma faiaoga o le talalelei a Iesu Keriso. O le mea ua tasi ai i matou o le alolofa i le Faaola ma le fanau a Lona Tama ma la matou molimau e faapea, o loo tu o Ia i le ulu o le Ekalesia.

“E pei lava o se tagata, o le Toasefululua e o mai mai amataga faatauvaa, e pei o taimi sa i ai o Ia iinei. O le Toasefululua soifua ua fusia faatasi i le galuega o le talalelei a Iesu Keriso. Ina ua oo mai le valaau, sa faataatiaese e i latou taitoatasi lana upega, i se faaupuga, ae mulimuli atu i le Alii.”¹¹

“Ou te faamaonia atu ia te outou o tamalii e 14 o e ua faauuina faatasi i matou o Aposetolo moni lava. I le folafolaina atu o lenei mea, e le toe i ai se isi a’u faamatalaga nai lo mea ua aoaoina mai e le Alii, e le sili atu nai lo mea e mafai ona faaali mai i soo se tasi e saili atu ma se loto faamaoni ma le manatu tonu i ai mo se molimau patino a le Agaga.

“O nei tamalii o auauna moni a le Alii; ia usitai i a latou fautuaga.”¹²

“E tele ni tomai taua e le o ia te a’u. E tele naua ni mea o loo ou manaomia i au taumafaiga e auauna atu ai. E na o le tasi lava le mea, tasi le tomai taua e mafai ona faamatalaina ai. E pei o Peteru ma i latou uma o e na faauuina talu mai lena taimi, o loo ia te au lena molimau.

“Ou te iloa o le Atua o lo tatou Tama. Sa Ia faailoa mai Lona Alo, o Iesu Keriso, ia Iosefa Samita. Ou te tautino atu ia te outou ou te iloa o Iesu o le Keriso. Ou te iloa o loo soifua o Ia. Sa soifua mai o ia i le vaeluaga o taimi. Sa Ia aoaoina mai Lana talalelei ma sa tofotofoina [o Ia]. Sa puapuagatia ma sa faasatauroina i le aso tolu. O Ia, e pei foi o Lona Tama, o loo i ai se tino o aano ma ivi. Sa Ia faia Lana Togiola. Ou te molimau atu ia te Ia. O loo avea au ma se molimau ia te Ia.”¹³