Pag-atubang sa Umaabut nga may Paglaum

Si Brother Arnaldo Teles Grilo nahimong usa sa akong suod nga mga higala sa dihang kapin sa 20 pa ang akong edad. Sa edad nga 62, si Brother Grilo, usa na ka retired engineer, gitawag nga usa sa akong counselors sa presidency sa kadtong ginganlan sa una og Oeiras Portugal District, diin kami nagserbisyo sulod sa pipila ka tuig.

Ang iyang kaalam ug kasinatian naghatag kanako, usa ka batan-ong lider sa priesthood, og daghang bililhong tambag ug ideya. Siya positibo nga matang sa tawo; kanunay niyang tan-awon ang maayong bahin sa matag sitwasyon ug maayong mopakatawa. Ang iyang kinaiya usa ka tinubdan sa talagsaong inspirasyon niadtong nagpalibut kaniya ug ilabi na nako tungod kay nasayud ko sa lisud nga mga hagit nga iyang giatubang.

Human sa iyang paggradwar isip usa ka engineer, si Bother Grilo miapil isip tigsiksik sa National Agronomic Agency sa Portugal ug sa wala madugay mibiyahe sa usa sa mga kolonya sa Portuguese didto sa Africa aron sa pagdumala sa proyekto sa pagsiksik sa gapas. Ang proyekto nakapahimo kaniya nga makabaton og malampusong kabuhian isip senior executive sa dako nga internasyonal nga banko sa nasud. Hapit 30 ka tuig didto sa Africa, siya nagmugna og maayo nga pamilya ug nagtagamtam og haruhay nga kinabuhi hangtud ang iyang pamilya napugos sa dinalian nga pagbalik sa Portugal tungod sa trahedya sa panagbangi ug gubat.

Gibiyaan ni Brother Grilo ug sa iyang pamilya ang tanan nilang hinagoan—tanan nilang kabtangan ug personal nga mga gamit—human mismong nakasaksi sa makapagun-ob nga epekto sa gubat diha sa nasud nga ilang gihigugma.

Bisan pa sa kalibug ug kagubot tungod sa gubat nga hinay-hinayng nakapawala sa kalinaw ug kalig-on atol sa iyang katapusang mga bulan sa Africa, giluwas ni Brother Grilo ang usa sa iyang mga higala pinaagi sa paghatag kaniya og mahalon nga sakyanan nga iyang napalit sa Germany. Ang sakyanan nakatabang sa iyang higala ug sa inahan sa iyang higala nga makaeskapo sa gubat.

Ang pagkaadunahan tungod sa pagkakugihan ni Brother Grilo wala makapahanap sa iyang mga prayoridad. Siya nagpabiling nakaangkla sa lig-ong mga baruganan ug gugma alang sa iyang pamilya.

Mibalik sa Portugal sa edad nga 52, iyang giatubang ang reyalidad nga siya magsugod sa wala. Uban niining tanan nga kalisud ug trahedya, unsa ang kalainan nga nahimo sa iyang kinabuhi? Nganong siya positibo kaayo kabahin sa karon ug sa umaabut? Nganong masaligon man kaayo siya?

Si Brother Grilo namiyembro sa bago-o pa ang Simbahan sa Portugal ug nahimong lig-on nga haligi ug pioneer sa nasud. Kadaghan na niyang gidala ang iyang pamilya ngadto sa templo sa Switzerland, mobiyahe og 2,800 ka milya (4,500 km) round-trip isip pahayag sa iyang hugot nga pagtuo ug debosyon. Sulod sa mga katuigan sa iyang pagserbisyo, si Brother Grilo ug ang iyang asawa naghatag og kalipay sa ilang mga anak ug sa uban.

Ang hugot nga pagtuo ni Brother Grilo nakasentro ni Jesukristo ug sa iyang kahibalo nga sa katapusan, si Jesukristo mao ang maghari. Kini ang naghatag kaniya og paglaum sa karon ug sa umaabot.

Ang Bag-ong Tugon natapos nga may mensahe sa dakong paglaum.¹ Ang mga propeta sama ni Juan nga Tigpadayag nakakita sa mga butang nga moabut ug misulti kanato sa mga panalangin nga atong madawat kon kita magpabiling matarung ug molahutay hangtud sa katapusan.

Si Juan nakakita og usa ka libro nga may pito ka timri [seals], o mga tagal sa panahon, ug iyang gihulagway kon sa unsang paagi si Satanas kanunay nga nakig-away batok sa mga matarung (tan-awa sa Pinadayag 5:1–5; 6). Apan nakita usab ni Juan nga si Satanas napriso ug si Jesukristo mao ang naghari (tan-awa sa Pinadayag 19:1–9; 20:1–11). Sa katapusan iyang nakita nga ang mga matarung mopuyo uban sa Dios human sa Katapusang Paghukom (tan-awa sa Pinadayag 20:12–15).

Usa sa dakong hagit karon mao ang pagkat-on sa pagbuntog sa kahadlok ug kawala sa paglaum aron mabuntog ang mga pagsulay ug tintasyon. Dali lang para nato sa pagbukas sa newspaper, pag-surf sa internet, o pagpamati sa sibya sa radyo o telebisyon aron mahibaloan ang makapaluya nga mga balita sa krimen ug natural nga mga kalamidad nga nahitabo matag adlaw.

Ang pagsabut sa mga saad nga anaa sa kasulatan kon sa unsang paagi ang Ginoo mobuntog sa panulay ug sa unsang paagi ang kamatuoran makapawala sa sayop makatabang kanato sa pag-atubang sa umaabot nga may paglaum ug positibo. Sa kalibutan karon atong makita ang gubat, natural nga mga kalamidad, ug krises sa ekonomiya. Usahay kining mga panghitabo dili lamang mga butang nga atong maobserbar sa layo apan mga butang nga personal nga nakaapekto kanato.

Dili angay nga kita magmasulub-on kon mawad-an sa kalibutanong mga butang o magpunting sa temporal, tungod kay kining mga butanga makapahikaw kanato sa kalipay sa yano, mahinungdanong mga butang sa kinabuhi.

Mapasalamaton ko sa ehemplo ni Brother Arnaldo Teles Grilo. Padayon niyang giuna ang espirituhanong mga butang, mga butang nga “bililhon kaayo [kanato] sa katapusan nga mga adlaw” (2 Nephi 25:8), lakip ang relasyon sa pamilya ug pagserbisyo sa uban.

Kinahanglan natong atubangon ang umaabot nga may paglaum tungod kay kita nasayud nga ang mga pwersa sa kadautan mabuntog. Kitang tanan kinahanglang magbaton kanunay og positibong panglantaw samtang atong atubangon ang mga hagit tungod kay karon aduna kitay mga kasulatan, mga pagtulun-an sa buhi nga mga propeta, awtoridad sa priesthood, mga templo, ug ang suporta sa matag usa isip mga miyembro sa Simbahan. Kitang tanan kinahanglang “mahimo nga magmadaugon” tungod sa pag-ampo (D&P 10:5). Ug ang pinaka importante, kita kinahanglang maglaum sa kinabuhing dayon tungod sa hingpit nga sakripisyo sa pag-ula sa Ginoo (tan-awa sa Moroni 7:41).

Kon eksakto ang atong mga prayoridad, kita magpuyo og mabungahon ug mas abunda nga kinabuhi. Ang pag-una sa Ginoo, sa Iyang gingharian, ug sa atong pamilya makahatag kanato og paglaum nga atong gikinahanglan sa pag-atubang sa mga hagit karon ug sa umaabut.