Pād Iien otemjej ijo Ioļapļap

N̄e Ij kōnono n̄an mijenede ro ad reddik, emmakijkij Aō jiron̄ er bwe repād ioļāpen mijen ko aer. Men̄e rej kab itaakļo̧k raan eo ak n̄an jepļaak raan eo tokālik, Ij kajjitōk ippāer n̄an kōlmenļo̧kjeņ kōn ermake āinwōt pād iien otemjej ijo ioļapļap.

Mijinede ro rekāāl remaron̄ en̄jake bwe rejjab lukkuun imminene n̄an maron̄ wājepdik, im kōn menin rej karum̧wijļo̧k aer kōnono ak m̧akūtkūt kōn lōke im peran. Mijenede ro remminene me epaak aer kadedeļo̧k mijen ko aer maron̄ en̄jake būrom̧o̧j bwe aer mijen epojak n̄an jem̧ļo̧k, ak remaron̄ rum̧wijļo̧k aer jerbal ilo aer kōlmenļo̧kjeņ ta renaaj kom̧m̧ane ālkin mijen ko aer.

Jekdoon wāween ta im jekdoon ia rej jerbal ie, m̧ool eo ej bwe mijenede ro an Irooj rej aolep raan katōk ine ko ejjeļok jem̧ļokier kōn naan ko rem̧m̧an. Ļōmņak kōn er make āinwōt iien otemjeļo̧k pād ioļapļap in mijen ko aer naaj kōketak im kōkajoorļo̧k rein retiljek rej bōk jikin Irooj. Āindein ippān mijenede ro rej jerbal aolep raan, barāinwōt ippān kōj aolep.

Oktak in ilo erreim̧aanļo̧k in eļapļo̧k jen juon kapokpok an ļōmņak elemwaan. Ewōr juon m̧ool eo im̧we itulik in ļōm̧ņak eo me kōj jej pād iien otemjeļo̧k ijo ioļapļap. Eļan̄n̄e jej lale ijo jej pād ie ilo juon map, jej kajjion̄ n̄an ba kōj jej pād ilo juon ijjino. Ak eļan̄n̄e jej kajion̄ kalimjōke, jekdoon ia eo jej pād ie elukkuun pād ijo ioļapļap in juon jikin ekilep.

Āinwot ke ej ilo mejatoto, kōn menin ej barāinwōt kōn iien. Jemaron̄ en̄jake bwe jepād ilo jinoin ak jem̧ļo̧kin mour ko ad, ak eļan̄n̄e jej reilo̧k n̄an ijo jepād ie ņae bwebwenato an indeeo—n̄e jej kile bwe jetōb ko ad raar waļo̧k n̄an iien eo eļapļo̧k jān maron̄ eo ad n̄an keidi im, kōnke kōn en̄taan im pinmuur eo an Jisōs Kraist, ad jetōb e waļok n̄an indeeo eo ej itok—jej maron̄ kile bwe jej lukkuun pād ioļapļap.

Jemaanļo̧k Iaar m̧ōņōņō n̄an bar kōm̧m̧ane dekā eo ej jutak ioon leb eo an jinō im jema. Iien eaar jab em̧m̧an n̄an jikin eo leb eo ej pād ie, im Iaar en̄jake bwe juon dekā kāāl emaron̄ ļapļo̧k an jejjet n̄an mour in waanjon̄ak ko aer. Ke Iaar lale raan im allōn̄ im iiō in ļotak im mej ko ioon jōbwe eo eaar ekkeijel kōn juon kōkaļļe enana tam̧m̧in, kōkaļļe in edik ejej uwaan kōn aitokan mour em̧ōkaj an kobrak ļōmņak im būruwō kōn juon ememļo̧kjeņ ko rellōn̄. Kajjojo ememļo̧kjeņ kein raorōk raar bōktok juon iien ilo ioļapļap in mour ko an ro jinō im jema im ilo ioļapļap in mour eo aō.

Jekdoon ta iiō eo ad, jekdoon ta jepād ie, eļan̄n̄e men ko rej waļo̧k ilo mour ko ad, kōj jej pād iien otemjeļo̧k ijo ioļapļap. Ta eļapļo̧k, jenaaj n̄an indeeo pād ijo ioļapļap.

Aaet, enaaj wōr iien ko an ijjino im iien ko an kōjem̧ļo̧k ilo aolepān mour ko ad, ak men kein rej kōkaļļeik wōt iaļ eo an ioļapļap eo eļap an mour ko ad indeeo. Men̄e jej pād ilo jinoin ak jem̧ļo̧kin, men̄e jeddik ak jerūtto, Irooj emaron̄ kōjerbal kōj n̄an jibadbad ko An eļan̄n̄e jej door ļo̧k iturājet in jabdewōt ļōmņak ko rej kōm̧m̧an jon̄an maron̄ eo ad n̄an jerbal im kōtļo̧k bwe An kilaan en ļōme mour ko ad.

Rijeje sam eo ej ba, ‟En̄in raan eo Jeova ear kōm̧m̧an e; jenaaj m̧ōņōņō im lan̄lōn̄ ium̧win” (Sam ko 118:24). Amulek ej kakeememej kōj bwe ‟mour in ej iien eo n̄an armej bwe ren maanjabpopo n̄an iioon Anij; aaet, lo raan eo ilo mour in ej raan eo n̄an armej bwe ren kōm̧m̧an jerbal ko aer” (Alma 34:32; ekoba kōmeļeļe). Im juon rijeje boem̧ eaar ļōmņak, “Indeeo—ej ejaake Kiiō.”¹

Pād iien otemjej ijo ioļapļap ej meļeļe in bwe ikkure eo ej jamin jem̧ļo̧k, kōjatdikdik ej jamin jako, luuj ej jab jem̧ļo̧k eo. Bwe jekdoon ia jej pād ie ak jekdoon ta jekjek ko ad, juon indeeo an ijjino ko im juon indeeo an kōjem̧ļo̧k ko rej pād wōt im̧aan.

Kōj jej pād iien otemjej ijo ioļapļap.